Дунияллул гъунттулу дакъахьунссар царагу хIукумат Ниттихъал кьини кIицI къадувайсса. Жула билаятрай Ниттихъал кьини кIицI дуллан бивкIун бур 1998 шиная шихунмай, ноябрь зурул махъра-махъсса алхIат кьини.
Нинухъру лахъа-хъун буллалаву аьдатравун дагьну дур Австралиянаву ва Бельгиянаву, Германнаву ва Даниянаву, Индиянаву ва Американаву, Франциянаву ва Японнаву, мукунна чIярусса цаймигу хIукуматирттай.

Ци дуссар туну жула оьрмулуву ниттихъаяр агьамсса, ни­ттихъаяр аьркинсса, ниттихъаяр ххирасса. Ниттихъал кьини миннан яла тIааьнми, яла ххуйми махъру пишкаш бай оьрчIал, щалагу билаятрай лагай миннан хас дурсса, ми лахъа-хъун буллалисса личIи-личIисса мероприятияртту.
Ниттихъал кьинилуцIун дархIуну Дагъусттаннай, чIя­вусса хъамалгу бувкIун, бюхттулсса даражалий ларгунни «Аьра­сатнал бучIантIимур — ни­ттихъал кIунттихьри» цIанилусса регионнал дянивсса шамилчин­сса ниттихъал форум.
Андриана Аьбдуллаева
Ва кьини, кIюрххил, Ухссав­нил Ккавкказуллал федерал округирттаясса делегациярдал каялувчитурал, Дагъусттаннай­сса хъаннил жяматийсса организациярдал вакилтурал, Да­гъусттаннай Ниттихъал аллеялун гьану бизлай, Дусшиврул паркраву бувгьунни мурхьру. Ми бувгьуну махъ дайдирхьунни секциярдал даву. Форумрай гьуртту хьун бувкIми мукьва секциялийх бавчIуну зий бия. Секциярдал даву дачин дурну бия ДР-лул миллатрал политикалул министр Татьяна Гамалей, культуралул министр Зарема Буттаева, АьФ-лул Жяматийсса палаталул член Лейла Амирханова, Кабардин-Балкарнал республикалул Парламентрал кIулшиву дулаврил, элмулул ва жагьилтурал ишир­ттал председатель Светлана Азикова. Секцияр­ттал даву къуртал хьуну махъ цинявппа бавтIунни Дусшиврул къатлул залданувун. Аьрасатнал личIи-личIисса регионная, республикалул шагьрурдая ва районная бувкIсса инсантурал бувцIуну бия Дусшиврул къатлул зал. Щалагу Ух­ссавнил Ккавкказуллал федерал округирттаясса 1000-нния ливчусса ниттихъал гьурттушинна дунни ва форумрай. Форумрайн бувкIсса бусравсса хъамаллуравух бия «Матери России» тIисса щалагу Аьрасатнал жяматийсса суккушиннарал председатель Валентина Петренко бакIчисса регионнал отделениярттал вакилтал, АьФ-лул Жяматийсса палаталул член Лейла Амирханова, «Ассоциация народов России» тIисса щалагу Аьрасатнал жяматийсса суккушиннарал Советрал председатель Светлана Смирнова. Форумрай­сса ихтилатру бия хIакьинусса Аьра­сатнал цIуцIи кIанттурдая, цIурувкьюсса масъаларттая ва буруккинттая. Ихтилатчитал кIицI лаглай бия ми агьамсса масъалартту щаллу бавриву цуксса бияла буссарив хъамитайпалухь. Форумрал мурад бия ялун нанисса ник тIайлану, ас-намус буну, жула культуралулгу, аьдатиртталгу кьимат кIулну, Ватан ххирану тарбия дан цинявппагу ниттихъул цачIун шаву.
Форум тIитIлай, цинявппагу шикку гьуртту хьун бувкIми барча бунни Дагъусттаннал БакIчи Рамазан АьбдуллатIиповлул.
— Хъамитайпалул бияла хъунмассар, хъамитайпалул аькьил­шиврулли дуниял дургьу­сса. Нину хIисаврайгу, кулпат хIисаврайгу хъамитайпалухь хъуннасса каши ду­ссар кулпат буруччин, оьрчIан тIайласса тарбия дулун. Жула учайссар, ппу акъама цал ятин, нину дакъама арийлла ятин, куну. Ва учалалулгума буслай бур цуксса агьамсса кIану бугьлай буссарив ниттихъал жула оьрмулуву. Нину – кулпатрал вирдакIри, чанигу, гъилишивугу нанисса чирахъри. Кьурандалий тIийкун, алжан ниттихъал ччаннацIри бусса, – увкунни Рамазан АьбдуллатIиповлул.
Шиккува Дагъусттаннал БакIчинал махъ буллунни 2017 шинал ахирданийннин МахIачкъала шагьрулул хъун майданнив ниттихъал гьайкал дацIан дан. Ялагу Республикалул хъунаманал маслихIат бунни ОьрчIал ихтиярду дуруччаврил институтран Ниттихъал ва оьрчIал ихтиярду ва мурадру буруччаврил институт тIисса цIа дулун. МуницIун бавкьунни цинявппагу форумрай гьуртту хъанахъими.
Хъирив Валентина Петренкол дурккунни АьФ-лул Федерал Собраниялул Федерациялул Советрал председатель Валентина Матвиенкол чулуха­сса барча баву.
— Дунияллий дакьаву, кулпатирттаву нахIушиву дуручлачими нинухъру бур. ОьрчIал тарбиялул ялув бавцIумигу нинухъру бур. Ниттихъал чIарав бацIаву, кулпатирттал мурадру буруччаву жула паччахIлугърал политикалул хьхьичI ххуттайн лавсъсса масъаларттавасса ца бур, — тIий, чивчуну бур телеграммалий.
Ва дурккуну махъ В. Петренкол «Матери России» суккушиннарал чулуха ХIурматрал грамотартту дуллунни лайкьсса Дагъусттаннал хъаннин, ххаллилсса ниттихъан. Му ба­къассагу, ванил дуллунни Да­гъусттаннал БакIчи Рамазан АьбдуллатIиповлухьхьун школардансса медициналул кабинетрал сертификат. Дагъус­ттаннал БакIчиналгу цала чулуха ХIурматрал грамота дуллунни Валентина Петренкон, Лейла Амирханован, Светлана Смирнован ва м.ц. Дагъусттаннал БакIчинал ва «Матери России» суккушиннарал председательнал чулуха­сса грамотартту лайкь дурминнаву бия ДР-лул миллатрал политикалул министр Татьяна Гамалей, ДР-лул печатьрал ва информациялул министр Бурлият Токболатова, СаллатIнал ниттихъал комитетрал председатель Зульфия МахIаммадова, «Матери России» суккушиннарал Дагъусттаннаймур отделениялул председатель Таисия Билаловна ва м.ц.
Ахирданий форумрай гьаз бувсса цинявппагу масъалартту хIисавравун лавсун кьамул дунни билаятрал социал-экономикалул даража гьаз бан ва цаймигу арарду хьхьичIуннай дан хъаннил потенциал ишла баврил хIакъиравусса резолюция.