ЦIусса шинал байрандалул хьунийн гьарцагу идаралий дуллай бур личIи-личIисса шадлугъру, акциярду. Ца мукун­сса, «Сильные духом» цIанилусса батIаву хьунни мушакъатсса оьрчIансса Дистанцион обучениялул центрданул ва ихIсаниятрал «Чистое сердце» фондрал цачIуну дурну «Европа» банкетный залдануву.

Бадрижамал Аьлиева
Ва акция гьарца шинал ду­ллай аьдатравун дагьну дур. Ва даву дуллалиминнал хIарачатрайну ххари хъанай бур цIуллу-сагъшиврул ссуссукьушиву сававну школалийн занан къабюхълахъисса, дистанцион журалий кIулшивуртту ласласи­сса оьрчIру.
Гьашинумур акциялувух гьуртту хьунни мушакъатсса оьрчIансса Рес­публикалул дистанцион центрданий кIулшивуртту ласласисса 500-нния ливчусса оьрчIру ва миннащал бувкIсса оьрмулул хъуними.
Ва батIавривух гьуртту хьунни ДР-лул кIулшиву дулаврил ва элмулул министрнал хъиривчу Альбина Арухова, щалагу Аьрасатнал «Матери России» суккушиндарал Региондалул отделениялул председатель Таиса МахIаммадова.
ОьрчIру ялун нанисса ЦIусса шинащал барча буллай, Альбина Аруховал увкунни:
– Зу хъинну дакIру кьянкьа­сса оьрчIруру, зул кIулшивуртту, цаппарассаннал тIурча каруннил дуваймур ва спортравусса бюхъурду щаллуну цIуллу-сагъсса оьрчIалминнуяр хъис къаялавайссар. Цуксса хIайпнугу, къацинявннан дияй цIакьсса цIуллу-сагъшиву. Жул буржгу – зун щаллу­сса, буллугъсса оьрчIшиву, инсантурал аякьа, паччахIлугърал чулухасса мюхчаншиву, буруччаву щаллу давур. ЧIа тIий бура зун ва зул нитти-буттан ссавур, цIуллу-сагъшиву, гьарцагу давриву тIайлабацIу. Зу жун ххирассару, – куну.
Хъирив мукунма Таиса Ма­хIаммадовал барча бунни бавтIми ялун нанисса 2017 шинащал, чIа увкунни оьккимур, пашманмур духсса шинаву личIаву, ялун дуркIмур шин хьхьичIмурнияр тIайлабацIусса, ххарисса шаву. Сенатор, «Матери России» щалагу Аьрасатнал жяматийсса суккушиндарал председатель Валентина Петренкол цIаниясса ХIурматрал грамота дуллунни мушакъатсса оьрчIансса Республикалул дистанцион обучениялул центрданул директор ХIажимурад Усманилаевлун.
ОьрчIан хIадур дурну дия хъуннасса, бахха-бахханасса номердая сакин хьусса ххаллилсса программа. Шадлугъравух гьуртту хьунни республикалий ва мунил кьатIув цIа дурксса балайчитал, аниматортал ва, гьай-гьайгу, ци байранни, ци ЦIусса шинни бахшишру дакъа, оьрчIан дуллунни личIи-личIисса бахшишру.
Шадлугърал ахирданий ХIа­жимурад Усманилаевлул барчаллагь увкунни ва давривух гьуртту хьусса гьарцагу инсаннахь.