Декабрь зурул 26-нний Москавлив хьусса щалвагу Аьрасатнал цIушинал байрандалий гьуртту хьун лавгссар Дагъусттаннаясса делегация: 60 оьрчI ва 15 хъуними.
П. Рамазанова
Ва Дагъусттаннал Минобразованиялул сакин бувсса делегацияр. Байрандалийн тIайла бувкссар детдомирттавасса ва интернатирттаясса оьрчIру, мукунма къуллугърал бурж биттур буллайнува оьрмурдацIа хьусса полициянал оьрчIру, республикалул конкурсирттай ва олимпиадарттай хьхьичIунсса кIанттурду бувгьусса оьрчIру. Миннащал лавгссар учительтал, хIакин-педиатр, педагог-психолог ва ихтиярду дуруччай органнал кIия зузала.
Поездрал вагон-ресторандалуву оьрчIан ххуллийх гъилисса дукра душиву баян бунни делегациялулсса буллалиминнал. Кремлилувусса ёлкалул байрандалий гьуртту шаврицIун, оьрчIру экскурсиялий буцинтIиссар Космонавтикалул музейравунгу, «Измайлово» тIисса концертру дай залдануву хьунтIисса шадлугърайнгу, Цветной Бульварданийсса Никулиннул циркравунгу. ОьрчIру кьамул бувантIиссар Москавливсса Дагъусттаннал Постпредствалийгу. Жулва оьрчIру ххуйну бигьагу лавгун, ххарисса асардащал Москавлия зана хьуну бучIантIишиврийн хьул бишинну.
