Дагъусттаннай гьарица шинах бувайсса «Новый год» цIанилусса ялув бацIаврил ва профилактикалул операция буллай, ххал бувну бур ЦIусса шинал байрандалул мажлисру байсса личIи-личIисса объектру. КIул бан бювхъуну бур чIявусса инсантал батIайсса 1506 объектрал цIарая мюхчан шаврил сертификат душиву. Ххал бувну бур мукунма 13 ттучандалул тагьар ва микку дахлахисса пиротехникалул изделиярттал качествалул сертификат.
А. Аьбдуллаева
Му бакъассагу, республикалул МЧС-рал ва МВД-лул зузалт закондалуцIун къабавкьуну пиротехникалул затру дахлахисса ишру кIул баву мурадрай цинявппа базардавух бувккун бур. Гьарица кьини дуллай бур цIу ларчIсса ишру хьун къабитансса, цIу ларчIсса чIумалгу зарал чIивисса хьунсса давуртту. Республикалул шагьрурдал ва районнал бакI дургьуминнан ва агьалинан бувчIин бавуртту дунни.
Декабрь зурул 1-нний хьусса ДР-лул ХIукуматрал комиссиялул заседаниялий ххал бивгьунни байрандалул мажлисру буллалийни захIматсса тагьар (ЧС) хIасул хьун къаритаврил ва цIарая мюхчан шаврил масъалартту. Хьунни мукунма объектирдал каялувчитуращалсса инструктажру дуллалисса совещание.
Вай гьантрай тIурча МЧС-рал зузалтрал ккаккан дунни роликру ва Ахъушинскийл цIанийсса кучалийсса базаллуву дарчIунни пиротехникалул затру ишла дуллалийни личIлулну бикIияра тIисса листовкартту. Вай давурттая жухь бувсунни цIу къалачIун ялув ацIайсса инспектор Шамил Исмяиловлул.
