ЖКХ-лул хIакъираву инсантурал буллусса суаллан жаваб дуллунни ДР-лий инсаннал ихтиярдал Уполномоченныйнал аппаратрал пишакар Ш. Оь. Оьмардибировлул.

Суал: Гъинтнил чIумал, иши­райну квартирартту гъили къа­буллай буна, му ЖКХ-лул хIаллихшинналух багьа ласун аьркинссарив?
Жаваб: Гъилишиву дулаврихлу багьа ласаврил 2 жура бу­ссар.
Цалчинмур журалий ЖКХ-лул органдалул ккаккан був­сса гъилишиву дулаврил ставкардайн бувну (квадрат метрарду хIисавну), багьа ласайссар щалла шинал мутталий архIалсса бутIрайну, яни гьарца зуруй цава-ца багьа хIисавну. Му куццуй багьа ласайссар га чIумалсса тарифру ва нормативру хIисавравун лавсун, гъинттул гъилишиву къадулайсса дунугу.
КIилчинмур журалий гъилишиву дулаврихсса багьа ласай­ссар, агарда гъилишиврул энергия хIисав-ккал дайсса учетрал прибор къатраву духьурча (общедомовой притор учета). Га чIумал, яни дяркъу дусса чIумал багьа ласайссар иширайну дуллу­сса гъилишиврухлу ЖКХ-лул органдалул ккаккан бувсса тарифру хIисавну.
Цумур журалий багьа ласун аьркинссарив ккаккан байссар гъилишиву дулайсса организациялул ва управляющая организациялул дянивсса кьутIилий, ТСЖ-лул, ЖКХ-лул правлениялул хIукмулул. Яни бакIрайва ми гьарзад хIисавравун лавсун бикIан аьркинссар, яла къалма­къаллу къахъананшиврул.
-Суал: Квартиралул заллу кIа квартиралуву ялапар хъанай акъахьурча ва ганал пропискагу тиккура дакъахьурча, ганая коммунал хIаллихшиннахлусса багьа ласун бучIиссарив, так управляющая компаниялул техникнал акт­рал гьанулийн чул бивщуну?
Жаваб: АьФ-лул Жилищный кодексрал 155-мур статьялийн бувну, квартиралул заллу буржлувссар къатрахсса ва коммунал хIаллихшиннахсса багьа буллан ганал га квартира цалвашиврий бацIан бувсса документ­ру дузал бувния махъ.
Квартиралул залуннал прописка гай къатраву дакъахьурчагу, духьурчагу, заллу буржлувссар коммунал хIаллихшиннахлусса багьа буллан.
Суал: Мартрай квитанциялий хIасул хьунни цIусса статья «Обслуживание теплосчетчика» тIисса. Амма ттул квартиралуву дурну дур так ттулва квартира личIину гъили байсса дузалшин (индивидуальное отопление), мунияту на ттула счетчикрал кка­ккан бувмур багьа булара. На булун аьркинссарив нава муштари бакъасса хIаллихшиндалухсса багьа?
-Жаваб: Ина буржлувссара щалва къатлун дирхьусса теплосчетчикрал обслуживаниелух­сса багьа буллан къатраву ялапар хъанахъисса циняв квартирарттал заллухъруннащал архIал. Амма вин багьа ккаккан бувну бур теплосчетчикрал обслуживаниялух бакъача, цайми давурттах. Мунияту вин аьркинссар зулва управляющая организациялийн лавгун цIуххин, циван квитанциялий ккаккан бувну буссарив «Обслуживание теплосчетчика» тIисса статья. Мукунма вин аьркин­ссар мува суал булун Роспотребнадзорданул управлениялул пишакартурахьхьун ягу Госжилинспекциялул зузалтрахьхьун. Миннайн заявление чичирча, ми организациярдал зузалтрал хъирив лавну, вихь бусантIиссар ссаву ци бу­ссарив.
-Суал: Цукун, ци чIумал ккалли дайссар коммунал хIаллихшин цила дагьайсса куццуй къадурну душиву?
-Жаваб: Коммунал хIаллих­шинну ххуйну къадурну душиврун ккалли дайссар, укунсса тIалавшинну биттур къадарча.
Дяркъусса шинал щаллу баврил тIалавшин укунссар: зурул мутталий 8 ссятрайсса бучIи буллалиссар щин дулаву дацIан дуван ва цал 4 ссятрайсса, мугу центральный сетьраву авария хьурча. Щинал давление чан дан къабучIи буллалиссар.
КIири щинал щаллу баврил тIалавшинну укунссар: щинал температура (кIиришиву дикIан аьркинссар 75-60 градус по С дияннинсса. Щин дулавриву ца зурул мутталий бяличIаву хьун бучIиссар аьмну 8 ссятрайсса ва цал 4 ссятрайсса, мугу магистрал щинал ххуллул авария хьуну духьурча. Щинал температура даххана хьун бюхъайссар хьхьунил ссят 12-нния кIюрххил ссят 5-ннийнин – 5гр.С, ссят 5-нния хьхьунил ссят 12-ннийнин – 3 С-лул.
Токрал щаллу бавриву бучIи буллай бур ток 2 ссятрайсса кьукьин (агарда источник питания, яни ток бачайсса кIану 2 бухьурча), агарда ток бачайсса кIану ца бухьурча, бучIи буллай бур 24 ссятрайсса лещан бан чирахъ. Напряжение 220 Вольтраяр чан, чIяву хьун къабучIиссар.
Гъилишиву дулавриву: къат­раву гъилишиврул 18 градус по С дикIан аьркинссар (агарда квартира къатрал мурцIнийсса бухьурча, 20 градус по С-яр къачансса градусру дикIан аьркинссар). Ххишаласса дикIан бюхъайссар 4градус по С, яни 22 градус. Градусру чан хьун бучIи буллай бур хьхьунил 12 ссятрая кIюрхнил 5 ссятравуннин дурагу 3 градусрал. Дяхтта 18 градусраяр (20) чан хьун къабучIи буллалиссар.
Къатраву гъилишиву дулавриву бяличIаву дан ихтияр дуссар ца зурул мутталий аьмну 24 ссятрай­сса. Агарда къатлуву духьурча гъилишиврул 12-18 градус по С, му чIумал бучIиссар бяличIаву дуван 16 ссятрайсса. Агарда шарда температура духьурча 10-12 градус С, му чIумал бяличIаву дуван ихтияр дуссар так 8 ссятрайсса. Агарда ичIаллил гъилишиву духьурча 8-10 градус С, му чIумал гъилишиву дакъа битан бучIиссар так 4 ссятрайсса.
Газрал щаллу бавриву бяли­чIаву дан ихтияр дуссар ца зурул мутталий цинярда ссятру цачIу 4 ссятраяр ххишала дакъа.
ХI. Аьдилов