Щаллагу дунияллул идаралул, Журналистътал буручлачи­сса комитетрал хIасиллайн бувну, 2015 шинал дунияллий оьрмурдацIа увну ур СМИ-дал 52 зузала. Яла чIявуми журналистътал ливтIуну бур Сириянаву: шинал лажиндарай 9 журналист, Франциянаву – 8 журналист, Йеменнай – 5 журналист.Аьрасатнал Журналистътурал союзрал статистикалийн бувну, 26 шинал лажиндарай Аьрасатнаву оьрмурдацIа увну ур 360 журналист. Ва Союзрал сипталийн бувну, 1991 шинал къуллугърал бурж бартбигьлайнува оьрмурдацIа бувсса журналистътал дакIнийн бичайсса кьинир декабрь зурул 15-мур кьини. Гьар шинах ва кьини Москавлив, Журналистътурал къатлуву (Центральный дом журналистов, кутIану ЦДЖ) хIурматрай дакIнийн бичайссар чил канил оьрмурдацIа бувсса журналистътал. Ва мероприятиялий гьур­тту хьунни Дагъусттаннал Журналистътурал союзрал председатель Аьли Камаловгу. Ванащалли жул ихтилатгу.

— Аьли АхIмадович, къуллугърал бурж биттур буллай ливтIусса журналистътал дакIнийн бичлачисса митингру гьар шинах регионнай ва Москавлив дувай, гьашинумур мероприятие цукун ларгри, чIявусса журналистътал бавтIун бияв?
— Цал на гьуртту хьура аьрасатнал прессалул хIакьинусса иш-тагьар ххал дигьлагьисса конференциялий. Аьрасатнал Журналистътурал союзрал сипталийну дурсса ва конференциялийн оьвкуну бия кьатIаллил билаятир­ттал посолтурайнгу. Журналистътурал союзрал председатель Всеволод Богдановлул конференция дайдирхьуна «Жува Аьрасатнаву ялапар хъанахъисса ва зузи­сса шиккусса оьрму ххуй шаву мурадрайру» тIисса мукъурттийну. Хъамаллуравух бия ЮНЕСКО-лувусса СМИ хьхьичIуннай даврил ва тархъансса мукъул департаментрал директор Гай Бергер, Генеральный секретарьнал кумагчи Оливер Мани-Керл, Аьрасатнавусса Евросоюзрал посол Вигаудас Ушацкас, журналистътурал Европанал федерациялул генсекретарь Риккардо Гутиеррес ва цаймигу. Хъамаллурал ихтилатирттал темарду дия хъунмурчIин Сириянаву ва Украиннаву тахсир бакъасса инсантал литIлай бушивруцIун дархIусса, дяъвилул къавгъардал тахсир Аьра­сатнайгу буссар ва циняв билаятру уртакьну терроризмалущал талан аьркинссару тIисса. Аьрасатнал журналистътурал, «Московский комсомолец» издательский домрал гендиректорнал хъиривчу Олег Воробьевлул ва «Мир Белогорья» издательский домрал гендиректор Олег Шевцовлул гьаз бувсса ма­съаларттугу бия жучIавами кунма­сса: кказит-журналлу бищайсса чагъардал багьри гьаз шаврия, подписка кьиматрай дакъашиврия, пре­сса буккултрачIан биян буллали­сса «Почта России» лащинну зий бушиврия, кказит-журналлу баххайсса киоскру чан хъанай бушиврия, рекламардал доход дакъашиврия, кIанттул администрациярдащал бавкьуну зун багьлай бушиврия, сокращениярду дувансса тIалавшиннарду душиврия. Амма циняв кказитирттан интернетрая нигь да­къассар, ялунгума интернетрал кказитирттал каширду хъуни дуллалиссар, печатьрайсса пресса мудангу личIантIиссар тIий бия ва укун тIутIиминнацIун бакьлай бия. Вара кьини журналистътурал Европанал федерациялул вакилтуращал уртакьну ЦДЖ-луву хьуна къуллугърал буржру биттур буллай ливтIусса журналистътал дакIнийн бичлачисса мероприятиягу. КьатIаллил билаятирттаясса коллегахъулгу бухьувкун, ва дунияллул халкьуннал лагрулийсса мероприятие хьунни. КIиттуршунниха ливчу­сса инсантал бавтIуна жула кьюкьраву бакъасса журналистътурал аьпа учин. Бия оьрмурдацIа був­сса коллегахъал кулпатру, гъан-маччами. Ялув кIицI лавгсса департаментрал директор Гай Бергердул, журналистътурал даврин кьимат бишлай, увкуна: «Журналистътурал даврил бияла дуниял марцI дуккан дуллалишивруцIун бавхIуссар. Информация хъинну чапалсса неххан ккаллий­ссар, журналистътал му неххавун марцIсса щин рутIлатIиссар нех лицIан дуваншиврул». ОБСЕ-лучIасса СМИ-рдал тархъаншиврул масъалартталсса буллалисса бюрорал директор Андрей Рихтердул увкуна: «Жу гьарца журналистнал чIарав къарал бикIан аьркинссар тIий бакъару, жу буру жулва оьрмурдан нигьачIаву дакъа тIайламур буслансса ва чичлансса ихтиярду тIалав дуллай». Цайминналгу бувна укун аьнтсса ва бюххансса ихтилатру, журналистътурал оьрмурдан нигьачIаву душиврия, тархъанну махъ учин сивсуми аьщун бизлай бушиврия, къаххуймунищал ччалаччиминнал хъирив багьлай бушиврия.
— Аьли АхIмадович, ина къабувссияв микку ихтилат?
— Бувссия. Дагъусттаннай къуллугърал буржру биттур буллай оьрмурдацIа увсса 19 журналист хъанай ур. На ттулва ихтилатраву чIурчIав дурссия республикалий 19 журналист ивчIаврийн бувну 19 дело дурну душиврий, силис­ттарду най бушиврий, амма так ца преступление дакъа аьч дурну дакъашиврий, «ХIакъикъат» кказитрал хъунама редакторнал хъиривчу ва «Ссугъращи» кказитрал главред Аьбдулмалик АхIмадилавл оьрмулуцIа аврил силистта шанна шинай лахъи ларгшиврий, мунайн ка гьаз дурминнан танмихI буварчагу, заказчиктал ттигу лякъин бувашиврий. Журналистътал оьрмурдацIа бувсса силистталул ялувбацIаву дуван ПаччахIлугърал Думалул бакIрайн ласурчагу, жунна хIасиллу чIалай дакъар, респуб­ликалийсса ва билаятрайсса оьр­мулул заллушиву дуллалими мафиоз структурарду духьувкун. На хъинну хъирив лавну лахьхьав ва лавмартсса схема. ЦIубутIуй, хъинну анаварну Следственный комитетрал хъунаманан баян бувай ихтиярду дуруччай органнал зузалтрал, цивппа хъинну хъирив багьну бушиву журналист оьрмулуцIа увми лякъин ва танмихIрайн кIункIу уван. Журналистнал гъан-маччамигу тахсиркар лякъиншиврийн мукIруну паракьат шай, ихтиярду дуруччай органнал зузалтрайн вихшалдарай ялугьлан бикIай. Яла дайдишай силистталуву гъургъаза. Цаппара правоохранительталлив бюхъайссаксса силис­тта лахъи дуккан данмур буллай бикIай. Кувний делолул материаллава дакъа шай инсаннал тахсир ккаккан буван куннасса зат­ругума. «Дагестан» ГТРК- лул директор, машгьурсса журналист ва публицист ХIажи Абашилов оьрмулуцIа увми лякъаву тIалав буллай агьали сукку шайхту, бакъа-къатIа бувна машина, ярагъ, тахсиркарначIан ша нанисса барашинна дувансса зат­ру. Циван чирча, преступлениялул хьхьури хъуни къуллугъчитурал кабинетирттахь диркIун тIий, преступление аьч дуварча, ми къуллугъчитурал къатри ччу­ччин нанисса чIалай буну тIий. Преступление аьч дуваврийну ливтIуцириннал кулпатирттан, гъан-маччанан дигьалагру къахьунссар, так укунсса ишру тик­рал къахъананшиврулвагу жува цIакьну бацIан аьркинссару. Аьдлулийсса танмихI суд-диванну тIалав буллан аьркинссару. Журналистнайн бивтсса ккулла, му щалвагу жяматрайнни щилащисса.
— ХьхьичIва-хьхьичI, жуйн­ма журналистътурайнни, гьай- гьай, щилащисса. Мурдалсса инсантурал методругу мурдалссар, так ми жува къукъу бакьин буван, кьацIру лакьин бувансса кьадарсса инсантуралмур хIарачат ххув хъана­хъисса замана бур. Бюхлахимур, кьутIлатIимур му бурхха, ина тIийкун, силистталул даву аьдлулий дуллай бакъашиву. Ина ПаччахIлугърал Думалийн бувкшиву буслай ура, минналмур цIакьгу къалаллалиссарив?
— ПаччахIлугърал Думалул, 422 депутат рязийну, Следственный комитетрайн ва Генпрокуратуралийн парламентский запрос гьан дурссия, ливтIусса журналистътурал хIакъиравусса деларду аьч дуваврил тIалавшинна дуллалисса. КПРФ-лул вакил Александр Ющенкол гьаз був­на ХIажимурад Камалов, АхI­маднаби АхIмаднабиев, Загьир Арухов оьрмурдацIа баврил хIакъиравусса силистта къухънану бушиву, мукунма «Спра­ведливая Россия» партиялул депутат ХIажимурад Оьма­ровлулгу (Башкириянава депутатну увчIусса дагъусттанчу) оьрмурдацIа бувсса дагъусттаннал журналистътурал сияхI дурккуссия щаллуну, ми фамилиярду парламентский запросравун рутансса тIалавшиннаращал. Жу жулла тIалавшиннарду хъуними кIанттурдайн диянгу дур­ссар, баянгу бувссар, тахсиркартал лявкъуну, танмихIрайн кIункIу буваннин паракьатну къабацIантIиссару. ЛивтIусса журналистътурал сурат­ру ду­сса буклетру «День памяти погибших журналистов» итадакьарду, ва нюжмардий жучIанма оьвчин тIий буру ливтIуцири жур­налистътурал кулпатирттайн, арсурваврайн, душваврайн, гъан-маччацириннайн. 2012 шинал июль зуруй издательствалул хьхьичI ливтIусса журналистътуран гьайкал дацIан дувансса кIанай гьанулул чару бацIан був­ссия, ялун нанисса шинал гьайкал дацIан дуван дакIний буру, муниха зий буру. Монументрансса макет, проект­рал документация хIадурссар. Республикалул БакIчи Рамазан АьбдуллатIиповлулгу 500 азарда къуруш итадакьинсса махъ буллунни. Ва так дагъусттаннал ва аьрасатнал журналистътурансса гьайкал дакъар, щалагу дунияллий чил канища ливтIусса журналистътурансса гьайкалли, жу дунияллул журналистътурайнгу букканну, аьркинссаксса арцу ляркъуну, дартIун, 2017 шинал ххуйсса гьайкал дацIан дуванну. ЛивтIусса журналистътурал аьпалул хIурмат баву – жулва буржри, ми журналистътурайн бивтсса ккулларду, ми жуйнмагу бивтсса ккуллардур, цал ттигу нукIува увкумур тикрал буван. Жувунна нигь руртун, жува тIайламур къачичай буванну тIисса тамахIругу нахIакьдан­ссар, мукун тIутIиминнал мурад щаллу къахьунтIиссар. Жунмагу мудан дакIний бикIан аьркинссар, жулва гужгу, кьувватгу, цIакьгу – жула цашивруву бушиву, уттиния тихунмайгу цIакьну бацIан аьркиншиву, давугу цачIу, бавкьуну дуллан аьркиншиву.
Ихтилат бувссар
ПатIимат Рамазановал