Декабрь зурул 15-нний ПаччахIлугърал Думалул депутат, агьалинал цIуллу-сагъшиврулсса буллалисса комитетрал член Аьбдулмажид МахIрамовлул МахIачкъалалив «Единая Россия» партиялул агьали кьамул байсса приемныйлуву кьамул бунни цаппара инсантал.

П. Рамазанова
ДепутатначIан бувкIсса Римма Оьмариевал мунахь кумаг бува кунни цIунцIия хьуну, нярайн зарал бивну, захIматну къашавайсса арс Москавуллал ягу Санкт-Петербургуллал реабилитациялул центрданийн кьамул уваншиврул. Мунил бусласимунихгу вичIи дирхьуну, депутатнал махъ буллунни му иширал хъирив лаян, Дагъусттаннал минздраврайн запрос гьан буван. Мукунма бакIрайн лавсунни захIматну къашавайсса Оьма­риевлун лага-учIансса ххуллух­сса хIакь булунгу.
МахIачкъа­лалив яхъанахъи­сса ХIажимурад МахIамма­довлулмур миннат бия властьрал органнайн даврийн уххан кабакьира тIутIисса. Депутатнал мунан бувчIин бунни паччахIлугърал къуллугърайн кьамул баврил низам цукунсса дуссарив, ци тIалавшиннарду дуссарив. Вава МахIачкъалалив яхъана­хъисса Аьбдулманап Иманшяпиевлул миннат бия Дагъусттаннал хъуншагьрулий аьрщи ккаккан дува тIисса тIалавшинналуцIун кабакьи тIисса. Шагьрулул администрациялийн запрос гьан бувну ва масъалалул хъирив лаянгу махъ буллунни Аьбдулмажид МахIрамовлул.