Декабрьданул 16-нний Дагъусттаннал БакIчи Рамазан АьбдуллатIипов хьунаавкьунни Аьрасатнал «В контакте» социал сетьрал уртакьтуращалсса давурттал директор Константин Сидорковлущал, «В контакте» социал сетьрал прессалул бакIчи Евгений Красниковлущал ва «В контакте» сетьрал тIайланнасса трансляциярдал каялувчи Роман Богаутовлущал.

«В контакте» сетьрал вакилтурал Рамазан АьбдуллатIиповлухь бувсунни ва социал сетьраву ганал аккаунт верифицировать бувну бушиву, яни официальну хIакь бувну бушиву (установление подлинности). Му мукун бувссар «В контакте» социал сетьраву Да­гъусттаннал БакIчинал къалпсса аккаунтру букьан баншиврул, Рамазан АьбдуллатIиповлул давурттал хIакъиравусса тIайласса информациялул даража лахъ баншиврул, «В контакте» социал сетьравусса Да­гъусттанналмур бутIуву жагьилсса никиращал дахIаву дансса информациялул канал дузал даншиврул.
Рамазан АьбдуллатIиповлул ихтилатраву укун увкунни: «ХIакьину жунма чIалай бур ттинин буклай бивкIсса СМИ-рдал ва цIусса медиарттал дянив бунияласса бяст-ччал най бушиву. Гьай-гьай, гьарца информациялул каналданул бур цила мурадлувсса аудитория, телевидениялувугу, Интернетравугу. Аьркинссар Дагъусттаннал агьалинан лахьхьин буллан Интернетравату информация ласлан, цанчирча, социал сетьру ишла буллай бур так жагьилминнал, оьрмулул бугьараминнаща къахъанай бур жагьилтал тарбия буллан социал сетьраву».
Социал сетьрал вакилтурал Рамазан АьбдуллатIиповлухь барчаллагь увкунни гъилину кьамул баврихлу. «Жу вил страницалун буларду официалсса статус ва букьан барду циняв къалпсса аккаунтру вил цIаниятусса, социал сетьру ишла дуллалиминнаща бюхъаншиврул информация ласун так официалсса кIанавату, яни вил цIанияту чивчумур. Жун ччай бур паччахIлугърал учрежденияртталгу ишла буллан «В контакте», увкунни хъамаллурал.
ХIадур бувссар
ХI. Аьдиловлул