Дагъусттаннал ФСИН-лул управлениялий ларгунни уголовно-исполнительный системалул ветерантурал кьинилун хас дурсса шадлугърал мероприятияртту. Шиккун оьвкуну бия личIи-личIисса шиннардий ва системалуву къуллугъ буллай бивкIсса, республикалул пенитенциар идарар­ттал гьану бизлай бивкIсса ветерантурайн.

Ветерантал барча бан бувкIун бия республикалул УФСИН-лул каялувчитал ва зузалт, УИС-рал хъунама инспектор, виваллил службалул полковник Вадим Долматов ва республикалул Ветерантурал совет­рал вакилтал.
Дагъусттаннал УИС-рал ветерантал барча буллай, Да­гъусттаннал УФСИН-лул хъунама, виваллил службалул генерал-майор Муслим Даххаевлул барчаллагь увкунни вайннахь чIярусса шиннардий ва системалуву дакI марцIну захIмат бихьлай бивкIун тIий.
— УИС-рал ветерантурал кьини кIицI даву – му жула ветерантал лахъа-хъун бавур, вайннал захIматран лайкьсса кьимат бищавур, цала оьрмулул яла ххуйми шинну Ватандалуха къуллугъ буллай гьан дурминнал хIурмат бавур.
ЧIявуми ветерантал пенсияр­ттайн бувккун махъгу чялиш­сса гьурттушинна дуллай бур идаралий хъанахъисса цинярдагу мероприятиярттай, жагьил­сса зузалтращал кIибачIлай бур цала опыт, буллай бур миннан мюнпатсса насихIатру, — увкунни ванал.
Дагъусттаннал УФСИН-лул хъунаманал хъиривчу, виваллил службалул полковник Аьли­кьади МахIаммадовлул кIицI лавгунни Ветерантурал байрандалул цимирагу никирай зий бивкIминнал дянивсса дахIаву цIакь дуллалишиву, ва системалул ххуй-ххуйми аьдатру дуручлачишиву.
— Ветерантурал организациялул цала опытрайну, аькьилшиврийну хъунмасса захIматрал бутIа бихьлахьиссар Аьрасатнал уголовно-исполнительная система цIакь дан ва хьхьичIуннай дан.
Жула ветерантал зун гъирагу буну, аргъгу дуну бур. Жагьил­сса зузалтращал тарбиялул даву дуллай чялишну бур, — увкунни Аьликьади МахIаммадовлул.
Хъирив ихтилат бунни Вадим Долматовлул.
— Ветерантал – къучагъшиврул ва яхI-къириятрал эбратну хъанахъисса инсанталли. Цала оьрму ва службалун хас бувну, хIакьинусса кьинигу хъуннасса хъар лархъун най буссар жула ветерантал. Яла-яла, вай гьарица ишираву эбратну хъанахъиссар жагьилминнан, вайннал эбратрайри жагьилминнаву ххуй-ххуйми хасиятру хIасул хъанахъисса, — увкунни ванал.
Дагъусттаннал УФСИН-лул Ветерантурал советрал председатель Афсаладдин Кахаевлул барчаллагь увкунни ветерантал барча бан бувкIсса цинявннахь.
— Щак бакъар, Дагъусттаннал УФСИН-лул зузалтрал ветерантуращал цачIу шай­сса хIарачат бантIиссар цала кIулшивурттайну ва опытрайну Дагъусттаннал УИС-рал даву хьхьичIуннай дан, жула хIукуматрал пенитенциар системалул ххуй-ххуйми аьдат­ру ядан, — увкунни ванал. Хъирив жагьилсса зузалтращал опыт кIибачIлай, миннал пишалул даража гьаз бан ва Ватан ххирану тарбия бан хIарачат буллали­сса УИС-рал ветерантуран ду­л­лунни личIи-личIисса наградар­тту. Яла мероприятиялий гьуртту хъанахъисса цинявннал тIутIив дирхьунни къуллугърал бурж би­ттур буллай жанну дуллуминнал гьайкалданучIа . ТIутIив дирхьуну махъ, ветерантурайн авадан­сса ссупралухун оьвкунни. Ши­ккугу ветерантал дакIнийн дичлай бия цивппа зий бивкIсса чIунну, мунияр махъ системалуву хьусса дахханашивуртту, буслай бия цала оьрмулия.
Укуннасса, ветерантал лахъа-хъун буллалисса, мероприятияр­тту ларгунни УИС-рал циняр идарарттай.
ДР-лул УФСИН-лул
пресс-служба
ХIадур бувссар
А. Аьбдуллаевал