Ва зуруй оьрмулул 80 шин там хъанай дур Аьрасатнал ва Дагъусттаннал халкьуннал артист, Аьрасатнал ва Дагъусттаннал ПаччахIлугърал премиярттал лауреат, Дунияллул халкьуннал премиялул лауреат, композитор Ширвани Чаллаевлун.

Ширвани Чаллаев билаятрал ттизаманнул композитортураву яла яргма композиторнан хIисав ай хьхьичIунсса музыкалул пишакартурал. Ванал гьунарданун оьрчIнийва лавайсса кьимат бивщуну бур хъунасса музыкант Дмитрий Шостаковичлул.

Цимивагу ацIва миллат ялапар хъанахъисса республикалул магьирлугърал тарихравугу агьамсса кIану ванал бугьлай бур – ванал гьунардайнур Дагъусттаннай лявхъусса цалчинсса опера, цалчинсса симфония, цалчинсса инструментал концерт ва Республикалул гимн.
Ширвани Чаллаевлул щалла творчествалуву асар хъанай дур буттал кIанттухсса, миллатрахсса, мазрахсса, балайрдахсса дазу-зума дакъасса ччаву. «Ттул буссавагу ххазина зун­ттал халкьуннал балайрдур. Гьарцагу балайлуву дур инсаннал ххаришиву ва къумашиву.
Балай – му халкьуннал кьадарди, тIабиаьтрал батIул къашайсса бутIар», — ччя-ччяни тикрал бай Ширвани Чаллаевлул. Ванал музыкалулгу, балайрдалгу бияла ляваличIисса бур, мунал маз къабувчIайсса, мунал магьирлугърая ятсса тамашачива ясир айсса, цанчирча му бур вичIидирхьуманал аькьлу-кIулшилувун, оьтту-ттурчIавун куртIну буххайсса. Камерный оркестрданун чивчусса лакку балайрдал концертрая махъ (1968 шинал) хьхьичIунсса музыкант Георгий Свиридовлул Ширвани Чаллаевлуйн увкуну бур «Халкьуннал рувхIанийшиву творчествалуву аьч дуллалисса композитор, хьхьичIазаманнул балайрдал гьанулий пасихIну ттизаманнул произведениярду чивчусса художник-новатор», — куну. Цала Ширвани Чаллаевлул цIу буну ва бюхханну учай ми балайрду. Гьавас, мяъна-мурадрал куртIшиву — вай дур композиторнал мазрал хасшивуртту.
Цала произведенияртту чичин Ширвани Чаллаевлул кIур­чIулттувух буккан бувну бур дунияллул поэзия: ишла бувну бур, цала ватанлувтуралсса бакъассагу, оьруснал классиктурал – Пушкиннул, Лермонтовлул, Есениннул, Фетлул, Блоклул шеърирду.
Оьруснал хъунасса чичу Толстойл произведениярттая тIурча кIива-кIива ххаллилсса опера чивчуну бур. «Хаджи-Мурат» опералухлу ва лайкь хьунни Аьрасатнал ПаччахIлугърал премиялун. «Казаки» опералул премьералул хIакъиравусса цилвамур пикрилуву хьхьичIунсса музыкалул критик Марина Гайкович чIурчIав дуллай бур: «Ва опералуву яла яргма персонаж хьунни Зунттал чIу – цащара композиторнаща дакъа учин къашайсса щинтасса халкьуннал такьва».
Ттининнин композиторнал чивчуну бур ацIва опера. Ванал цалчинсса опера Дагъусттаннал халкьуннал тарихраясса «Горцы» бивхьуссар 1971 шинал Ленинград­рай. Мунил премьера тIурча хьу­ссар МахIачкъалалив, республикалул гьар кIани-кIанттавасса тамашачитал бавтIсса унгу-унгусса халкьуннал байрандалул лагрулий. Мура миллатрал колоритрай чивчусса бур АхIмадхан Абу-Бакардул хавардая сакин бувсса музыкалул къямадия «Странствия Бахадура» (му цалчин бивхьуссар Ванеймуне эстоннал театрдануву ) ва Апанни Къапиевлул аьрали чичрурдайн чул бивщусса «Читая дневники поэта» (бивхьуссар Б. Покровскийл цIанийсса Москавуллал академический камерный музыкалул театрдануву); балетру: «Камаллул Башир» ва «Хан-Герей»; Лермонтовлул шеърирду гьануну лавсъсса мюзикл «Поручик Тенгинского полка» ва мукунма хорданул, фортепианолул ва симфониялул произведенияртту.
Ххаллилсса композиторнал гьунарданунсса кIану лявкъуну бур Европанал классикалувугу — американал шаэр Эмили Дикинсоннул ва испаннал шаэр Гарсиа Лоркал шеърирдансса концертру ва мува Лоркал шеърирдая чивчусса опера «Кровавая свадьба» ва ингилиснал шаэр Вильям Шекспирдул произведениялиясса опера «Король Лир» (кIивагу бивхьу­ссар Б. Покровскийл цIанийсса театрдануву).
Зулайхат Тахакьаева

Ина вила миллатрал байрахъра

ХIурмат бусса Ширвани Рамазанович! Ина анжагъ вила республикалул гимнрал автор хьун лайкь хьусса гьунар бу­сса композитор акъара. Ина вила халкьуннал лишанна, байрахъра, мунил цIа ва пахрура. Бусса оьрмулий ина вила ватандалул магьирлугърал цIаний дакI тIайлану къуллугъ буллай усса­ра. Ина, мяйжаннугу, вила аьрщарал балайчира, амма вил ххаллил­сса музыка хIакьину кIулссар дазул кьатIувгу. Оьруснал хьхьичIунсса шаэртурал ва кьатIаллил билаятирттал классиктурал шеърирдан музыка чичаврийну авадан хьу­сса вил магьирлугърал ирсиран багьа бакъассар. Къабигьасса бивкIссар бюхттулшивурттайн­сса вил ххуллугу. Амма бюхттулсса гьунарданул, вийнна­сса вихшалдарал ва хьхьу-кьини да­къасса захIматрал хьхьичI цичIар къадацIайссар. Миннун­сса бахшиш – халкьуннал ччаву ва бусравшивур. Вил музыка тIий бу­ссар личIи-личIисса билаятирттал яла машгьурми театрдал сценардай, цикссагу шиннардий так ца вила ватанлувтуралсса дакъагу, мунил кьатIувсса халкьунналссагу дакIру дуцIин дуллай буссар. Инавагу миннан хIат-хIисав дакъа бусравссара. Вил караматсса произведениярттугу ттигу цимирагу никирай яхьунтIиссар.
Александр Калягин,
Аьрасатнал Театрал деятельтурал союзрал хъунама

«Маугли» — дуниял хIайран дурсса опера

Ца кьини Наталия Сац ца чIивисса иширал ялув бувкIун бур Аьрасатнал Композитортурал къатлувун. Концертрал залданува баллалисса караматсса музыкалул лавсун, хIаллих нузгу тIиртIуну, бувххун бур гивун.
Зал ацIансса кIану бакъа бувцIуну бивкIун бур. Рояльданух щяивкIун балай тIий ия тIар лухIи-пурщисса адамина. Маз къабувчIлай бунува, ганал чIунил, балайлул такьвалул, яргсса, аслий­сса макьаннал найбунува хIайран бувну бур. Га ивкIун ур цала ниттил мазрай балай тIутIисса Ширвани Чаллаев. Ганащал кIул хьу­сса лахIзалувува ттул ниттил, Наталия Сацлул, бакIраву хIасул хьуну бия гьунар бусса композитор театрданун цIусса произведение «Маугли» чичавриха зузи ансса пикри. «Ина жул театрданун Мауг­лиясса опера чичин аьркинссар. Вища му бюхъантIишиврийн ттул цукунчIавсса щак бакъар».
Та хавар бакъасса ягу бю­хъай кьадарданул чирчусса хьунабакьаву багьана хьуссар гихунмай театрданул репертуардануву ца яла агьаммур кIану бувгьусса спектакль чичин.
Опералунсса либретто чичин багьлай бия ттун. КIиягу шавкьирай зий байбивхьуру. Ттул текстращал архIала композиторгу макьан чичлай ия. Жу хьунакъабавкьу­сса кьини лях къалагайва. Ахиргу, дуркIуна опера Наталия Ильиничнан ккаккан бан аьркинсса кьини. ДакIний бур, опера кка­ккан бан хьхьичI нава ганин цирив бувчIин бан ччай бивкIсса, амма … «Руцара, – куну ихтилат кьукьин бувсса. – Гьарзат музыкалул цилва бусантIиссар. Мунил лагмасса гъалгъарду ссанчIав бакъассар». Музыка къуртал хьунцIа цуппа ца махъ къаувкуна. Яла тIурча ххарину увкуна: «ХIакьину зу ттун бахшиш дунни. Хъуннасса бахшиш. Мугьлат бакъа байбихьлахьиссару опера хIадур буллай».
Режиссер-постановщикну ивтуна Наталия Сацлул кумагчи Виктор Рябов, музыкалул каялувчину ва дирижерну – Виктор Яковлев, сцена чIюлу бан учIан увна Венгриянавасса машгьурсса театрал художник Шандор Пироша. Гьарца репетициялий аьмсса каялувшиву дуллай буссия цуппа Наталия Ильинична.
ЛяваличIисса гьавас буну зий бия опералул ялув щалва труппа. БурцIурдил хасият кIул дан, лухIи пантералул пластика, маймунтрал увинтру лахьхьин ца кьини щалва труппа лавгссар зоопаркравун. Тамансса хIал бувссар «жанавартрал» роллу дугьлагьиминнал цалва-цалва персонаж бавкьусса муххал къатрал лагма занай, цIиникьрал, бюрунттал, шатрал хасиятру ла­хьхьиншиврул. Цала персонажтурах ялу-ялун эшкьи хъанай, шавкьиравун багьлай бия актертал. Жанавартрал сиппат ххуйну ккаккан дан­сса хIарачатрал гайннаву цIу-цIусса творчествалул бюхъурдугу итххяхлай бия.
Спектакльданул яла хъунмур тIайлабацIу хьуссар Мауглил жанавардания Инсаннайнсса ххуллу.
Ахиргу, дуркIуна премьера бихьлахьисса кьини. ОьрчIан спектакль махъ бакъа ххуй бивзуна. Ва произведениялухлу К. М. фон Вебердул цIанийсса цалчинмур Дунияллул халкьуннал конкурсрай Ширвани Чаллаев лайкь хьуссар яла лараймур премиялун «За создание выдающегося музыкально-театрального произведения для детей». Конкурсрал шартIирдайн бувну, премьералия махъ жун багьлай бия спектакль Каккан бан дунияллийцири музыкалул театрдаву ца яла цIа ларгсса Дрезденнал опералул театрдануву хъанахъисса хъуннасса дунияллул халкьуннал фестивальданий. ДакIния къалагай га кьини­сса асарду – къищусса архитектура, цайми театрдаву дакъа­сса акустика, яла-ялагу – тамашачитал. Спектакль байбишин цукссагу хьхьичI театрданучIан букIлан бивкIуна цаннияр ца чIюлусса лимузинну. ОьрчIру залдануву бувагу бакъая. Лагмава фракру, смокингру, мехру, чIюлусса гьухъри лавхсса тамашачитал. Бирлиянтирдал пIяй-ххайрдал яру ласун буллай бия. «Хьувивав «Мауглилуща», ц­уппагу оьрус мазрай бихьлахьи­сса, ва даражалул тамашачи хIайран уван? Ци хьувивав шикку?!» — пик­рирдай бура на.
Гьаз дунни пардав, тIутIи дунни макьан, сахIналийн увккунни чIивисса оьрчI.
Шайссар ца-ца чIумал театрдануву караматсса ишру. «Маугли» опералул премьера лайкьсса даражалий хьуссар Москавлив. Амма жул нигь дия дрезденнал угьара­сса фешенебельный­сса тамашачинан ххуй бизавивав мюрщи оьрчIан хас бувсса жулва опера, биян бавивав гайннайн цукунчIавссавагу асар «Мауглилул» тIисса. Опера къуртал шайхтурив жулва тIайлабацIулийн вих хьун къабюхълай ливчIру. Къув-аьслил чIунияргу ягинъя тамашачитурал хъатру. Чаннал пар тIий дия симанну. Гукун ххаришиву дайгьин къабюхълахъисса тамашачи ххал хьуну бакъара. Мяйжаннугу, шай­сса бур оьрмулуву къахьун бю­хъаймургу. Хьуссар жул оьрмулувугу мукунсса иш «Маугли» опералий, Ширвани Чаллаевлул караматсса музыкалул биялалийну.
Роксана Сац,
Наталия Сацлул цIанийсса Москавуллал паччахIлугърал академический ОьрчIал музыкалул театрданул литературно-педагогический отделданул хъунмур

Ширвани Чаллаевлул операртту жул театрданунсса экзаменнуну хьуссар

-Театр зий байбивхьуну цалчинсса шиннардий жу бихьлай бивкIру жула ватанлувтурал произведенияртту. СахIналийн буккан барду хьхьичIва тIалавну къабивкIсса чIявусса операртту. Жу зий бивкIру ХХ-мур ттуршукулул классиктуращал: Прокофьевлущал, Стравинскийщал ва Шостаковичлущал. ЖучIан цала произведенияртту лавсун бучIайва машгьурсса композитортал: Хренников, Щедрин, Шинитка, Денисов, Вайнберг, Богословский, Холминов, Таривердиев, Чайковский.
Жул театрданущалсса творческий союзраву гьуртту хъанай ­уссия Дагъусттаннал композитор Ширвани Чаллаевгу. Ванал Да­гъусттаннал чичу Апанни Къапиевлул аьрайсса чичрурду гьануну ларсун чивчусса «Читая дневники поэта» тIисса миллатрал аслишиву дусса опера бивхьуссар жул театрданул сценалий.
МукIру хъанай ура, цIанакул жу чансса ят бувцун буру жула оьрмулийн багьайсса ттизаманнул произведенияртту бишаврия. Махъсса шиннардий жун асар хъанай бия творчествалул ккаши ва мякьну буссияв мукунсса даврих. Вана Ширвани Чаллаевлул чивчунни жула оьр­мулия бусласи­сса опера, испаннал шаэр ва драматург Федерико Гарсиа Лоркал произведениярттаясса «Кровавая свадьба». Чивчунни хасну жул театрданун цIа куну. Жун му бусрав хьунни. Опера жун ххуй бивзунни гьарцагу чулуха. Цалчин, ва бур ттизаманнул опера. КIилчингу, ва бавхIуну бур жущала дусшиву ду­сса халкьуннал магьирлугърацIун. Мунил жул театр авадан бунни.
На ххари уллай ура спектакль миллатрал асарду аьч буллали­сса бушиврул. Опера асар хъанай бур, баллай бур текстравугу, ихтилатравугу, балайлувугу. Му ляличIишивугу дур ссигъасса, усттарсса, кIункIу уллалисса. Мукунсса миллатрал хасшивурттайн мютIи хьун бювхъунни оьруснал актертураща. Мунилгу на хъинну ххари уллай ура. Мунихлуну ххирар ттун ва спектакль. Ва багьссар театрданул яла хьхьичIунми постановкардавун. Мунин лавай­сса кьимат бивщунни билаятрал хьхьичIунсса театрал ва магьирлугърал критиктурал. Жул театрданунгу ва опера хьуссар творчествалул экзаменну.
Ва произведениялул музыкалун тIалавну ляркъуну дия цанна гъансса хасият. Опералуву ккав­ккунни цайми халкь, цамур миллат, ххуйсса ва ххаллилсса, ттуйн ца караматсса асар биян буллалисса ва ттул дакIниву творчество чантI учин дуллалисса. Му хъиннува агьамссар хIакьину, инсантурал дянивсса арардаву, му так цамур миллатрал ва диндалул ушиву хIисавравун ласлай, вахIшийшиву ялун личлачисса ахIмакьсса чIумал. Укун­сса чIуннардий хъиннува бюхттул­ссар чичул, композиторнал, драматургнал кьимат. Му цува, мунал творчество, пикрирду, аькьил­шиву ва гениальность ца театрданун, ца миллатран бакъарча аьркинсса, щалла инсаниятранни, жува инсанталну личIаншиврул. ЧIявумиллатру бусса Аьрасатнал халкьуннан му хъиннува аьркинссар. Опералул тIайлабацIу ялагу ссаву бур учирча, му жунма цинявннанмагу асар шавриву, бувчIавриву бур.
Борис Покровский,
Москавуллал паччахIлугърал академический камерный музыкалул театрданул каялувчи, СССР-данул халкьуннал артист. 2006 шин. «Кровавая свадьба» опералул премьералия махъ

Чаллаевлущал хьунаавкьусса кьини ттул ца яла талихI бусса кьинир

Ликъаххайсса аьш ттул дакI­ниву кьариртсса Ширванинал авторский концертрай кIул хьуна чIярусса шиннардил хьхьичIва мунал чивчуну бушиву Лев Толстойл «Хаджи-Мурат» тIисса повестьрая­сса опера. ХIакьину, политикалул тIуркIу сававну, Ккав­кказнал аьрщарай чIявусса оь экьибутIлатIисса чIумал, дакьаврий яхьун бюхъантIишиву жунма дакIнийн бутан оьв­тIутIисса макьан ва Толстойл махъ тамашачитуран баян бансса проектраха зий айивхьуссия. Му проект дузрайн буккан бангу бювхъуна хъинну лавайсса даражалий. Тания шихунай уртакьну зий ура Ширвани Чаллаевлущал.
Лакрал миллат пахрулий бикIан аьркинссар Ширвани Чаллаевлуя. Ва ур, ца Дагъусттаннал ва Аьрасатнал акъассагу, щаллагу дунияллул ттизаманнул яла хьхьичIунми композитортуравасса ца. Хъунисса оперардал, симфониялул произведениярттал автор. Лакрал культура щаллагу дунияллун ва машгьур дуллай ур тактичнайну, оьрусналмур культуралулгу хIурмат буну. Ккавкказнал музыкалул чIу хъунмасса билаятрал чIурдацIун бахIинсса бюхъу гьарцаннан буллуну бакъассар.
Л. Н. Толстойл цIанийсса паччахIлугърал музейрал директор Виталий Ремизов
Халкьуннайн хаин къавхьусса композитор

Ттул арулчинсса шинни Н. Сацлул цIанийсса Москавуллал паччахIлугърал оьрчIал музыкалул театрдануву дирижер-постановщикну зий «Маугли» опералуха зий айишиннин ттун къабавссия Ширвани Чаллаевлул музыка. Опералун чивчусса музыка ттун хъинну ххуй бивзуна. Гихунай тIурча мунал цинявппа произведениярттах вичIи къадирхьуну ацIан къавхьуна ттуща. Ванал музыка бур цайва бияла бакъа вичIидирхьуманал аькьлу-кIулшилувун куртIну бу­ххайсса. Ттунма ссайну ххуй бизай учирча Ширвани Чаллаевлул музыка — мунал авадансса творчествалуву аьч хъанай дур композиторнал цала халкьуннайнгу, цайннагу дакI тIайлашиву. Му бухьун­ссар композитор гьар заманалуву итталу ва тIалавну ушиврул хъунмур тIайлабацIугу.
Константин Хватынец

Гьар заманалий тIалавсса музыка

Ширвани Чаллаев ттун кIулли чIивинияцIава – Н. Сацлул театрдануву гениальныйсса композиторнал хха­ллилсса музыкалий хъуна хьу­ссара на. Сайки кьура шинал лажиндарай, ванал опера «Маугли» репертуардануву буссаксса хIаллай 1200 инсан лагай­сса зал щяикIансса кIану бакъа бувцIуну бикIайссия. Зува пикри бара, ваксса чIумул дянив опера цимил бивхьухьунссар? Цимил биширчагу, тамашачитал нех дирхьуну найнма бикIайва театр­данувун. Цаппара шинну ларгуна опера театрданул сахIналий къабивхьуну, мугу роллу дургьуну бивкIсса цаппара актертал бугьара хьуну бушиврийн бувну. Му ппурттувугу ттун асар хьуна ттизаманнун тIалавсса мюзикл­лахнияр тамашачитал хIакьсса опералух цуксса мякьну буссарив. Цанчирча ми ттухь цIухлайнма бикIайва оьрчIансса бунияласса спектакль бакъассарив театрданул репертуардануву тIий. Амма театрданул каялувчитал ца ляълужавгьар кунма ябуллай бивкIссар опера. Му цIунил бишинсса лахIзалух ссавур дакъа ялугьлай бивкIссар театрданул каялувчиталгу, актерталгу, цинявппа зузалтгу. Му лахIза бучIантIишиврийн тIурча жул цукунчIавсса щак бакъа­ссия, цанчирча тамашачитал муния цIухлайсса-цIухлайнма бикIайва.
Опера цIунил бивхьу­сса кьинигу жул театрданун хьхьи­чIара кунна хъуннасса байранну хьуссар. Опера къуртал хьунцIа на личIлулну уруглай ивкIра актертурахгу, тамашачитурахгу. ХIайранну ливчIра кIивайннайвагу – шавкьиравун лавгсса актертурайгу, ясир був­сса кунма буруглагисса тамашачитурайгу. ЛяваличIисса чани, ляваличIисса гьава, ляваличIисса асарду! Цимирагу шинал хьхьичI­ва кунма!
Дунияллий чансса бакъассар композитортал, цила чIумал сий дуну машгьурну бивкIхьурчагу, шинну лагайхту цIарду хъамарадиртсса. Ширвани Чаллаев тIурча ур гьар заманалуву итталусса композитор. Ца аьрасатналсса дакъагу, дунияллулла магьирлугъ мяъна-мурад дакъасса рок, реп, поп журардал музыкалул щатIуву гьузузисса ппурттувугу ваналмур музыка ххину-ххишалану тIалавну бур. НахIакьдан бакъахьунссар аьрасатнал хьхьичIунсса музыкалул пишакартурал Ширвани Чаллаев билаят­рал магьирлугъраву мархри цIакь хьусса мурхьиран хIисав айсса.
ХIат-хIисав дакъа ххарину ура хIакьину ттущава театрданул репертуар ххал дан бувкIсса тамашачитурахь: «Жул театрдануву бихьлай буссар ххаллилсса композитор Ширвани Чаллаевлул опера «Маугли». Бухьхьияра!» — учинсса сант цIунилгу дирияврихлу, учIаврия хIайп учинсса къауккантIишиврий дакI дарцIуну.
Ца-кIива махъ учинна Ширвани Чаллаевлул инсанналми хасиятир­ттаягу. «Мяърипатрал ва инсаншиврул зунтту» учивияв на мунайн.
На хъисвагу махIаттал къахьувияв дунияллул даражалул композитор вайминнах лахъния уруглай, ятну авцIуну ухьурча. Амма Ширвани Чаллаевлул ми барурду найбунува лекьан бай. Театрданул циняв­ппагу зузалтращалсса ванал дяниялу ичIуванащал куннасса дуссар. Ширвани Чаллаев жул театрданул ма­ччасса инсанни. Жу дазу-зума дакъа ххарину буру жунма ванащал зун нясив шаврия ва чIа тIий буру ванан ттигу цимигу шинай жущала уртакьну зунсса цIуллушиву ва цIу-цIусса тIайлабацIуртту.
Дмитрий Дьяченко,
Н. Сацлул цIанийсса
Москавуллал паччахIлугърал ОьрчIал музыкалул
театр­данул
администрациялул зузала

Дунияллул магьирлугъраву
Ккавкказ чивчуссар

Ширвани ттул ччяния­цIа­васса дусри. Ва ттун кIулли ттизаманнул ххаллилсса композиторшиврийгу, щихачIав къалавхьхьу­сса лавайсса пагьмулул балайчишиврийгу. Испаннал шаэр ва драматург Лоркал шеърирдан ва пьесалун опера чивчуну Ширванинал Ккавкказ чаннайн буккан бувссар, Дагъус­ттангу, Ккавкказгу цал уттигу дунияллул магьирлугъраву чивчуссар. Шекспирдул ва Деккинсоннул произведениярттан музыка чивчуну, Ккавкказнавун дунияллул поэзия ласаврийну хьхьичIвагу чивчуссар Ширванинал Ккавкказ дунияллул контексраву.
Наум Клейман, ПаччахIлугърал хъунмур
кинорал музейрал директор
ХIадур бувссар
Зулайхат Тахакьаевал