АьбдулхIамидлул арс Исубуттаев МахIаммад
Къашавай хъунма хIалгу къабувну, аьпалувух ивхьунни ГьунчIукьатIрал шяраву учительну оьрмулухун зий ивкIсса Исубуттаев АьбдулхIамидлул ва Багъдагуллул арс МахIаммад.
МахIаммад увну ур 1958 шинал ГьунчIукьатIув. Школагу буттал шяраву къуртал бувну, армиягу лавхъун, пожарный училищагу къуртал бувну, зий ивкIссар цIу лещан дувуну. Давурттая мюнпат, хайр чан хьувкун, кулпат, оьрчIру ябан, зун ивкIссар «Югстальконструкциялий» сварщикну. Чув, ци даврий зурчагу, МахIаммад ия иминсса, инсантуращал хIал бавкьусса, паракьатсса адамина. Ци банссар, къашавайсса баяннин аьпалувух ивхьунни МахIаммад, жагьилсса кулпатгу, буттал хъирив хъапа тIисса душругу кьабивтун.
МахIаммадлул къумасса бивкIулул кьурчIишиву кIидачIлай, жижара буллай буру ниттихь Багъдагуллухь, кулпатрахь ПатIиматлухь, шанмагу душнихь, уссурваврахь, ссихь, куявтурахь, минная бивзминнахь, махъсса цинявппагу гъан-маччанахь, щалвагу агьлу-авладрахь. Ганан къабуллумур оьрмулул бутIа душваран, душнил оьрчIан ххи бувну лякъиннав. МахIаммадлул гьав нурданул дуцIиннав, алжаннул ххари аннав. Амин!
ГьунчIукьатIрал
ва КIямашрал жямат
МахIаммадлул арс Муртаев Аздар
Оьрмулул 65 шинаву аьпалухьхьун лавгунни ххаллилсса зунтталчу, яхI-къирият ххисса ва дакI-аьмал авадансса инсан, ЧIяйннал шяраватусса МахIаммадлул арс Муртаев Аздар.
Аздар увну ур 1951-ку шинал Туркманнаву Чаржав шагьрулий, ЧIяйннал шяраватусса МахIаммадлул ва ПатIиматлул къушлий. Тиккува дянивмур даражалул школагу бувккуну, лавгун ур армиялийн. Буржгу лавхъун, зана хьуну мукьах увххун ур дуклан Ашхабадрайсса Туркманнал паччахIлугърал политехникалул институтрал строительствалул факультетрайн. Мугу ххаллилну къуртал бувну, цIунилгу кIура авну цува хъуна хьусса шагьрулийн, зун ивкIун ур цала пишалий, мастерная, прорабная айивхьуну, цува заллусса «Монолит» тIисса фирмалул генеральный директорнайн ияннин. Му фирма ккалли хъанайгу диркIун дур Туркманнал строительствалул бизнесрал дунияллий ца яла хъуннамурну, цил лагрулий зий ивкIун ур 300-нния ливчусса инсантал, миннавух – биялсса дагъусттанлувталгу.
Ванан дуллуну дур «Туркман республикалул лайкь хьусса строитель» тIисса хьхьичIунсса цIагу.
Аздар ахиратрал шаврил пашманшивугу кIидачIлай, дакIнийхтунусса жижара буллай буру уссихь Зубаиллухь, ссурваврахь Аьйшатлухь ва Ханзадахь, махъсса цинявппагу гъан-маччаминнахь.
Цал рухI бигьаний дишиннав, бунагьирттал аьпа баннав!
ЧIяйннал жяматрал цIанияту Багъатиров Сяид
АьбдурахIманнул арс Тумалаев Нариман
Октябрь зурул ахирданий, цIуцIаврища ххассал къавхьуну, дунияллия лавгунни СумбатIуллал шяраватусса АьбдурахIманнул арс Тумалаев Нариман.
Увну ур Нариман 1960 шинал октябрь зуруй. СумбатIлив мяйра шинал школагу къуртал бувну, дуклан увхссар строительтал хIадур байсса техникумравун. Аьралий бурж бартбивгьуну мукьах зий айивхьуссар муххал ххуллул даврий. Къуртал бувссар муххал ххуллул инженертал хIадур бувайсса Ростовуллал институт (РИИЖТ), уттисса РГУПС. Нариман цалла даву ххуйну кIулсса, захIмат ххирасса, халкьуннащал хIал бавкьусса инсан уссия. Муххал ххуллул цIанихсса пишакартал хIисаврайсса СумбатIуллал жяматравух вайнналмур кулпатрал бутIагу буссар муххал ххуллул даву лавайсса даражалийн гьаз дувавриву.
Нариман дунияллия лагаврил кьурчIишиву кIидачIлай, жижара буллай буру кулпатрахь Жулианахь, душваврахь Этерихь, Саидахь, арснахь Тамерланнухь, уссихь Нуруттиннухь, буттарссу КIукIухь, ниттиуссихь, ниттилссурваврахь, цинявгу гъан-маччацириннахь. Нариманнул гьаттай нур дизаннав, алжаннул ххари уваннав, ванан къабуллумур оьрмулул бутIа наслулун ххи бувну лякъиннав!
СумбатIуллал жямат
Сиражуттиннул душ Оьмарова АтIа
Вай гьантрай, къашавай хьуну лахъигу къалавгун, оьрмулул 86 шинаву дунияллия лавгунни Къяннал шяраватусса ххаллилсса хъамитайпа, Сиражуттиннул душ Оьмарова АтIа.
АтIа МахIачкъалалив бизаннин колхозрал давурттай зий бивкIун бур. Бивзун мукьах къатта-къушлилсса ва оьрчIалссагу буллай, личIи-личIисса давурттай зий бивкIун бур. Фронтовик МахIаммадлул ва АтIа-бавал ужагъ чIявуссаннан дакI тIиртIуну хъамал кьамул бувайсса, узданну ссупра тIитIайсса ужагъну хьуссар. АтIа- бава бия, дакI-аьмал хъиншивруцIун, хасиятрал хIалимшивруцIун, усттарну дукра дувайсса инсан. Ванил дукралул тIин хIакьинусса кьинигу дакIнийссар ваничIа хъамалу хьуминнан. АтIа-бава ххирассия Къяннал жяматран, маслихIат ккаккан, цIухху-бусу буван ваничIан буххайссия. Ва бия мюрщими ххира буван, хъуниминнаха хIурмат буван гъирасса, хъиншиву дуван чялишнувасса инсан. Ванил хIарачат бувайва гьарманах аякьа дуван, гьарманай цIими буван, дакI хьунмур бусан. Цилами ряхва оьрчIалссагу бувну, цайминнахагу циламиннаха кунна аякьа дуван.
АтIа-бава дунияллия лагаврил кьурчIишиву кIидачIлай, жижара буллай буру ванил арсваврахь, душваврахь, миннал наслулухь, гъан-маччацириннахь. АтIа-баван къабуллумур оьрмулул бутIа ванил наслулун ххибувну лякъиннав, цув Алжаннул ххари буваннав, гьаттай нур дизаннав!
Къяннал жямат
ХIусайнажинал арс МахIаммадов МахIаммадаьли
Хар-хавар бакъа оьрмулул 67 шинаву ахиратрал хьунни хъинну хъунмасса бутIа инсаншиврул, дакIнил хъиншиврул буллусса, чIявучин мяйжаннугу бусравсса, дустал, гьалмахтал гьарзасса ххаллилсса зунтталчу, лаккучу, ХIусайнажинал арс МахIаммадов МахIаммадаьли.
МахIаммадаьли увну ур ЧукIуннал шяраву ХIусайнажинал ва Таибатлул кулпатраву 1949-ку шинал, Аьралий бурж лавхъун махъ, зий ивкIссар личIи-личIисса къуллугъирттай: административный хозяйствалул отделданул хъунаману, экспертну «Союзэлектромашрай», отделданул начальникну.
Махъсса шиннардий зий уссия щинал щаллу баврил отделданул инспекторну, МахIачкъалалив «Водоканалданий» отделданул начальникну. Махъсса шиннардий зий уссия
«Герцрай» хьхьичIунсса зузалану.
Чув зий унугу, МахIаммадаьлил ккаккан бувссар цува хъинну грамотнайсса зузала ушиву. Мунияту бусравнугу икIайва цащала архIал зузиминнан, жяматран, цува кIулминнан. Мунищала ия инсантуращал авкьусса, хъярч-махсара бан кIулсса, дакI-аьмал хъинсса инсангу.
МахIаммадаьлил бивкIулул кьурчIишиву кIидачIлай, жижара буллай буру кулпатрахь, арснахь Заурдухь, душнихь, ссихь, уссурваврахь Аьбдуллухь, Муслимлухь, гъан-маччанахь, махъсса щалагу агьлу-авладрахь. Цал гьав нурданул дуцIиннав, алжаннул къапурду тIивтIуну лякъиннав. Махънал оьрмурдай барачат бишиннав. Амин!
ЧукIуннал, Кьубиял
жяматрал цIания
НякIучиев Аьбдулкьадир
Чупаннул арс Чупанов Зайнуттин
Сентяб
рь зурул ахирданий хархавар бакъасса бивкIулул оьрмулул 81 шинаву жуятува личIи унни ххишала акъа ххаллилсса, узданшиврул увцIусса чув, Вихьуллал шяраватусса Чупанов Зайнуттин Чупаннул арс.
Зайнуттин ия чаннасса симан, бювхъусса чурх бусса, гьарца чулуха итххявхсса, чIявучин бусравсса инсан.
Ччянива ппугу ивкIуну, ятинну ливчIун, цала хIарачатрайну цал Щурагьиял педучилище, яла Дагъусттаннал паччахIлугърал университетрал тарихрал факультетгу къуртал бувну, буттал шяраву школалий учительну, яла чIярусса шиннардий директорну зий уссия. Зайнуттиннул дуллуссар чIявусса оьрчIан лахъсса даражалийсса кIулшивугу, ххуйсса тарбиягу. Хъунмасса захIмат бивхьуссар школалий аьркинсса шартIру дузал дуллай. Ванал даврин лахъсса кьимат бивщуссар хIукуматрал, лайкь хьуссар чIярусса бахшиширттан.
Зайнуттин ия ххуйсса лас, ппу ва гьарца чулуха мяърипат ларайсса инсан. КIулнал дакIурдиву ва личIантIиссар чаннану, яргну.
Хъуннасса кьурчIишиву кIидачIлай буру кулпатрахь, оьрчIахь, гъан-маччанахь.
Зайнуттиннул рухI хъинний дишиннав, гьав нурданул дуцIиннав.
Ванал оьрчIал оьрмурдай барачат бишиннав, Зайнуттиннул цIанин лайкьну оьрму бутаннав.
Вихьуллал жямат
ДакIнийхтуну хъуннасса кьурчIишиву кIидачIлай буру Ярославрал областьрайсса Дагъусттаннал диаспоралул хъунама Оьмаров Шяпинахь, ванал аьзизсса нину
АтIа
дунияллия лагаврийн бувну.
ПатIимат Рамазанова, Имара Саидова, дустал, гьалмахтал
ДакIнийхтуну кьурчIишивугу кIидачIлай, жижара буллай буру Адамов АьбдурахIманнухь ванал уссил кулпат
Валентина
аьпалухьхьун лагаврийн бувну. Махъминнал оьрмурдай барачат бишиннав. Алжаннул ххари баннав.
«Илчи» кказитрал коллектив
Хъуннасса кьурчIишиву кIидачIлай, жижара буллай буру Къапланов Шамсуттиннухь, ванал нину
Сагъират
ахиратрал шаврийн бувну.
Имандалий лавгун лякъиннав, рухI хъинний дишиннав. Махъцириннал оьрмурду лахъи баннав.
Дустал, гьалмахтал
ДакIнийхтунусса пашманшивугу кIидачIлай, жижара буллай буру жула даврил уртакь КIурухов ХIасаннухь, ванал аьзизсса уссу
Аьлихан
хар-хавар бакъасса бивкIулул жуятува батIул аврийн бувну. Цал бунагьирттал аьпа баннав, рухI бигьаний дишиннав.
«Илчи» кказитрал зузалт
