Ноябрьданул 23-нний ДГПУ-лул дагъусттаннал филологиялул факультетрай Дагъусттаннал халкьуннал шаэр Юсуп Хаппалаевлул 100 шинал юбилейран хасъсса элмийсса конференция хьунни.

З. АьбдурахIманова
Ванивух гьуртту хьунни филологиялул элмурдал доктор, ДНЦ РАН-далул ИИЯЛИ-рал литературалул отделданул хъунама элмулул зузала Сулайман АхIмадов, Дагъусттаннал халкьуннал чичу Ссугъури Увайсов, яруссаннал шаэр Зайналаьбид Макьсудов, Къизлардал райондалийсса Большеорешевскаллал школалиясса оьрус мазрал ва литературалул учитель, филологиялул элмурдал кандидат Ирбагьина ХIасанов, ДГУ-рал доцент, филологиялул элмурдал кандидат Ххазина Аминова, Юсуп Хаппалаевлул арс ва душ Аслан Хаппалаев ва Аьжа АьбдурахIманова. Мукунма шиккун бувкIун бия ДГПУ-рал ва ДГУ-рал преподавательтал, студентътал.
Конференция тIитIлай, ДГПУ-рал дагъусттаннал филологиялул факультетрал декан, филологиялул элмурдал кандидат Зайнаб Оьмаровал кIицI бувунни цан хъунмасса пахру бушиву укун цIаларгсса, хъуна­сса шаэрнал юбилей цал факультет­рай кIицI лаглай ва шаэрнал дагъусттаннал литературалуву бивхьусса захIмат дузрайн бу­ккан бан вания гихунмайгу цал хъунмасса хIарачат бантIишиву ниттил мазурдил факультетрай ккалаккисса студентътуращал архIал.
Хъирив профессор Сулайман АхIмадовлул шаэрнал оьр­мулул ва творчествалул ххуллурдая бувсунни ва кIицI бувунни Юсуп Хаппалаев хьхьичIва-хьхьичI ивкIшиву инсаншиву ххисса, чумартсса хасиятрал заллу. Хъинну Лакку кIанугу, жула тарихгу, жула багьу-бизугу ххирасса, жула миллатрал хасиятру, ххазинарду мугъаятну ябуллай бивкIминнавасса ца. Бувсунни ванал жула билаятрай ци чIунну дуркIун, къатIайлану къуццу буллалисса ци гуж-кашилул каялувчитал, къуллугъчитал ххи хьурчагу, Юсуп Хаппалаевлул мудангу миннахь кьянкьа­сса махъ учайсса бивкIшиву. Сулайман АхIмадовлул чIурчIав дурунни цангу, ялун бучIансса жагьилсса литературоведтурангу вания гихунмай Ю. Хаппалаевлул творчество ахттар даншиврул ттигу хъунмасса захIмат бишин багьантIишиву. Цанчирча шаэрнал творчество жунма ядигарну кьабивтсса литературалул хъунмасса хазналун ккаллийну тIий.
Конференциялул давриву гьуртту хьусса Ирбагьина ХIасановлул цала докладраву бувсунни оьруснал хъунасса шаэр Н. Некрасовлул ва Ю. Ха­ппалаевлул творчествардал тапаватшивурттая. Бувсунни Нек­расовлул творчествалул оьруснал литературалийн биян бувсса асардая ва хъирив дагъусттаннал литературалийнгу. Ва иширан хасъсса элмийсса давуртту ду­сса дур жула аьлимтал Р. Юсуповлул, З. Акавовлул, Г. Мусахановал ва цайминнал.
КIицI бувунни ванал Ю. Ха­ппалаевлул ляличIисса къулагъас диркIшиву жула миллатрал фольклорданух, вирттавран хасъсса лахъи балайрдах, бусалардах. Бувсунни, мукунма, шаэрнал цала шеърирдаву обществалуву цIурувкьюсса ци ма­съала гьаз барчагу, тIабиаьтрал ккаккиярттансса, бюхттулсса Лакку билаятрал ххуйшивриясса мукъурттинсса кIану гайннуву мудангу лякъайсса бивкIшиву.
Гихунмай махъру лавхъсса Ссугъури Увайсовлулгу, Зайналаьбид Макьсудовлулгу ва цайминналгу мукунма кIицI бувунни Ю. Хаппалаев хьхьичIва-хьхьичI ивкIшиву ххуйсса инсан, дугърисса лаккучу ва Ватан ххирасса хIакьсса дагъусттанчу.
Мукъурттил ва ихтилатир­ттал дяних ДГПУ-рал ва ДГУ-рал студентътурал, лакку мазрай бакъассагу, бувккунни дагъус­ттаннал вайми миллатирттал мазурдийн таржума бувсса Ю. Ха­ппалаевлул шеърирдугу.
Цала буттал цIа укун лахъа-хъунну ва хIурматрай дакIнийн рутаврихлу вузрал преподавательтурахь, студентътурахь ва шиккун увкIсса гьарнахь барчаллагь тIий, Юсуп Хаппалаевлул арс Аслан Хаппалаевлул ва душ Аьжа АьбдурахIмановалгу кIицI бувунни буттал цив хъуни бувшиву Ватан, Лакку билаят, ниттил маз ххирану. Нитти-буттал цанна дуллусса тарбия инсаниятрал яла агьамми, аьзизми гьанурдайсса душиву.
— Буттал жу мюрщиний чIяву ихтилатру къабайва. Байсса ихтилатгурив бикIайва кутIасса, амма бюххансса ва дакIний личIансса. Жун эбратран ца ганал бувтсса оьрму гьану чIалай бикIайва. Оьрмулувугу, творчествалувугу жул ппу ия цава-ца инсан. Дакъая хIиллакаршиву, ламмамшиву. Жунгу гиччава кIулссия, жува хIарачат къабарча, ва оьрмулуву буттал цIа ишла дуван жухьра цукунчIавсса ихтияр дакъашиву. Му жул кулпатравусса низамъя, — бувсунни профессор, «Энергетичесий колледж» АНО-рал директорну зузисса Аслан Хаппалаевлул.
«Зунттал хъами» журналданул жаваблувсса секретарьну зузисса Аьжа АьбдурахIмановалгу, конференциялул сакиншинначитурахь барчаллагь тIий, кIицI бувунни цув хъинну ххаришиву республикалул вузирдаву да­гъусттаннал миллатирттал мазурдил факультетру буну ва хъиннура хъуннасса ххаришиву жунна хьунтIишиву гьарцагу миллатрал отделение тIитIирча. Бувсунни, мукунма, ппу цан оьрмулул гьарцагу лахIзалуву эбратну ивкIшиву, хIакьинугу ххаллил­сса буттал аьпа ябувну цал тухум яхъанай бушиву.
Конференциялул ахирданий цинявннал цачIусса дакIний личIансса суратру рирщунни.