Ноябрьданул 14-нний ДР-лул БакIчи Рамазан АьбдуллатIипов хьунаавкьунни МахIачкъалалив къуллугърал аьрххилий увкIсса АьФ-лул Ухссавнил Ккавкказуллал иширттал министр Лев Кузнецовлущал.
Хъунасса хъамаличунащал аьла-ссалам бувну махъ Республикалул каялувчинал увкунни: «Ина региондалийн учIаву – бан-битанмур ккаккан бавур, балжисса масъалартту щаллу бавур. Мунияту жу вих муданма ялугьлай бикIару, жущала архIал агьамсса даву сакин дувансса инсаннах кунма. ХIакьину жува ххал бигьинну хъуннасса мяъна дусса, электроэнергетикалул ва электросетьрал комплексрал хIакъиравусса масъалартту. КIулсса куццуй, Дагъусттаннай хъунисса буржру хьуну бур. Ина жун кумаг бува хьхьичIвасса буржирдалсса буван ва аьмну энергетикалул комплексраву лябукку хьун бан».
Лев Кузнецовлул дакIнийн бувтунни хьхьичIмур кьини Аьрасатнал Президентнащал ххал бивгьуну бивкIшиву тIювалул-коммунал сетьрал тагьарданул ва электроэнергетикалул ва газрал тагьарданул масъалартту.
Лев Кузнецовлул тIимунийн бувну, агарда тарифру сакин шаврил мухIлу-хIин муштаринан дурчIлачIисса, цинявннан аьямсса дакъахьурча, тарифру тIайлану сакин бувсса бакъахьурча, региондалул лябуккулия гъалгъа тIун захIмат хьунтIиссар. Му агьамсса масъалар ва му ххал бигьинтIиссар цIана хьунтIисса совещаниялий. Цаппара кIанттурдаву хъин чулийсса дахханашивуртту дур, дур захIматшивурттугу, ми ца чулийн дуккан дуван аьркинни.
«Жулва мурад – система щалла ххуйну зуншиврул му бутIуву тIайласса, даву хьхьичIуннай дачин дансса мухIлу-хIин лякъавур», — увкунни Лев Кузнецовлул.
