Ноябрьданул 14-нний МахIачкъалалив АьФ-лул Ухссавнил Ккавкказуллал иширттал министр Лев Кузнецовлул ва Дагъусттаннал БакIчи Рамазан АьбдуллатIиповлул каялувшиврулу ххал бивгьунни республикалул ччуччиялул ва энергетикалул масъалартту.

Совещание тIитIлай, Лев Кузнецовлул бувсунни шинал ахирданий хьунтIисса АьФ-лул ХIукуматрал СКФО-рал социал-экономикалул лябуккулул масъаларттал хIакъиравусса комиссиялул заседаниялий ххал бигьин тIий бушиву му бутIуву хьусса буржру бухлаган баврил масъала.
«Га бутIувусса иширттал тагьарданул докладрал гьанулий хIукму хьуссар цаппара ведомстварттал цачIусса зузи группа сакин буван, мунивун буххантIиссар экономикалул ва гужирдал блок. Мунил задача хъанахъиссар хIакьину жува ххал бигьинтIисса масъалалуха зузаву, гьарца республикалун хасну ва щала СКФО-райгу. Мукунссава зузи группа округрал гьарца субъектрайгу сакин бан аьркинссар», — увкунни Аьрасатнал министрнал.
Лев Кузнецовлул мукунма бувсунни гьашину, 2015 шинах бурувгун, ххал бигьлагьисса бутIуву хIисав хьунсса дахханашивуртту хьуну душиву.
АьФ-лул энергетикалул министр­нал хъиривчу Вячеслав Кравченкол бувсмунийн бувну, Дагъусттаннай муштаринал электроэнергиялух багьа булаврил даража бур 77%, муштариная арцу ратIаву ялу-ялун гьарза хъанай дур. Мура чIумал республикалул сетевой компаниялий хъунмасса буржгу хьуну бур «МРСК Северного Кавказа» ПАО компаниярттан.
Дагъусттаннал электроэнергетиктурал хъунмур проблеману ишла бувсса энергоресурсирттахсса бурж личIлай бушиву тасттикь бувну, «МРСК Северного Кавказа» ПАО-рал гендиректор Юрий Зайцевлул увкунни: «Ва бутIуву салкьи хьуну бур тамансса проблемартту, му сияхIрал бакIрайгу бур ЖКХ-лул бутIа, мунил цаппара предприятиярттал бувагу къабулайсса бур харж бувсса токрахсса багьа».
ДР-лул ХIукуматрал Председательнал хъиривчу Шамил Исяевлул бувсунни сетьрал хозяйствалул реконструкциялул хIакъираву. «Агарда жува цIана сетирдал ремонтру къадулларча, бунияла­сса коллапс хьун бюхъайссар», — увкунни ганал.
Масъала ххал бигьаврил хIасиллу дуллай, Лев Кузнецовлул увкунни: «Жува цIакь барду зузалт­ран хасъсса масъалартту, ххал барду тарифру, утти жунма бувчIлай бур жува ца мазрай гъалгъа тIий бушиву. Жува биян аьркинссар ужулва мурадирттайн, жулла хъиривмур хьунабакьаву хьунтIиссар цамур куццуйсса, ихтилатгу цамур журалийссар бикIантIисса. Жу хIадурссару кумаг буллан, амма щихьчIав миннат къабулланну. Жу мукунманая личIи хьунну».