Ноябрьданул 15-нний Дагъусттаннал БакIчи Рамазан АьбдуллатIипов гьуртту хьунни МахIачкъалалив хьусса рес­публикалул налогирттал форумрай.

«Налогиярттал политика жула билаятрай хьун аьркинссар паччахIлугъ хьхьичIуннай шаврил стратегияну, ганил мюхчаншиврул гьануну. Налогру циняннал дуллан аьркинссар», — увкунни Р. АьбдуллатIиповлул.
Республикалул каялувчинал тIимунийн бувну, хIакьину налогру ратIавриву хъинчулийсса дахханашиву хьуну дур, му хъанахъиссар экономика «чаннайн дуккан даврил» хIасил. Микку гьурттуну бивкIссар Республикалул налогирттал къуллугъгу, Дагъусттаннал ХIукуматгу, ПаччахIлугърал финансирттал контрольданул къуллугъгу, ДР-лул Счетная палатагу, ихтиярду дуруччай органнугу. «Валовый продуктраву Дагъус­ттаннай налогру ратIаврил бур 6,3%. Мисал хIисаврай, СКФО-рай – 10-12% бур, АьФ-лий – 25-26%. Агана жущава бюхъарча му цифра 10-12% лахъан бан, жулва бюджет цамур куццуй­сса бикIантIиссар», — увкунни Р. АьбдуллатIиповлул.
Форумрай доклад буллали­сса ДР-лул ХIукуматрал Председательнал 1-ма хъиривчу Рамазан Аьлиевлул тIимунийн бувну, бюджетрал политика тIайла дацIан дурну дикIан аьркин­ссар Дагъусттаннал бюджетрал система цIакь даврийн. Мунин кумагну хьун аьркинссар доходрал база цIакь баву, налогру дучIайсса кIанттурду гьарза баву, налогирттал луртанну бюджетравун кIункIу даву.
ДР-лул Налогирттал къуллугърал управлениялул каялувчи Оьмахан Жабраиловлул бувсунни бюджетравун налогру дучIан даврил лагрулул хIакъираву. Гьашину 9 зуруй цинярда журалул налогру гьарза хьуну дур. ДукIумур шинах бурувгун, Аьрасатнал бюджетрал системалувун дучIаймур гьарза хьуну дур 18,5%, ягу 3,5 млрд. къурушрал. ДР-лул цачIусса бюджетравунсса (консомедированный бюджет) дучIия гьашину гьарза хьуну дур 12,8%, ягу 1 млрд. ва 897 млн. къурушрал. (СКФО-рай – 6,5%). ДукIумур шинах бурувгун, гьашину налогру ратIаву гьарза хьуну дур 3,31%. Октябрьданул 1-ннийнин налогру дучIан даву хьуну дур 99,1%.
Форумрай ихтилатру бунни ДР-лул ХIукуматрал Председатель Аьбдуссамад ХIамидовлул, Аьрасатнал ФПС-рал Контрольданул управлениялул хъунама Максим Чаликовлул ва цайминналгу.
Масъала ххал бигьаврил хIа­силлу дуллай, Рамазан Аьб­дуллатIиповлул кка­ккан бунни ГУП-ирдал ва МУП-ирдал давуртту низамрайн дуцин, республикалул датацияр­ттайн хъар шаву чан дуван, налогру ратIаву гьарза дуллан.