Ноябрьданул 10-нний Сергокъалалив хьунни ДР-лул БакIчи Рамазан АьбдуллатIипов гьурттусса «ТIиртIусса власть» проектрал ярглийсса телеэфир. Региондалул каялувчинал жавабру дуллунни ДР-лул БакIчинал сайтрайн бувкIсса суаллахьхьун, Рамазан АьбдуллатIиповлул инстограмравусса, фейсбукравусса ва мукунма журналистътурал буллусса суаллахьхьун.
ХIасан Аьдилов
«Жува хIакьину бавтIун буру Аьрасатнал МВД-лул зузалтрал байрандалул кьини, на аьла-ссалам буллай ура министр Аьбдурашид МахIаммадов бакIчину шиккун бувкIсса полицалул зузалтрахь», — увкунни АьвдуллатIиповлул.
Яла буллан бивкIунни проектрай гьуртту хьуминнал суаллу. Миннувасса ца бия МахIачкъалалив, Дарбантлив ва Каспийскалий, автобусругу зий бунува, транспортрал масъала захIматну личIлай бушиврул хIакъиравусса.
Мунин жаваб дуллай, Рамазан АьбдуллатIиповлул увкунни: «На республикалийн увкIсса чIумал, шикку иширайну дакъая жяматрансса транспорт. Мунияту жу, Дагъусттаннал хIукуматращал цачIу бюхъай-шай бувну, машан лавсъссар чIявусса автобусру. Му бакъассагу, жул сипталийну троллейбусрал ххуллу бувссар Каспийскалийн, чIал къавхьуну тихун занантIиссар троллейбус. Троллейбусрал ххуллу буллалиссар аэропортрайнгу чIал къавхьуну. Оптимизациялия хьусса 4 млрд. къурушрал дичинтIиссар жяматрансса транспорт гьарза дуван, медучрежденияртту буван ва цаймигу агьамсса социал объектру буван».
Хъиривмур суал бия приоритетсса проектирдал хIакъиравусса, ссайн бувкссар приоритетсса проектру зузи даврил масъала тIисса.
Му суалданун Рамазан АьбдуллатIиповлул укунсса жаваб дуллунни: «ХIакьинусса кьини мукунсса проектру дур 7, жу миннуха зий буру. Арцул щаллу къадурсса царагу проект дикIан къабюхъайссар. Проектру чансса дикIича, амма ми дузрайн дуккан дансса арцул щаллу дуллалиссар. Миннуйн чул бивщуну, чIалантIиссар Дагъусттаннал лябуккулул ххуллурду, республикалул гужми ва хьхьарами чуллу».
Хъиривмур суал бия ДР-лул Мюхчаншиврул Советрал жулла республикалий бугьлагьисса кIанттул хIакъиравусса.
Рамазан АьбдуллатIиповлул мунин жавабран увкусса куццуй, ДР-лул Мюхчаншиврул Совет хъинну агьамсса органни, му зий буссар щалла ихтиярду дуруччаврил системалущал хIала-гьурттуну. Мунил щаллу буллалиссар инсантурал мюхчаншивруцIун бавхIусса циняв масъалартту.
Суал бия оьрчIал садикру Республикалий биял хъанай бакъашиврул хIакъиравуссагу. Мунин жаваб дуллай, Рамазан АьбдуллатIиповлул укун увкунни: «Махъсса 3 шинал мутталий сайки 27000 оьрчIансса садикру бувссар, амма муниннин 20 шинал мутталий миннуяр чансса кIанттурду щаллу буллай бивкIссар. Жунма аьркинссар ттинияр тихунмайгу оьрчIансса садикру буллан. Дагъусттаннай 10-нния ливчусса садикру бувну бур цивппа заллуну. Му ххуйсса бизнесри».
Миннуяр ххишала суаллу бия МахIачкъалаллал портрал ялун бучIанмунил хIакъиравусса, «Наша партия – Дагестан» тIисса Агитациялул десантрал хIакъиравусса ва цаймигу. Ми циняв суаллахьхьун ДР-лул БакIчинал дуллунни гьарта-гьарзасса жавабру.
