Ноябрь зурул 10-нний Дагъусттаннал виваллил иширттал органнал зузалтрал кIицI ларгунни пишалул байран. Аьдатравун дагьсса куццуй, му кьинилун хас дурсса мероприятие дайдирхьунни къуллугърал бурж бартбигьлай жанну дуллусса полициялул зузалтрансса гьайкалданучIа тIутIив дишаврийну.
Андриана Аьбдуллаева
Шикку гьуртту хьунни ДР-лул БакIчи Рамазан АьбдуллатIипов ва ДР-лул ХIукуматрал вакилтал, гужирдал структурардал каялувчитал, полициялул зузалт.
ТIутIив дирхьуну махъ цинявппа бавтIунни Республикалул Виваллил иширттал министерствалул клубравун. Коллегахъул барча буллали­сса ва цала кьини хъун дан бувкIсса бусравсса хъамаллурахь барчаллагь тIисса ихтилат бунни ДР-лул виваллил иширттал министр, полициялул генерал-лейтенант Аьвдурашид МахIаммадовлул. Цала ихтилатраву ванал бувсунни Аьрасатнал ва Да­гъусттаннал полициялул цIанихсса тарихрая.
— Аьрасатнал виваллил ишир­ттал тарих цIакьну бавхIуну бур чIярусса захIматшивуртту ккавксса билаятрал тарихрацIун. Виваллил иширттал органну сакин хьуния шихунмай 200-нния лирчусса шиннардий Виваллил иширттал министерствалул багьайкун бартбигьлай бур цала агьаммур бурж: агьалинал мюхчаншиву дузал даву, жяматий­сса низам ва халкьуннал мурадру буруччаву.
Виваллил иширттал органнал зузалтрал къуллугърал бурж бартбигьлай цимилагу ккаккан дурссар цала къучагъшиву.
Аьрасатнал Виричунал цIакь лайкь дурссар виваллил ишир­ттал органнал 18 зузалал, 16 инсаннан дуллуссар му цIа аьпалул хьуну махъ.
Му бакъассагу, 1958 зузалан дуллуссар личIи-личIисса орденну ва медаллу. Ца гьашинусса шинал бюхттулсса наградалун лайкь хьуссар Дагъусттаннал виваллил иширттал органнал 3 зузала. Гьашинусса шинал къуллугърал бурж биттур буллай жанну дуллуну дур 16 зузалал. Миннавасса ца ур Аьра­сатнал Виричу тIисса бюхттул­сса цIа лайкь дурсса МахIаммад НурбахIандов, — увкунни Аьвдурашид МахIаммадовлул. Ванал тавакъю бунни ливтIуминнал аьпалун минутIрайсса пахъ багьаву дан.
Министрнал бувсунни Аьрасатнал виваллил иширттал органнаву ми сакин хьуния мукьах чIярусса дахханашивуртту хьушиву, амма мудангу зузалтрал цала къуллугърал бурж дакI марцIну бартбигьлай бивкIшиву.
Барчаллагь увкунни цала опытгу, кIулшивурттугу жагьилминнащал кIидачIлачIисса ветерантурахь, бигьа бакъасса пиша язи бувгьуну, цала къуллугърал буржру дакI марцIну бартбигьлагьисса хъаннихь.
— На барчаллагьрай ура жула зузалтрайн ларайсса пишакаршиврухлу, дакI марцIшиврухлу, республикалий низам ва паракьатшиву дуруччаву мурадрай миннал бихьлахьисса захIматрахлу.
Барчаллагьрай ура жула зузалт­рал кулпатирттайн, жула къуллугърал ляличIишиву бувчIлачIисса, — увкунни министрнал.
Ванал кIицI лавгунни хIакьину цанма жяматийсса низам дуруччаву ва тахсиркаршивурттащал талатаву бакъассагу, полициялул сий гьаз даврил цIанийгу зун багьлагьишиву. ХIарачат бан аьркинну бур агьалинал вихшала лайкь дан, дагъус­ттанлувтал, хаснува жагьилтал, диндалул агьлу, жяматийсса организациярду цаннан ца бувчIлансса, куннал чIарав ку бацIлансса шартIру дузал дан.
— Мукунсса цачIушиврийнур жущара республикалий паракьатшиву дуруччин хьунтIисса, — увкунни ихтилат къуртал буллай Аь. Ма­хIаммадовлул.
Хъирив полициялул зузалт байрандалущал барча бу­н­ни ДР-лул БакIчи Рамазан Аьб­дуллатIиповлул.
— Зул байран цинявппагу инсантуран агьамшиву дусса байранни. Жула оьрмулуву яла захIматмур хъар лархъун наними виваллил иширттал органнал зузалтри. Утти­гъанну Аьрасатнал Виричунал цIа лайкь дурсса МахIаммад НурбахIандовлул виричушивруву жунна азарахъул ихтиярду дуруччай органнал зузалтрал виричушиву чIалачIиссар. КIицI бан ччива, цумурцагу структуралуву каялувчинал бияла хъунмассар. Дагъусттаннал виваллил иширттал министр Аьвдурашид МахIаммадов кьянкьасса, цала даву кIулсса, лавайсса даражалул пишакар ур. Ванаща бювхъунни дунияллул терроризмалийн къарши бацIавриву цинявппагу дагъусттанлувтал уртакь бан, — увкунни Респуб­ликалул БакIчинал.
Зузалтрал ва спецконтингентрал цIания виваллил иширттал органнаву къуллугъ буллалими пишалул байрандалущал барча бунни Дагъусттаннал УФСИН-лул хъунама, виваллил службалул генерал-майор Муслим Даххаевлул.
— Ва службалуву къуллугъ буллай ивкIсса, виваллил иширттал органнаву савсъсса инсан хIисаврай, ттун хъиннува тIааьнну бур хIакьину зу барча бан. Дуссия чIунну Да­гъусттаннай инсантураща паракьатну кьатIув буккан къахъанахъи­сса. Зул хIарачатрайну нигьачIисса, захIматсса тагьар паракьат дан бювхъунни. Щалагу дунияллийх машгьур хьусса, «Зузияра, уссурвал» тIисса, МахIаммад НурбахIандовлул махъру зухь цачIун хьияра тIисса аманатну хьунни. Мудан зул чIарав бацIан хIадурну, зущал уртакьну жугу буссару. Зу тIайласса ххуллийн буцин жучIанма гьан бувми тIайла бацIан буллай хIарачат буллай бу­ссару, — увкунни М. Даххаевлул. Ванал бувсунни так ца гьашинусса шинал цала зузалтрал 800-ннийн бивсса информация буллушиву Виваллил иширттал органнайн, миннуйн бувну 100 тахсиркаршиву ашкара дуршиву. Виваллил иширттал органнал зузалт Аьрасатнал ФСБ-лул управлениялул каялувчитурал ва зузалтрал цIания барча бунни Дагъусттаннал УФСБ-лул хъунама Александр Мироновлулгу.
Вай цинярдагу ведомстварттал чулуха полициялул зузалтран личIи-личIисса бахшишру дунни. Цаппарассаннан дуллунни ХIурматрал грамотартту, цаппарассаннан – «Ихтиярду дуруччай органнал лайкьсса» зузала тIисса бусравсса цIарду, цаппарассаннангу – Республикалул БакIчинал цIаниясса Барчаллагьру ва цIа ку­сса ссятру. Къуллугърал бурж биттур буллай жанну дуллусса 2 зузалал кулпатиртта­хьхьун дуллунни квартиралул кIулли. Ва кьини бахшишру дуллунни 18 полициялул зузалан. Бахшишир­ттан лайкь хьунни 600-нния ливчу­сса зузалт.
Полициялул зузалтрал байран лахъа-хъун дунни машгьурсса «Лезгинка» ансамбльданул ва Дагъус­ттаннал эстрадалул артистурал.