Ноябрь зурул 3-нний МахIачкъалалив Дагъусттаннал кIулшивуртту гьаз даврил институтраву хьунни кIулшивуртту дулаврил идарарттал каялувчитуращалсса собрание. Микку ххал бивгьунни Аьрасатнал Президентнал май зуруй бувксса хIукмулул лагрулийсса, школалийн гьаннинсса оьрчIансса идарарттай зузисса пишакартурал харжирдан хас бувсса масъалартту.
И. Саидова
Собраниялул даву дайдихьлай, ДР-лул ХIукуматрал Председательнал цалчинма хъиривчу Анатолий Карибовлул бувсунни 2013 шиная шихунмай республикалийсса педагогтурал харжру 35,1% лахъ хьушиву. ХIакьинусса кьини педагогтурал дянивсса харж бур 14 774 къуруш.
Анатолий Карибовлул личIинува кIицI лавгунни ххишаласса кIулшивуртту дуллалисса идарарттал зузалтрал харжирдал хIакъиравусса масъалартту.
— Ххишаласса кIулшивуртту дулайсса идарарттай дуллай буссар оптимизациярду. Гьай-гьай, ва даву, цуксса хIайпнугу, дан багьлагьисса дур. ЧIявуми ва журалул идарартту бур даврил хIасиллу чIалачIи къадуллалисса. Масалдаран, тренертал ва педагогтал чIявусса бунагу, дурсса даврил хIасиллу дакъасса. Мунийн бувну вай укунсса иширтталгу педагогтурал харжирдайн щавщи биян буллалиссар. Хъинну лащинсса харжру бур Южно-Сухокумскалийсса, Буйнакскалийсса, МахIарамккантуллал ва Ахъушиял районнал муниципалитетирдайсса ххишаласса кIулшивуртту дулаврил идарарттай зузисса педагогтурал, — увкунни Карибовлул.
Ва батIаврий гьаз бунни оьрчIру садикирттал дузал баврил хIакъиравусса масъаларттугу. Анатолий Карибовлул кIицI лавгунни Дагъусттаннай, цикссагу цIусса садикру тIивтIуну бунагу, ирглий бавцIусса оьрчIал аьдад чан хьуну дакъашиву.
— ХIакьинусса кьини Дагъусттаннай 19 азарва оьрчI бур садикирттайн занансса оьрчIал сияхIрайн лахъан бувсса. Махъсса 3 шинал лажиндарай республикалий 89 садик цIуну бувну бунувагу, мигу биял хъанай бакъар. ОьрчIру садикирттал дузал баву мурадрай, хIукму бувну буссия гьарица школалий садик хIисаврайсса, оьрчIру кьамул буллансса группа тIитIинсса. Амма ва масъалагу щаллу бан къавхьунни, мунияту садикрайн занантIисса оьрчIал сияхIгу чан дуван бюхълай бакъар, — увкунни ванал.
Анатолий Карибовлул ва батIаврий муниципал идарарттал каялувчитурая тIалав бунни ятинсса ва урганма акъа ливчIсса оьрчIру къатта-къушлил дузал баврил хIакъиравусса масъалартту анаварну щаллу баву.
ДР-лул кIулшивуртту дулаврил ва элмулул министрнал цалчинма хъиривчу Ширали Аьлиевлул бювкью-аьй дунни АьФ-лул Президент Владимир Путиннул «Май зуруй бувсса хIукмурду» щаллу къабаврил хIакъираву.
— Жунма цинявннан кIулну бикIан аьркинссар «Май зуруй бувсса хIукмурдал» хIакъираву чIал къавхьуну жаваб дулун аьркиншиву. ХьхьичIва-хьхьичI миннул жаваб дулун аьркинссар муниципал идарарттал хъуниминнан. ХIакьину жучIанна дирсса хIасиллайн бувну, бувчIлай бур цаппара муниципалитетирттал каялувчитурал КIулшивуртту дулаврил управлениялул хъунимину хьхьарасса пишакартал бивтун бушиву. Министрналгу, ттул коллегахъалгу бувсса маслихIатру муниципалитетирттал хъуниминнал ва КIулшивуртту дулаврил управлениялул хъуниминнал къулагъас къадурну бивтунни. ГьарицанначIан жу цимилагу гьан бувссия маслихIатру буллалисса чагъарду, ххишаласса кIулшивуртту дулайсса идарарттал оптимизациялул хIакъиравуссагу. Микку бувчIин бувну буссия оптимизация цуксса ва цукун дан аьркинссарив, му масъала щаллу бансса арцу ча ласунтIиссарив ва цукунсса чаран лякъин аьркинссарив кIивагу хIукму архIал щаллу бансса. Цалчин, цинявппа оьрчIру щаллу бан аьркинссар школалийн гьаннинсса кIулшивуртту ласайсса идарарттал, — увкунни Ширали Аьлиевлул.
Ванал бусласимунийн бувну, республикалул так ца муниципал сакиншиннарал щаллу бувну бур цинявпагу оьрчIру садикирттал. Садикирттал оьрчIру щаллу баврил хIакъиравусса «майрай бувксса» Аьрасатнал Президентнал хIукму дузрайн буккан бувсса ва цинявннан эбратсса хъанай дур Лакрал район. Вайннал школалийн гьаннинсса кIулшивуртту дулайсса идарарттал щаллу бувну бур къутаннайсса школардай дуклакисса оьрчIругума, хIатта ми Къизилюртуллал, Хасавюртуллал районнайн багьлагьисса бунагу. Лакрал райондалий цила багьайкун ва масъалалуха зий бивкIун тIийри хIакьину вайнначIа укунсса ккаккиярттугу хьусса, — тIий ур Ширали Аьлиев.
Совещаниелул жям дуллай, Анатолий Карибовлул районнал циняв каялувчитурайн, КIулшивуртту дулаврил ва Финансирттал управлениярттайн тапшур бунни харжирдал хIакъиравусса АьФ-лул Президентнал майрай бувксса хIукму щаллу бансса чаран лякъин.
