ЦIуссаккуллал 1-мур школалий хьунни райондалул хъуними вожатыйтурал семинар. Семинарданий ДПШ-лул директор Гаппаева Пакият МахIаммадовнал бувсунни хъунмур вожатый педагог хIисаврай сакиншинначи, каялувчи ва тарбиячи хъанахъишиву.

— Педагогтурал жура-журасса пишардаву вожатыйнал пиша хъанахъиссар ляличIисса ва хъуннасса агьамшиву дусса. Вожатыная дуссар хъунисса ва чIярусса тIалавшиннарду ялун нанисса ник тарбия давриву. Мунал аьркинссар оьрчIащал дуллалисса даву кIанийн дагьан дурну, оьрчIавун творчествалуха зунсса гъира бутлай дуллан. Вожатый цувагу икIан аьркинссар за кIулсса ва даврил опыт бусса педагог. Так мукунминнащар оьрчIал коллективращал бюхъу-гьунар буну зунгу бюхъантIисса, — увкунни Пакият МахIаммадовнал.
ЦIуссамехельтIиял школалул хъунмур вожатая З. МахIам­мадовал совещаниялий був­сса ихтилат бия «Об использовании современных педагогических технологий в работе старшего вожатого» тIисса темалийсса. Ванил ихтилатраву кIицI лавгунни уттизаманнул информациялул технологияр­ттал тIалавшиннардайн бувну, давриву чялишну ишла дуллан аьркиншиву информациялул ва компьютерданул технологияртту. Цила ихтилатраву чIурчIав дунни вай компьютердануцIун дархIусса цIушиннардащал оьрчIал цIуллу-сагъшиврун зарал къахьуншиврул, ми ккаккан дурсса чIумуй бакъа зун къабитан аьркиншиву.
ЦIуссалакрал 1-мур школалул хъунмур вожатый З. ХIа­биевал бувсунни оьрчIал дарсирдая махъсса чIун ишла дуллалисса куццуя.
Райондалул семинарданул лагрулий 4-мур классраву дирхьунни «Герои, шагнувшие в бессмертие» тIисса оьрчIру Ватан ххирану тарбия баврин хас дур­сса дарс. Хъунмур вожатый М. Рамазановал оьрчIащал архIал лавайсса даражалий хIадур дурну дия ва мероприятие. ЧIирттайн лархъун дия вирттаврал суратру ва миннал був­сса гьунардая чивчусса кказитру, ккаккан дуллай бия вирттавраясса видеороликру. ОьрчIру буслай бия вирттаврал гьунардая ва миннал Ватан дуручлай дурсса чувшивурттая. ДакIнийн бивчунни оьрчIал Бесланнай хьу­сса теракраву ливтIусса оьрчIру ва цинявппагу дяъвилул иширттаву къучагъшиву ккаккан дур­сса вирттал.
Мероприятиялий оьрчIал мукуна дакIнийн увтунни боевиктурахьхьун рай къабуллуну къучагъну ивкIусса полициялул лейтенант МахIаммад НурбахIандов. Сентябрь зурул 22-нний Кремлилуву шадлугърал даражалий АьФ-лул Президент Владимир Путиннул Аьра­сатнал Виричунал ЦIуку тапшур бунни къучагъну жан дуллусса полициялул лейтенант МахIаммад НурбахIандовлул нитти-буттахьхьун.
— Цала оьрмулий хIайп къаувкуну виричушиву дурсса къучагътал мудангу эбратну хьунтIиссар ялун нанисса никиран ва жува буржлувссару миннал виричушиврул тарих абад буллан, — увкунни М. Рамазановал.
Хъирив Пионертурал къат­раву кьамул бунни оьрчIру пионершиврувун ва миннай галс­тукру бахIинсса ихтияр дуллуна хъамаллурахьхьун. Вожатыйнал мукунма бувсуна «Отважный» тIисса пионертурал отрядран виричу МахIаммад НурбахIандовлул цIа дуллушиву. Мероприятиялул ахирданий М. Рамазановал цIуну пионертурал кьюкьравун бувхсса оьрчIахь ларайсса тарбия ду­сса, Ватан ххирасса патриотътал хьуннав тIисса насихIат бувна ва миннан чIа увкуна дяъви ба­къасса паракьатсса оьрму.