Ноябрьданул 1-нний МахIачкъалалив ДГУ-лул филологиялул факультетрал актовый залдануву хьунни Дагъусттаннал халкьуннал шаэр, ДР-лул культуралул лайкь хьусса зузала, Аьрасатнал Чичултрал союзрал ва Аьрасатнал Журналистурал союзрал член Космина Исрапиловал творчествалул вечер. Му хIадур дурну дия филологиялул факультетрал каялувшиндарал.

Бадрижамал Аьлиева
Вечер тIитIлай, ихтилат бунни филологиялул факультетрал декан Шабан Мазанаевлул. Цалва ихтилатраву мунал кIицI лавгунни Космина Исрапиловал творчествалул ххуллу байбивхьушиву филологиялул факультетрая ва хIакьинугу ванийн факультетрал хъамалудуш куну учин къабюхъантIишиву, ва бушиву факультетрал хъунмасса ва бавкьусса кулпатрал ца член.
— ЧIа тIий ура Косминан, творчество ва поэзия ххира­сса инсаннан, цIакьсса цIуллу-сагъшиву, тIайлабацIу, — увкунни ванал.
Гихунмай махъ лавхъунни ДР-лул Чичултрал союзрал секретарь, ДР-лул культуралул лайкь хьусса зузала Макьсуд Зайнулаьбидовлул, Дагъусттаннал халкьуннал шаэр, халкьуннал кIулшиву дулаврил отличник Ссугъури Увайсовлул, философиялул элмурдал доктор Асият Буттаевал ва цайминнал.
Вечерданий балайрду увкунни ДР-лул лайкь хьусса артист ХIажиаьли ХIажиаьлиевлул, ДР-лул искусствардал лайкь хьусса ишккакку, Опералул ва балет­рал паччахIлугърал театрданул артистка Жанна Кьурбановал. Вайннал щаллу бунни Космина Исрапиловал мукъурттийсса балайрду. Филологиялул факультетрал студентътурал увкунни шаэрнан ххирасса балайрду ва дурккунни ванил назмурду.
Ккаккан дунни Косминал оьрмулул ва творчествалул ххуллурдая бусласисса видеофильм.
Бувну бур Космина 1961 шинал Шахьуйннал шяравасса МухIуттиннул ва Майсаратлул кулпатраву. Оьрмулул 4 шинаву лавхьхьуну бур буккин-чичин, 5 шинаву байбивхьуну бур махъру кунницIун кув бакьин буллай, цалчинсса ххару чичлай. 1978 шинал къуртал бувну бур МахIачкъалаллал 5-мур школа, 1984 шинал – ДГУ-рал филологиялул факультет, 2005 шинал – Финансирттал ва правалул институтрал юридический факультет. 1992 шинал дунияллийн бувккун бур Косминал цалчинсса лу, повесть «Кто ты?». Буккултравасса чIявучин Космина кIул хьуну бур 1992 шинал, «Дагестанская правда» кказитрай, «Интервью у камина» рубрикалул автор хIисаврай. Му «Камингу» тIивтIуну бур Да­гъусттаннал халкьуннал шаэр Расул ХIамзатовлущалсса ихтилат­райну. 1995 шинал був­ккун бур назмурдал цалчинсса жуж «Белая птица». Муния махъ був­ккун бур цайми-цаймигу луттирду. 2003 шинал бувккун бур ванил лу «Мой путь к Расулу Гамзатову», 2004 шинал – лу «Звезда Дагестана», ми кIивагу лу­ттирахлу Космина Исрапилова 2005 шинал лайкь хьуну бур Шолоховлул премиялун ва ДР-лул ПаччахIлугърал премиялун. Космина Ирапилова 7 шинал лахъишиврий зий бивкIун бур 7 мазрай буккайсса «ЧIавалачин» журналданул корреспондентну, яла – ДР-лул КIулшиву дулаврил министерствалий ва Миллатирттал политикалул ва кьатIаллищалсса дахIавурттал министерствалий.
Вечерданул ахирданий Космина Исрапиловал барчаллагь увкунни цила кьини хъун дан бувкIсса, чIарах бавцIусса цинявннахьвагу.