Октябрь зурул 25-нний ЦIуссалакрал райондалийсса Чапаево шяравусса «Солнышко» тIисса детсадраву хьунни школалийн гьаннинсса оьрчIал идарарттай зузисса тарбиячитурал семинар. Семинарданул тема дия школалийн гьаннинсса оьрчIал ихтилат магьир баврин хасъсса.
Шикку гьуртту хьунни ЦIуссалакрал райондалул КIулшиву дулаврил управлениялул хъунаманал хъиривчу Светлана Кудаева, райондалул КIулшивуртту дулаврил управлениялул хъунаманал бигарду чIумуйну щаллу буллалисса Расул Атлангиреев, методистътал Аминат Ибрагьимова, ХIабибат ХIажимусиева, Загьидат Аьлиева, ЦIуссаккуллал детсадрал хъунмур Халун МахIаммадова, ЦIуссачIурттащиял детсадрал хъунмур Аминат ХIажиева, ЦIуссалакрал райондалул детсадирттал ва КIулшиву дулаврил управлениялул зузалт.
Садикрал зузалтрал хъамаллурал хьхьичI шанма группалуву дирхьунни оьрчIащал хIадур дурсса дарсру. Мюрщи оьрчIал вай дарсирдай бувккунни шеърирду, увкунни балайрду, ккаккан дунни къавтIавуртту ва инсценировкартту.
Дарсру дирхьуну махъ семинарданул даву дачин дурна Расул Атлангиреевлул.
Садикраву дирхьусса дарсирдан кьимат бишлай, КIулшиву дулаврил управлениялул зузалтрал кIицI лавгунни оьрчIащалсса даву лавайсса даражалий дуллай бушиву.
Лавайсса кьимат бивщунни хIадур бай группалуву Муслимова Эмилиял дирхьусса «В мире сказок» тIисса дарсиран, мюрщими оьрчIал группалуву Маммаева Миланал ва хъуними оьрчIал группалуву Абакарова Альбинал дирхьусса дарсирдан.
Хъамаллуран ляличIину ххуй дирзунни ва асар хьунни садикрал музыкалул каялувчи АхIмадова Надирал дирхьусса «Осенняя сказка» тIисса дарс.
Дарсирдан кьиматру бивхьуну махъ «Культура речевого общения дошкольников» тIисса темалун хас бувсса доклад бувккунни «Солнышко» садикрал тарбиячи Альбина Абакаровал.
Школалийн гьаннинсса оьрчIал ихтилатраву логопеднал дуллалисса агьамсса даврин хас бувсса ихтилат бувна садикрал логопед Аида ХIасанхIусайновал.
Семинарданул хIасиллу дурну махъ цинявппа гьурттушинна дан бувкIсса хъамаллурахь ва садикрал зузалтрахь барчаллагь тIутIисса ихтилат бувна «Солнышко» детсадрал хъунмур Оксана Исмяиловал.
