Чехиянал «Актуалне» кказитрал Москавливсса корреспондент Иржи Юстлул интервью ларсунни Дагкомрелигиялул вакилтал Давуд-хIажи Тумалаевлуща ва МахIаммадаьли Гаппаровлуща.
Корреспондентнал суаллу бия хъунмурчIин Дагъусттаннайсса динийсса тагьардануцIун бавхIусса, республикалул хъуними ва ихтиярду дуруччай органнал зузалт терроризмалул ххуллу кьукьаву мурадрай цукунсса давурттив дуллай буссарив кIул буллалисса. Давуд Тумалаевлул балжину бувсун бур Иржи Юстлухь, властирдал ва диндалул идарарттал, ихтиярду дуруччай органнал зузалтращал ва общественниктуращал уртакьну цуку-цукунсса давурттив дуллай буссарив республикалий экстремизмалун ххуллу кьукьаву мурадрай. Мунал чIурчIав дурну дур агьали экстремистътурал идеологиялуцIун бавкьуну бакъашиву, миннал мурдалсса идеология дащуй дихьлай чялишну щуруй бушиву ва махъсса шиннардий террористътурал даву хьхьара хьушиву. Микку Дагкомрелигиялул дазул кьатIатусса, махъ нанисса богословтал бучIан бувну дурсса конференциярттал ва форумирттал бияла бушиврий чIурчIав дурну дур МахIаммадаьли Гаппаровлул. Гьаннайсса, чехиянал журналистнал мурад бур республикалий хъанахъимуния хIакьну бусаву. Дагъусттаннай хъанахъимуния, ххуймур къачIалай, къаххуймуния бусан, кьатIаллил билаятирттал журналистътал бикIу, аьрасатнал журналистътал бикIу, анавар буклакисса ппурттуву, Иржи Юст кунма, ссаву ци буссарив бувчIин, хъирив лавну даву дуллалисса журналистътурал хIурматгу, гьай-гьай, лавайну бикIан аьркинни.
