СССР-данул халкьуннал артист, Дагъусттаннал композитор Мурад Къажлаев ур уттизаманнул композитортураву ца яргма. Дагъусттаннал культуралуву мунал творчествалул бугьлай бур агьамсса кIану.

Мурад Къажлаев хъанай ур республикалул пишакарсса музыкалул гьану бивзминнавасса ца, мунал произведениярттал машгьур бунни Дагъусттан ва Аьрасат щаллагу аьрщарал музыкалул дунияллий. Уттигъанну тIурча, Мурад Къажлаевлул музыка бусса диск итадаркьунни Лондоннай. Машгьурсса композиторнал произведенияртту щаллу бувну бур дунияллийх цIа ларгсса пианистка Чисато Кусунокил (Япония).
«Мировая премьера записи» цIанилусса дискрал сигнальный экземпляр бивну бур Республикалул итххявхсса оьрчIансса М. Къажлаевлул искусствалул школалийн.
Дискравун бувххун бур Къажлаевлул фортепианолунсса произведенияртту: «Романтическая сонатина», «Дагестанский альбом», «Шесть прелюдий», «Пьесы-картины».
Дискрал хьхьичIмукъувусса макьалалуву ингилиснал музыковед Атешорга буслай ур композиторнал творчествалул ххуллия, дунияллул музыкалул хазналуву мунал бивхьусса хъунмасса бутIуя, мукуна буслай ур гьунар бусса пианисткая циявагу. Чисато Кусуноки цу­ппарив интервьюраву тIий бур: «На ххарира кьадарданул нава Мурад Къажлаевлул ххаллилсса музыкалул дунияллийн буцаврия. Мунил караматсса чIурдайн бувну дунияллун хъиннува ххуйну ва ххину кIул хьунтIиссар музыкалул бюхттулсса усттар Къажлаев ва «Дагъусттан» цIанилусса мунал билаят».
«Мировая премьера записи» дискрал дур хъуннасса тираж ва му щалла дунияллийх ппив дуван тIий бур.
Мурад Къажлаевлул произведениярттащалсса альбомру уттинин итабавкьуссар Аьрасатнаву, Германнаву, США-наву ва Италиянаву.