Муса МусаевлучIа шагьрулул шаннагу райондалул дянив цаннахьхьун цаннал булайсса, цаннайн ца тIайла бу­ккайсса чагъардацIун бавхIусса масъалартту ххалбигьлагьисса батIаву хьунни.

Шикку шагьрулул бакIчинал цалчинма-цалчин кIицI лавгунни шагьрулул администрациялул ва республикалул, федерал идарарттал (Кадастровая палата, Росреестр, МФЦ ва цаймигу) цаннайн цаннал тIайла бу­ккайсса чагъардал электрон система цIулаган дан аьркиншиву. ЧIурчIав дунни цIусса система дувайни хъунмурчIинсса къулагъас дуван аьркиншиврий чагъарду, лахъи лаган къабивтун, ккаккан дурсса чIумуйннин щаллу буваврих. Хаснува вай мукъурттих къулагъас дан тIалав бунни аьрщараха зузисса, миннул чагъардал ялувсса къуллу­гъирттая.
«Мэриялул сайки циняв къуллугъирттал бикIан аьркинссар ца мурад – ччясса му­тталий чагъарду хIадур бувну, аьрки-аьркиннийн чIумуй тIайла буклан. Муниципал хIаллихшиннарду щаллу дуллан аьркинссар шагьрулул халкь авара къахьунну, хъунмасса хIаллай миннух ялугьлагьи къабувну», – увкунни М. Мусаевлул.
Мукунма бакIчинал шагьрулул администрациялучIасса аьрщарал масъаларттаха зузисса къуллугърал каялувчинахь тавакъю бувунни, АьФ-лул Аьрщарал кодексрайн бувну, халкьунная тIалав бувай­сса чагъардал сияхI шагьрулул сайтрай дишин. Ванийн бувну, миннан ччянива кIулну ва хIадурну канихь бикIантIиссар цумур-цагу къуллугърай цаятува тIалав бувантIисса аьрщарал хIакъиравусса чагъар.