Октябрьданул 12-нний МахIачкъаллал бакIчи Муса Мусаев шагьрулул ухссавнил чулух цIусса базар буллай байбишинтIисса инвестор-застройщиктуращал хьунаавкьунни.

Байбихьулийва шагьрулул бакIчинал кIицI бувунни «Муниципальный» тIисса цIусса базар буллай байкъабишаврия цув рязийну акъашиву. Ялагу ххи бувунни, ци захIматшивуртту дунугу, та-бухьурчагу шагьрулувусса базарду бизан бантIишиву.
-Базарду сававну МахIач­къалаллал кIичIирттаву машинарттаха цила багьайкунсса аварашинна дур. Ччайнугу- къа­ччайнугу, рязийнугу- къарязийнугу базарду жу шагьрулул кьатIув буккан бантIиссар. Жува жунма цинявннан хайр бумур буллалиссару. ЦучIав акъар чил хъу­с­лийн тамахI бивхьуну.Ттун, масалдаран, ттуятура тIалавсса даву дан ччай дур, шагьрулуву низам дурну. Жунма цинявннан хIакьину аьркинну бур уттизаманнул шартIругу дусса , лащу-щаллусса транспортрал логистикагу дусса базар. Зухь, стоительтурахьгу, тавакъю буллай ура базар байни миккун аьркинсса материал ласун хьхьичI ттущал маслихIат ккаккан. Дувара ми­кку зунсса халкьуннансса , ми­ккун гъирарай халкь букIлакIи буллансса хIаллихшиннарду,-увкунни ванал.
Муса Мусаевлул бувсунни, «ЦIумадинский» базар бивхьу­сса аьрщи шагьрулул хъус дунугу, букIлай бушиву миккусса аьрщарал «заллухъруру» тIисса халкьгу.
-Мукунсса «заллухъруннал» хIакъиравугу хасъсса давуртту дуллай байбивхьуру. Къалпсса чагъарду буваврия тIайла хьуну, гьарца цала шаттирал жаваб дулунтIиссар,-увкунни ванал.
Базар буллалисса «Стройкомплект» компаниялул вакил ХIажимурад Урсиловлул бувсунни, цIусса базаллуву бишинтIисса 90 ттучан буллай байбивхьушиву.
-Жу жула бакIрайн ларсъсса даву дан хIадурну буру ккаккан дурсса чIумуйннийн. ЖучIа пишакарталгу бур, аьркинсса техникагу дур. Амма ца иширал ялув щак-щуклий буру-бизан банавав шагьрулувусса базарду шихун тIий. Цанчирча муния бусласисса рекламардурагу дакъар ва чIявуми халкьуннангу му иширая ттинин бавнугу бакъар.
Базарду цIусса кIанайн бизан банавав тIисса щаккирай ушиврия бувсунни мукунма Санкт-Перебурграясса бизнес-сообществалул вакил Камил Амирхановлулгу.
Муса Мусаевлул вай мукIру бувунни, базарду мяйжаннугу бизан бантIишиврий шагьрулул кьатIув.
-Ттуща къабюхъанссар цIана кьянкьану гьашину ягу ялунчIил ва чIумал базарду бизан буллай байбишинтIиссар учин. Амма му даву дувантIишиврийн вих хьи, цанчирча шагьрулуву му чара бакъа дуван аьркинсса даву дур,-увкунни ванал.
БакIчинал бусаврийну, цIусса кIанай кьамул дурсса шагьрулул генпландалийн бувну мукунна дуван ккаккан дурну дусса дур эконом-классрал къатри, оьрчIансса садру ва школа.
БакIчинал хъиривчу Аьбдулмуъмин Ибрагьимовлул кIицI бувунни, цуксса ччяни байбивхьурив муксса хъиншиву застройщиктуран цанмагу.