Ххуллункьини МахIачкъалалив ДОСААФ-рал базалий хьунни мюрщи аьралитурал цалчинсса слет.

ДакIнийн бутан, щалагу Аьра­сатнаву зузисса мюрщи аьралитурал суккушинна сакин дурну диркIссар Аьрасатнал Обороналул министерствалул сипталий.
Му хъинчулий ккаркссар Аьрасатнал Президентналгу. Мюрщи аьралитурал суккушиннарал цачIун дуллалиссар аьралуннавун гьаннинсса мюрщи жагьилтал хIадур буллалисса цинярда организациярду.
МахIачкъалаллал мюрщи аьра­литурал цалчинсса слет ларгунни агьали аьралуннаву къуллугъ буллан хIадур бай­сса отделениялул хъунама Альберт РахIимовлул каялувшиндаралу. Ванал бувсунни мюрщи аьра­литурал суккушиндарал мурад бушиву ялун нани­сса никиран Аьрасатнал география, Аьрасатнал тарих кIул бан гъира бутаву, миннахь цала вир­ттаврая, хьхьичIунсса аьлимтурая ва полководецтурая бусаву. Мюрщи аьралитурал кьюкьравун буххан бюхъайссар ччима дуклаки оьрчIаща, военно-патриотическая организациялуща, клубраща, поисковый отрядраща.
— Дуккаврия тархъансса чIу­мал мюрщи аьралитал зун­тIиссар мемориаллу, обелискру дуруччавриха, Абадул цIарачIа бацIантIиссар аьпалул вахталий, дуллантIиссар волонтершиву, гьуртту хъанантIиссар хъунисса спортрал ва магьирлугърал мероприятиярттаву. Вайннан дулунтIиссар ххишаласса кIулшивуртту, лахьхьин бантIиссар цалчинсса кумаг бан, — тIий, буслай ур А. РахIимов.
Мюрщи аьралитал цала объектирдал базардай хIадур буллансса рязишинна дуллунни Аьра­сатнал ДОСААФ-рал каялувчитурал.
Мюрщи аьралитурал слетрай гьуртту хьунни «Тебе доверяет Родина» тIисса, подполковник АхIмад Юсуповлул каялувшиндаралусса клубрал члентал, 1-сса Дагъусттаннал кадетътурал корпусрал, № 11, 29, 12, 17, 37, 19, 7, 14, 1 школардал дуклаки оьрчIру, аьралуннавун буцинсса жагьилтал.
Шагьрулул администрациялул чулуха шикку гьурттушинна дунни мобилизациялул давриха зузисса отделданул хъунама Муса Мусаевлул.
— Ва хъуннасса агьамшиву дусса, ххуйсса даву цIудуклай рязину ура. Ванил сакиншинначитуран бувчIлачIиссар гьарица дуклаки оьрчIан цала Ватан ххирану дикIан аьркиншиву, билаятрал тарих кIулну бикIан аьркиншиву, буттал буттахъал къучагъшивурттал кьадру-кьимат бикIан аьркиншиву. Ва суккушиндарал кутак мюрщи аьралитал хьунтIиссар, — увкунни Муса Мусаевлул.
Цала ихтилатраву шагьрулул администрациялул вакилнал кIицI лавгунни мюрщи аьра­литурал суккушинна цIу дуккан даврил сиптачи хьусса Сергей Шойгул махъру:
— Гьарицаннан дакIнийн дагьссар жува оьрчIнийсса чIун. Жула чIунархIал оьрчIан школалий дуклакисса чIумал кIулссия школалия аьрайн лавгми, зана къавхьуми, кIулссия ми чув, цукун талай бивкIссарив, цукун захIмат буллай бивкIссарив. Жунма кIулссия ссая пахрулий бикIанссарив. Пахру буссия жула билаятрая, мунил тарихрая. ХIакьинугу пахрулий бу­ссару жува миннуя.
Мюрщи аьралитурал слет дия ца кьинисса. Му чIумул дянив оьрчIан лавхьхьунни строевая подготовка, дуллунни ГТО-рал нормативру, хьунни битаврил, ярагъ ппивгу бувну, батIаврил, гиря гьаз даврил, противогаз лаххаврил бяст-ччал.
ХIадур бувссар
А. Аьбдуллаевал