ХьхьичIппурттуву Минажат Исмяиловнал дарсру дишайссия байбихьулул классирттаву. Ттунгу, ттущалсса оьрчIангу талихI хьуна жула цалчинсса учительницану Минажат Исмяиловна бушаву.
Жу 3 класс къуртал байхту, мунил заочнайну Пединститутрал филологиялул факультет къуртал бувну, лавайми кла­ссирттавугу, школа къуртал баннин, Минажат Исмяиловна бу­ссия жул классрал каялувчинугу ва мукунна мунил жухь дишайва оьрус мазрал ва литературалул дарсру. Подклассгу хIисавну, 11-гу шинай му бия жул каялувчи ва тарбиячи. ЛяличIисса, щихакIуй къалавхьхьусса бикIайва мунил дарс дишаврил журарду, жугу мудан оьрус мазрал дарсирдайн байрандалийн кунма хIадур шайссияв. Цила дарсирах гъира бутан кIулсса учительница ва тарбиячи бия жул Минажат Исмяиловна. Даимангу мунил жущал дайва чIярусса тематический вечерду. Ми вечердугу сакин дайва литературалул ва художествалул самодеятельностьрал бутIраяту. Дуккайссия декламациярду, вечерданун хас
дурсса цимурцагу, художествалул бутIлву учай­ссия балайрду, ккаккан дайссия къавтIавуртту, сценкарду. Муксса гьавас бутайвахха жувун учительницал, жунма жува артистал кунма чIалан бикIайвав. Минажат Исмяиловнал жущал экскурсиярду, походру байва, цила хъунмасса къушлия чIун ляркъуну, дарсирдая махъ жу мунищал шяравух лагма бувккун, бугьарасса, цивппалу­сса инсантуран ка-кумаг байссия. Хъунанаха хIурмат бангу кIулну бикIан, буттал кIанттухсса ччавугу цIакь дан, тIабиаьт ххирану хъуни хъанан, мурхьру бугьлай бачайссия интту, жун цимурцагу ххуймур лахьхьин банмуних луглай бикIайва. Тания шинмай, аьдат хьуну, даимангу интту мурхьру бугьан чув бунугу зуву дикIай уттигу ттувура. ХхюцIаллий ххюрахъул шиннардий зий, цикссаннахьгу мукун­сса мюнпатсса дарсру дирхьуссар Минажат Исмяиловнал.
Ва завучну бусса шиннардий райондалий школардал смотр-конкурсирдай, мунил каялувшиндаралу концертру хIадур дурну, ЧIяйннал дянивмур даражалул школалул бугьайссия так цалчинсса кIанттурду. ЧIярусса шиннардий дакIнийхтуну оьрчIру тарбия буллай бивхьу­сса захIматрахлу, школалул 90 шинал юбилейрай мунин дуллуна «Дагъусттан Республикалул лайкь хьусса учитель» цIа. ЧIярур мунил цаймигу бахшишру.
Махъсса шиннардий Минажат зий буссия байбихьулул классирттаву дарс дихьлай. Утти­ния тинмайгу зун бюхълай бунува, жагьилсса учительтурангу кIану хьувча куну, бигьалаган бувкьунни даврия Минажат Исмяиловна. ЧIяйннал дянивмур даражалул школалий, му тIайла буклай, учительтурал ва дуклаки оьрчIал сакин дурна вечер.
Микку ихтилатру бувна школалул директор Ирина Шамиловнал, завуч Сяид Гъазихановичлул, миннал бувсуна Минажат Исмяиловнал махъа нанисса ник тарбия дуллай ацIрахъул шиннардий бивхьу­сса захIматрая. Дуклаки оьрчIал хIадур дурну дия хъинну ххуй­сса концерт.
ДакIнивуннив цирив ца пашманшиву дагьлай дур Минажат Исмяиловна школалия лавгун.
Барчаллагь, Минажат Исмяиловнай, дирхьуцири дарсирдахлу, бувцири насихIатирттахлу. Хъунмасса умуд бур жул ина школалущалсса дахIаву къаруцан данссар тIисса.
Цал уттигу вин хъунмасса барчаллагь.
Цинявппагу ина дарс
дирхьуминнал цIания
Арсен Аьбдуллаев