ХIасан увну ур апрельданий 1934 шинал Ххюлусмав. Цала шяраву 7, Гъумук 10 классгу къуртал бувну, 1954 шинал аьрали бурж лахъан армиялийн увцуну ур. Армиялия зана хьуну махъ 1958 шинал цала уссичIан Ашхабадрайн лавгун ур. БакIрайва уссал усттарну зий ивкIун ур.

Амин Аьбдуллаев
Яла увххун ур Ашхабадуллал таксопаркраву зун. Ва даврий зий ХIасаннул 10 шин дурну дур. 1968 шинал зана хьуну ур Да­гъусттаннайн, МахIачкъалалив, увххун ур Дагъусттаннал къат­ри дайсса Управлениялул автобазалийн шупирну. Ца хIаллава гъанчунал ХIасан кIул увну ур таний ва управлениялул хъунама инженерну зузисса, Дагъус­ттаннал лайкь хьусса строитель Штанчаев Закирдущал. Закирдул ХIасан увцуну ур цачIана «Волга» машиналул шоферну. Гихунмайсса вайннал оьрму ацIрахъул шиннардий архIал зий лавгун бур. Закирдущалсса цала даврия ХIасан укун буслай ур:
— 1974 шинал СССР-данул Минпромстройрал ва главзарубежстройрал хъуниминнал Штанчаев Закирдухь маслихIат бувну бур Монголиянавусса жула хIукуматрал общестроительный трестрай зун, Улан-Батор шагьрулийн гьан. Закирдул ттухьгу ачу увкунни Монголнавун цащала командировкалий. Нагу, документругу щаллу бувну, лавгра Монголнавун. Поезд бия «Москва-Пекин». Москавлия Дархан тIисса монголнал шагьрулийн иян 5 гьантта хьуна. Тиккугу Закир увцуну занай уссияв. Ттун 3 къатта бусса квартирагу буллуна. Жул кулпат­ругу бувкIуна Монголнавун.
Закир Совет Союзрал цалчинсса строительный трестрал хъунама инженерну зун ивкIуна Улан-Батор шагьрулий. Байбивхьуна хъунмасса «Дворец культуры» буллай, 2 шинал мутталий бувну бацIан бувна. Га кьамул байсса чIумал «Главзарубежстройрая» бувкIуна делегация. Улан-Батордая увкIуна МНРК-лул 1-ма секретарь Цеденбал, цала кулпат Анастасиящал (ва цуппа оьрус миллатрал инсан бия). Му байрандалий хъинну чIявусса халкь бия. Культуралул дворецран ххишала бакъа лавайсса кьимат бивщуну, кьамул бувна. Га даврихлу хъунама инженер Штанчаев Закирдун дуллуна СССР-данул Министр­турал Советрал премия. Монголнал республикалул чулухагу Закирдун дуллуна награда. Гихуннай дурсса цаймигу давур­ттах ванан дуллуна, жула Лениннул орден куннасса, «Полярная звезда» тIисса орден. 1981 шинал контракт къуртал хьуну, Закиргу, нагу, кулпатирттащал, зана хьуру Дагъусттаннайн. Жу заказ бувссия вагон СВ-люкс, 5 гьан­тта хьуна Москавлив биян.
МахIачкъалалив увкIун, игьалавгун, цIунила зун ивкIра тава автобазалий. Ттун буллуна цIусса хъунмасса «КАМаз-самосвал», зий уссияв стройкалун аьркинсса материаллу ххилай.
1988 шинал Арманинаву хъинну гужну дуниял сукку хьуна. Нагу тIайла увккунав Ленинакан шагьрулий зун. Ххюва «КАМаз» шупиртуращал буллуна Арманинал халкьуннан кумаг­ран Дагъусттаннал чулуха. На 2 шинай зий уссияв тикку. Ленинаканнай зий уна, бувкIуна ттуйн цIунилгу Монголнавун загранкомандировкалий гьансса ча­гъар. 1990 шинал сентябрьданий на кIилчингу лавгра тава нава зий ивкIсса шагьрулийн, Дарханнайн, автомеханикну зун.
1993 шинал, контракт къуртал хьуну, зана ивкIра МахIач­къалалив. Зун ивкIра хьхьичIва нава зий ивкIсса ДУС-рал автобазалий. Шичча 1994 шинал пенсиялийн увккун, гания шинай 22 шинал мутталий зий ура къаралчину.
Ттун дур 82 шин. Ттул кулпат МахIаммадова Шарипат оьрчIащал Монголнаву буссия. ЦIана оьрчIал оьрчIах буруг­лай, минналсса буллай бур. Сентябрь зуруй хьунни 55 шин жу цачIу ялапар хъанай. Цинявннан цIуллушиву чIа тIий ура…
ХIурмат бусса ХIасан ва Шарипат! ДакIнийхтуну барча дуллай буру зу цачIу бувтсса оьрмулул 55 шинал юбилей. Зу уттиния тинмайгу оьрчIал оьрчIал ххари буллай битаннав чIярусса шиннардий.