ЧукIуннал шяраваллил жяматрачIа хIурматрайсса кулпатирттавасса ца бур Кураев Аршадлул кулпат. Цила чIумал лавайсса, сий дусса къуллугъирттай зий, шяраваллил халкьуннангу, чIявусса лакрангу кумаг бувсса, чIарав авцIусса инсан ур Аршад.
Цанагу, чингу усса учай ва кунмаминная. Цаламур кулпатгу щияркIуй ялавайну, ссахчIав мюхтажну къабивтун, цайминнангу цащава шайсса хъинбалартту буллай оьрму бувтун бур Аршадлул. Ванал цIа хIурматрай зумух ласай ва кIулсса цинявннал. ЧIявуну ттула буттацIагу баяйва дугърисса, ххаллилсса адаминар тIий.
Андриана Аьбдуллаева
Увну ур Аршад 1928-ку шинал ЧукIуннал шяраву. Школа къуртал бувну махъ Щурагьсса финансовый техникумравун увххун ур, 1946-ку шинал мугу къуртал бувну, зун ивкIун ур Финансирттал министерствалул системалуву. 1961-ку шинайннин му аралуву, районнай ва министерствалул аппаратраву бюджетрал инспекторну, ревизорну, бухгалтерну зий ивкIун ур. Чув ухьурчагу цала даву ххуйну кIулсса пишакар хIисаврай бусравну ивкIун ур. Бухгалтернал даву цинна хасъсса захIматшивурттацIун щилтагъшиву къадурну, тамахIрайн кIункIу къавхьуну, марцIну дан аьркинсса даву дур. Мукунсса уну тIий Аршад ца кIаная ца кIанайн, жаваблувшиву ххишаламур даврийн уцайсса ивкIун ур. Ва зий ивкIун ур хъунама бухгалтерну хъинну сий дусса организациярттай – Курорторграй, Совнархозрай, хъунама бухгалтерну ва бухгалтерский учетрал преподавательну Торгово-кулинарный училищалуву. Цува шикку зузисса чIумал ванал чIявусса лакран, хаснува чукIуннан, шивун буххан кумаг бувну бур, дуклакиссаксса хIаллайгу чIарав ацIайсса ивкIун ур. Бухгалтерну ва преподавательну ва мукуна зий ивкIун ур Предпринимательствалул ва правалул институтраву, мунияр махъ – Энергетикалул институтраву. 1969-ку шинал Аршадлул ххювардай къуртал бувну бур Москавлий Институт советской торговли. 1988-ку шинал циняв давурттай лайкь дурсса личIи-личIисса наградарттащал ва увккун ур пенсиялийн.
Аршад ур дяъвилул ва захIматрал ветеран. Цува кунмасса, бажар бусса, дурккусса, цала хIурматгу бусса, кулпат бакIрайн багьавривугу Аршадлун хъунмасса талихI хьуну бур. Жалилат Жабраиловнал сайки 30 шин дурну дур Курорторграй зий. Ми циняв шиннардий, цила агьаммур даврицIун, профкомрал председательнугу бивкIун бур. Ванил сурат мудангу ХIурматрал улттуйн лархъун дикIайсса диркIун дур. Ва бур лайкь хьусса машлул зузала, захIматрал ветеран. Яла-яларив ва бур ххаллилсса кулпат ва нину.
Аршадлулгу, Жалилатлулгу 62 шин хьуну дур цачIу нахIу-хIалимну, бавкьуну оьрму бутлай, цаннан ца бувчIлай, цаннал ца ххари буллай. Вайннал ларайсса кIулшивурттугу ласун бувну, цала-цала оьрмулул ххуллийн бивчуну бур 6 оьрчI. Нину-ппу кунма, аьмал-хIал бавкьусса, цаманан хъинбала бан чялишсса вайннал оьрчIругу шяраваллил жяматран бусравну бур.
Аршадлул ва Жалилатлул хIакьинусса хъунмур ххаришиву дур оьрчIал оьрчIая, миннал чIаватIултрая. Лайкьну оьрмугу бувтун, шамилчинмур никирал вив ласун кьисмат шавугу инсаннал хъунмасса талихI бур.
