Октябрьданул 25-нний Дагъусттан Республикалул Культуралул министерствалий АьФ-лул Федерал Мажлисрал ПаччахIлугърал Думалул депутат Юрий Левицкий хьунаавкьунни ДР-лул культуралул министр Зарема Буттаеващал ва му министерствалул каялувшиндаралу зузисса идарарттал каялувчитуращал.

Бадрижамал Аьлиева
БатIаврий мукунма гьуртту хьунни ДР-лул Халкьуннал Мажлисрал депутат Анна Безрукова, ДР-лул культуралул министрнал хъиривчутал Мурад ХIажиев ва Марита МухIадова, Лакрал театрданул художествалул каялувчи Бадрижат МахIаммадхIажиева, Оьрус­нал театрданул художествалул каялувчи Скандарбек Тулпаров, «Лезгинка» ансамбльданул директор Жамбулат МахIаммадов, Дагъус­ттаннал паччахIлугърал цачIун був музейрал директорнал хъиривчу Жамиля Дагирова ва цаймигу.
Хьунабакьаврил дайдихьулий Юрий Левицкийл барчаллагь увкунни цайнна вихшала дурминнахь, «Единая Россия» партиялул 9 депутатнал сияхIраву ПаччахIлугърал Думалуву арулчинмур созывраву Дагъусттаннал чулуха цува икIан чIурду буллу­сса, мукунма Республикалул БакIчи Рамазан АьбдуллатIиповлухь, цалла кандидатуралул чIарав авцIусса. Бувсунни гьарцагу депутатнал язи бувгьушиву аьзизсса республикалун шайссаксса хайр-мюнпат биян бувансса Комитет, цалва язи бувгьушиву Культуралулмур комитет, мунияту цала депутат хьуну махъсса цалчинсса хьунабакьавугу дуллалишиву республикалул Культуралул министерствалий.
Хьунабакьаврий хьунни культуралуву цачIун хьусса цIурувкьюсса масъаларттаясса ихтилатру: министерствалул ва культуралул муниципал учреждениярттал дянив­сса цIакьсса арарду цIу дуккан даву, ПаччахIлугърал лайкь хьу­сса «Лезгинка» ансамбльданун­сса КъавтIаврил къатта баву, цувгу сакин дурния шиннай хьхьичIва милицанал клубну бивкIсса къат­раву дирхьусса, «Дагестанский аул» музей-заповедникрансса фондохранилище баву ва мукунма цаймигу. ПаччахIлугърал Думалул депутатнал махъ буллунни республикалул гьаз буллалисса масъалартту Аьрасатнал Культуралул министерствалувугу, ПаччахIлугърал Думалувугу щаллу буллан хIарачат буллансса.
Юрий Левицкийл кIицI лавгунни ПаччахIлугърал Думалул Культуралул комитетрал председатель Станислав Говорухиннухь цалва бувсшиву культуралул аралуву Республикалул БакIчи Рамазан АьбдуллатIиповлул дуллалисса давурттая, мисалдаран бувцуну щалла республикалий тIитIлатIисса Аьрасатнал Халкьуннал аслийсса культуралул центрдугу, мукунма республикалул хъун шагьрулий тIивтIусса Шеърилугърал театр.
Хьунабакьаврил ахирданий Зарема Буттаевал ва Жамбулат МахIаммадовлул барчаллагь увкунни Юрий Андреевичлухь, хьусса ихтилатирттахлу, культуралул масъаларттах дуллалисса къулагъасрахлу. ЧIа увкунни мунан давриву тIайлабацIу.
Мура кьини Юрий Левицкий ивунни цIуну тIивтIусса Да­гъусттаннал паччахIлугърал цачIун бувсса тарихрал-архитектуралул ва краеведениялул музейравунгу, микку музейрал зузалтращал бунни ихтилатру.