Ларгсса нюжмардий Каспийскалив шагьрулул 2-мур школалий хьунни виричушиврул дарс, Аьрасатнал Виричу МахIаммад НурбахIандовлун хас дурсса. Му хIадур дурну дия ва дачин дурну бия школалул библиотекарь Нина Антонова ва педагог Марина АхIмадова.

Бадрижамал Аьлиева
— Махъсса ппурттуву дунияллий хъинну чIявусса авара­сса ишру хъанай бур, — увкунни батIаву дайдихьлай Нина Антоновал. Учительтурал ва дук­лаки оьрчIал дакIнийн бивчунни Дагъусттаннай ва Аьрасатнал цаймигу регионнай хьу­сса апатIсса ишру, 1999 шинал республикалийн къачагътурал кьюкьри ххярхсса чIумал, жулва инсантурал дурсса къучагъшивуртту, жанну дуллуминнал цIарду.
Хъирив Нина Васильевнал ва дуклаки оьрчIал бувсунни МахIаммад НурбахIандовлул оьрмулул ххуллия ва махъра-махъсса виричушиврия. Бувсунни ивчIаннин хьхьичI полица МахIаммад НурбахIандовлул увкусса кIива махъ «Работайте, братья», хьушиву му пишалийн хаин къашаврил, яхIирал, ццах бакъашиврул лишанну. Лахълахъисса мукъурттищал архIал экрандалий ккаккан дуллай бия виричунаясса видеоматериал, суратру. Мукунма щаллу бувну бия мунал суратирттащал­сса стенд.
— ЧIярусса шиннардий школалий зий, жунма кIулли виртталну къаляхъайшиву, вирттал шайшиву. МахIаммад НурбахIандовлул увкусса кIива мукъуву дур дазу-зума дакъасса чувшиву, жаваб­лувшинна, укун, мукъул инсан абадшиврувун уцин бю­хъайссар.
Ттун ччива жува циняв МахIаммад НурбахIандовлул аьпалун лайкьну оьрму бутлай, — увкунни 2-мур школалул директор МахIаммад Индуховлул.
Ва ххари дакъасса батIаву къуртал хьунни уттигъанну Андрей Ковалевлул МахIаммад НурбахIандовлун хасну чивчу­сса «Работайте, братья» балайлийну.