Дагъусттаннал Гидромедцентрданул бусласимунийн бувну, МахIачкъалалив махъсса шанма гьантлул дянив кIива зуруй лачIунуксса гъарал ларчIун дур.
ЧIярусса гъарал ххуллурдай бувсса пробкарттацIун, транспортрал масъалалулгу тагьар хъиннура захIмат дунни.

А. Аьбдуллаева
Вай гьантрай ГИБДД-лул зузалтрал дурсса рейдру сававну, маршрутрай заназисса транспорт чансса дия. ЧIявуми шупIиртурачIа машиналий газрал баллон дишин бучIи буллалисса печать къабивкIун бур технический паспортрай. Мунияту ми машинартту багьлухсса стоянкалий бацIан бувну бур. Тагьар укун дагьаврил хIакъираву бувчIин буллай, ГИБДД-лул зузалт бур кIицI ларгсса шупIиртураясса тIалавшинна ларгсса шинал январь зуруя шихуннай душиву, шупIиртурахьгу цимилагу бувсъшиву газрал оборудование дишин ихтияр ласун аьркиншиву, амма миннал масъала къулагъас къадурну бивтшиву.
МахIачкъалаллал ОГИБДД-лул техникалул надзорданул хъунама Мурад Шяъбановлул бувсунни, рейдру так ца му масъалалулшиврий къадуршиву, ялун ливчушиву шупIиртурал цаймигу цаярасса тIалавшиннарду щаллу къадуллалисса кIанттурду.
Октябрь зурул 17-нния байбивхьуну, ноябрь зурул 17-ннийн бияннин МахIачкъалалив най дикIантIиссар «Незаконный перевозчик» тIисса профилактикалул мероприятие. Мунил мурад бур ххуллул низам къадурурччу­сса кIанттурду ялун личин баву ва ми хьун къабитаву, пассажиртал бувцуну заназисса шупIиртурал цаярасса тIалавшиннарду щаллу даву, ххуллийн бувксса инсантурал мюхчаншиву дузал даву. ГИБДД-лул зузалтрал ххал дуллай бур шупIиртурачIа лицензияртту, медосмотр дурсса справкартту, пассажиртал бувцуну занансса ихтияр, техосмотр ва маршрутрал карта.
ЧIявуми шупIиртурачIа аьркинсса документру бакъар.
Пассажиртал бувцуну заназисса шупIиртурачIа дикIан аьркинссар му категориялул транспорт дачин дансса ихтияр дуллалисса водительнал удостоверение, страховое свидетельство, страховой полис, техосмотр дурсса документру, мукунма машиналул тагьарданул ва муний оборудование дишаврил хIакъиравусса документру.
ГИБДД-лул рейдру дурну, хIакьинусса кьини бацIан бувну бур 300 маршрутка, низамрал тIалавшиннарду къадурур­ччуминнал хIакъираву бувну бур актру ва протоколлу. ШупIиртал бувцуну бур жавабрайн.
АькIри дишин тIий бур шагьрулувух пассажиртал бувцуну занансса тендердануву ххув хьусса фирмардайгу.
Мурад Шяъбановлул бувсунни, газрал баллон дишин ихтияр дуллусса печать, пассажиртал бувцуну заназисса шупIиртурал техпаспортрай бакъассагу, цинявппагу газрай заназиминначIа бикIан аьркиншиву.
ГИБДД-лул зузалтрал ххал буллай бур машинартту шагьрулуву бакъассагу, автостанциярттайгу.
— Жу закондалул ххуллийру зузисса, — тIий ур Мурад Шяъбанов.
Уттиния тихуннайгу дяркъусса кьинирду дикIан най душиврийн бувну, ГИБДД-лул зузалт маслихIат буллай бур шупIиртурахь кIинтнил чIумуйн хIадурну бикIан, МахIачкъалаллал ГИБДД-лул ДПС-лул батальондалул командирнал хъиривчу, майор Ибрагьин Бабаев оьвчаву дуллай ур шупIиртурайн, тIабиаьтрал шартIру захIматсса чIумал ляличIинува личIлулну бикIияра, цукунчIав нигьачIисса маневрарду мадулларди, хаснува хьунив ххуллийн буккансса тIий. Шиккува кIицI бан, гъараллу ларчIсса гьантрай цаппара светофорду зия хьуну, ми дакьин дуллалиминнан захIматсса шартIирдай зун багьунни.