Республикалул метеорологтурал бусласимунийн бувну, Дагъус­ттаннай гъараллу лачIлан тIий дур октябрь зурул ахирданийннин. МахIачкъалалив гъараллу лачIлай, ттуруллив даркьусса тагьар лахъи лаган тIий дур октябрь зурул 30-ннийн бияннин.

И. Саидова
Дагъусттаннал Гидрометеорологиялул центрданул хъунама АьбдулхIалим Дадашевлул баян бунни республикалий 3 гьантлул мутталий ларчIшиву 286% гьарзасса гъарал ва гьавалул тагьаргу диркIшиву 9-10% дя­къил. Республикалул синоптиктурал гьавалул тагьар ххал дигьлай бур гьарица кIюрххил ва гьанттайннай.
Республикалул метеорологиялул центрданул хъунаманал бусаврийн бувну, цIанакулсса гьава баххана шаврил тагьар дархIуну дур Кьилвалул Ираннал чулухасса ва Саратоврал, Новгородрал районнал чулуха нанисса антициклонная.
— Кьилвалул-Баргъбуккавал чулуха нанисса гьава бур хьхьирийнияр кьирий бявкъусса. МуницIун бавхIуну хьхьи­ричIасса ва кьанивсса кIанттурдай гъараллугу гьарзану лачIлай дур, – увкунни Дадашевлул.
Метеорологтурал дурсса хъиривлаявурттайн бувну гъараллу лачIлай дикIан тIий дур ва нюжмардул ахирданийннин.
Октябрь зурул 30-нний, кIюрххицIуннай, гъараллу кьадагьну, дуниял, даруну, аьч ду­ккан най дур.
Метеостанциялул зузалтрал бусаврийн бувну, дуниял даруну дикIан тIий дур ноябрь зурул 4-5-ннийн бияннин. Муния гихуннай Дагъусттаннал цинярда районнай хьун тIий дур дяркъу, ва гьавалул тагьар октябрь зуруйнияр дяркъусса дикIан най дур.
МахIачкъалалив октябрь зуруйсса гьавалул тагьар дянивну 13,9 градусрайн дирсса дур.