МахIачкъалаллал бакIчи М. Мусаевлул хIукмулийну, хьхьичIва кьамул бувсса графикрай ккаккан дурсса чIумуйннин къабавцIуну, хъун шагьрулийсса къатравун гъилишиву дуллуну дур октябрьданул 25-нний.
З. АьбдурахIманова
БакIчинал хъиривчу Камил Изиевлул бусаврийну, шагьрулийсса къатрал, социал идарарттал котельныйрду, щин дачай бургъурду, канализациялул ва ттукIрал сетьру 100% хIадурну дусса дур ссутнил-кIинтнил чIумуйннин.
Октябрьданул 24-ннийва шагьрулул циняв садикирттавун, школардавун, культуралул ва цIуллу-сагъшиврул идарарттавун гъилишиву дуллуну дур.
Шиккува кIицI буван, цIуну кьамул дурсса закондалийн бувну, хIукму бивкIссар МахIачкъалалив гъилишиву дулун ноябрьданул 1-нния 15-ннин. Халкьуннаясса, гъилишиву лахъира къатраву тIисса, аьрзирдал хIат-хIисав дакъашиврул график баххана бан багьну бур. Ца мукунсса цалчинмур аьрза сентябрьданул 22-нний бувкIун бур. Ялу-ялун гьава бяхълан бивкIукун рязи бакъасса халкьуннаясса оьвчавуртту гьарза хьуну дур вайннал диспетчертурал къуллугърайн. Гьавалул тагьар ххюва гьантлий 8 градусраяр яларай духьурча, закондалийн бувну гъилишиву дулун буржлувссар. Мукунсса тагьар хьуннинна жучIара гъилишиву дулун хIукму хьуну бур.
МахIачкъалалив бусса бур чIяву квартирарду бусса сайки 2 азарунниха ливчусса лахъ къатри. Миннува цаппараннувун ттигу гъилишиву диян дурану дусса дур. Мунияту шагьрулул хъуними тавакъюрай бур халкьуннахь, чансса ссавур дувара, тIий, цанчирча котельныйрдава къатравун щин дирну, батарейкарду гъили хьуннингу чIун гьан тIий дуну тIий.
КIинттул халкь азурда къахъанан, дяркъусса, кIирисса щин, газ, гъилишиву дакъа къаличIан цал хъунисса, агьамсса давурттив дарду, тIий ур К. Изиев.
Щин, гъилишиву дакъа авара хъанахъисса шагьрулул халкьуннаща бюхъантIиссар ЕДДС-рал (Единая дежурно-диспетчерская служба) телефоннайн оьвчин : 7(8722) 67-21-23, 67-21-53
