Октябрьданул 6-нний МахIачкъалалив, СаййидмухIаммад-хIажи Абубакаровлул цIанийсса фондрал къатраву хьунни Исламрал медициналул центрданул даккаву (собрание).

П. Рамазанова
Микку бувсунни республикалул Муфтиятрал сипталийну исламрал медициналул центр зунтIишиву, микку къашайшалт хъин буллантIишиву Идавсил (с.аь. с) медициналийн бувну ва Мубараксса Кьурандалийну. Мукунсса центр тIитIинсса чара бакъашиву дусса дур ялу-ялун чIяву хъанай бушиву исламрал медицина яла дугьлагьими къашайшалт. Му центрданий агьали хъин буллансса, хасъсса кIулшивуртту дусса, дипломру лавсъсса хIакинталгу бусса бур. Центрданул хъунаману ивтунни уттинин Казбековский райондалул хъунама хIакиннал хъиривчуну зий ивкIсса ХIасан-апанни Аьрипов. СаййидмухIаммад-хIажи Абубакаровлул цIанийсса фондрай каялувшиву дуллали­сса ХасмухIаммад-хIажи Абубакаровлул фондрал здание дуллунни медициналул центрданун. Москавлий, цайми регионнай исламрал медициналух къула­гъас хъун хъанахъисса ппурттуву жучIавагу, Дагъусттаннайгу, мукунсса центр зун байбишаврия чIявусса инсантал ххари хьун­ни. Жунма цинявннан кIулли паччахIлугърал биялдарайсса азарханарду хIакьину цимурца аьркинмунил дузалну бакъашиву, кризисрал щавщи бивунни тIий, къашайшалтран цанма даруртту машан ласлан багьлагьисса кIантту бушиву.
Исламрал центрданий агьали уква хъин буллан тIий бухьукун, халкьуннал мунийн хъунна­сса вихшалагу дур. ЧIумул кка­ккан буванссар агьалинал вихшала цIакь хьусса-къархьусса. ТIайлабацIу баннав му давриха зузиминнан!