Аьрасатнал ХIукуматрал тапшур баврийн бувну ва Аьрасатнал Роспотребнадзорданул «О проведении внеплановых проверок организаций, оказывающих услуги в сфере розничной торговли и общественного питания» тIисса амрулийн бувну, ДР-лул Роспотребнадзорданул управлениялул ххал буллай бур ттучанну ва дукра дукайсса хIаллихшинну дайсса кIанттурдал ишбажаранчитал.

ХIасан Аьдилов
ХIакьинусса кьини Роспотребнадзорданул управлениялул кIантту-кIанттурдайсса отделлал пишакартурал Къизлар шагьрулий, мукунма Хайдакьуллал ва Ххунзахъиял районнай ххал бувну бур дукра дукайсса ва машлул 21 объект, яни каферду ва ттучанну. Миннуву ляркъуну дур тамансса диялдакъашивуртту.
Циняв ххал бувсса объектирдаву ашкара дурну дур санитариялул кьяйдарду лиян давур­тту, къабивкIун бур лабораториялул контроль, дукиялул продуктру ишла дуван бучIишиврул хIакъиравусса документру. Дукра дайсса къатраву дезинфекция, дератизация къадай­сса диркIун дур.
Ттучаннаву ляркъуну дур ишла даврил чIун ларгсса продуктру, газ бусса щинну ва цаймигу. Ца ттучандалуву хIан дахлай бивкIун бур даххаврин хасъсса лицензия дакъана. Лиян дуллай бур продуктру ядаврил кьяйдардугу сайки гьарца кIанай. Дукиялул продуктру чIамурдай дирхьуну дур цайми затирттал чIарав, цаппара продуктру дирчуну дур чIанкъатлувун. Къатраву дуручлай бакъар температуралул низам. Маркировкалий кка­ккан дурну дакъар муштаринан­сса информация (та дуккан дурну дуссарив, цуксса хIаллай ядан аьркинссарив ишла дулланнин, щил, чув дуккан дурну дуссарив ва цаймигу).
Ттучаннаву дакъар щин, канализация, мичча чIалай бур ти­ккусса зузалтрал цалла гигиена дуручлай бакъашиву. ЗузалтрачIа ба­къар медициналул книжкартту, ми ххал буллай ба­къар хIакинтурал, къадуллай бур аттес­тация. Кафердаву да­къар хасъсса кьай-кьуй ва мебель, дурсса дукрарду дирхьуну дур чIанкъатлуву.
Тикку ляркъусса диялда­къашивурттайн бувну, ишбажаранчитурал хIакъираву чивчуну бур тамансса протоколлу, Бежта шяраву лавкьуну бур 2 гастроном, ми протоколлу тIайла бувккун бур федерал судрайн. Къизлардал райондалий 2 каферал хIакъиравусса информация буллуну бур ОМВД-лийн ва УФНС-райн, танмихIрайн кIункIу баву мурадрай, цанчирча ми сияхIрайн лавсун къабивкIун бур налогирттал органнай.
Хайдакьуллал райондалий ва Къизлар шагьрулий машлул объектирдал 38 зузала даврия укьан увну ур духтуртурал ххал бувну, зунсса ихтияр ласуннин.