Гьашинусса дуккаврил шин республикалий, цIусса школартту тIитIаврийну дакъассагу, дакIний лирчIунни кIулшивуртту дулаврил аралуву хьусса дахханашивурттайнугу.

И. Саидова
ХьхьичIра-хьхьичI дахханашивуртту хьунни ЕГЭ-луву.
Аьрасатнал КIулшивуртту дулаврил министерствалул ххал дигьлагьисса проектрайн бувну, чара бакъа дулун аьркинну дур шанна предметрал ца­сса паччахIлугърал экзаменну. Ттининнин школа къуртал був­сса аттестат ласуншиврул чара бакъа дулун багьлай бивкIссар оьрус мазрал ва математикалул экзаменну, цIусса дуккаврил шинал тIурча, аттестат ласуншиврул чарабакъа дулун кка­ккан дурну дур шанна предметрал экзамен ва гайми дарсирдава ца язи дургьуссагу. Му ба­къассагу ЕГЭ-лул хIасиллайн хъар хъанантIиссар аттестатрайсса кьиматругу.
УрчIва класс къуртал був­сса оьрчIангу дулун аьркинссар кIира чара бакъасса экзамен ва кIира гайми дарсирдава язи дургьуссагу. ЦIусса кьяйдардайн бувну, вай экзаменнал хIасиллах бурувгунни дуклаки оьрчIан аттестатругу буллантIисса.
Махъсса шиннардий мас­лихIатру буллайнма буссия тестирдалмур бутIа букьан баврил хIакъираву. 2017 шинал тестру бумур бутIа букьан буллалиссар физикалул, биологиялул, химиялул КИМ-ирдава. 2016 шиналсса ингилис дарсирдал экзаменнай кунма, литературалулмур экзамендалий пикрилий бур дакIнихсса бутIа ххи буван.
Рособнадзорданул хъунаманал бувсунни 9-ми классирттаву буван хIадур буллали­сса эксперимент­рая. Оьрус мазрал ОГЭ-луву ххи буван най бур дакIнихсса задание дусса бутIа. Агана ва эксперимент 9-ми классирттаву ххуйну хьурча, гихунмай 11-ми классирттавугу дакIнихсса госэкзаменну дачин дуван най бур.
Дахханашивуртту хьунни цIу­л­лу-сагъшиврул ссуссукьу­сса оьрчIан кIулшивуртту дуллали­сса системалувугу. Сентябрьданул 1-нния шихунмай ва аралувугу дачин дунни Федерал ПаччахIлугърал КIулшивуртту дулаврил стандарт­ру. ЦIуллу-сагъшиврул ссуссукьу­сса оьрчIру дуклакисса школар­ттай хIасул дан аьркинссар миннал оьр­мулун къулайшинна дусса цинярда шартIру, чани чансса оьрчIан булун аьркинссар миннан хасну итабавкьусса учебникру. Педагогтуралгу укунсса оьрчIахь дарсру дихьлан хьхьичI буккин аьркинссар хасъсса курсру.
Ххари хьунсса дахханашинна хьунни спортрахун багьсса дуклаки оьрчIан. Физкультуралул дарсирал «5» бишинтIиссар ва ххишала­сса баллу булунтIиссар ГТО дуллу­сса оьрчIан.
Спортрахун багьминнан да­къассагу, ххари хьунсса дахханашивуртту хьунни творчествалухун багьсса оьрчIангу, 5-7-ми кла­ссирттаву пикрилий бур робототехникалул дарсру дихьлан.
Проект иширайну зузи даншиврул школарттай аьркинну дур робототехникалул дарсру дихьлансса оборудованияртту.
Хъуними классирттаву пикрилий бур обществознаниялул дарсирдал лагрулий финансирттал дарсру дачин дуллан.
Байбихьулул школарттай ларгсса шинал дурссар щалагу Аьра­сатнал даражалийсса ххал бигьавурттал давуртту. Утти вайгу дуллантIисссар гьарица шинал. Мукьва класс бувккусса оьрчIал кIулшивурттал хIасиллу дуллалисса давуртту дуллалийни, нину-ппу бия хъинну ­аьраттал буклай. Мунияту, ми паракьат буллай, буслай буру вай ЕГЭ-рду къахъанахъишиву ва вайннуя нигьа бусансса цичIав бакъашиву. Ва даву дуллали­ссар оьрчIан кIулшивуртту дулаврил даража ххал бигьин, ва ми давурттугу ххал дигьлагьи­ссар учительтурал цалла.