Уттигъанну дайдирхьуну, цила чагъираву дур лакрал шаннагу райондалул шяраваллавасса жагьилтурал дянив хъанахъисса мини-футболданул турнир – «Лига Лакии». КIулсса куццуй, ва даву дайдирхьуссар «Гъази-Гъумучи» жяматийсса фондрал сипталийну, ЦIуссалакрал райондалул кабакьаврийну.

Гьарца ххуллун кьини командарттал дянивсса бяст-ччаллу шай ЦIуссачIурттащиял шяраву­сса (Новострой) футболданул майдандалий. Му кьини куннащал кув бяст-ччаллай буккай лакрал личIи-личIисса шяраваллал жагьилтал.
«Лига Лакии» мини-футболданул турнирданувух гьуртту хъанай бур Лакрал райондалул Шахьуйннал шяраваллил жагьилталгу. Ва ххуллун кьини хьумур тIуркIулий Шахьуйннал жагьилтурал команда бястлий дурккунни ЦIуссалакрал шяраваллил командалущал. Ва ххуллух тIайлабацIу бия Шахьуйннал жагьилтурал чулух, ми ххув хьунни 3:0 счетрайну.
Шахьуйннал шяраву мудангу спортрал чулухунмайсса хIурмат лавайсса бивкIссар. ЦIана махъа нанисса никирангу спорт хъинну ххирар. Буттал шяравун гъинттул бигьалаган бувкIсса чIумал царагу кьини къалагайссар шяраваллил хьхьичIсса майдандалив жагьилтал ттуплий къабувксса (хъунмурчIин волейболданий), дара ларсун най дикIайссар ттуплий буклакиминнал ва миннал болельщиктурал чIурдал. Ттуплий дуклайгу дикIайссар цала-цала оьрмулул шиннах бурувгун сакин хьусса командартту: лапва мюрщиминная тIайла хьуну, жагьилсса пенсионертурайн бияннин. Хъинну чIявуну шайссар Шахьував жагьилтурал (кулпатру къабувсса оьрчIайнни тIутIисса) ва агьилтурал (кулпатру бувми) дянивсса бяст-ччаллу.
Ттуп, волейбол, футбол лапва ххирасса Шахьуйннал жагьилтал ванияр 5-6 шинал хьхьичI байбивхьуссар МахIачкъала шагьрулийгу ттуплий буклай, дуккаврия, даврия тархъансса чIумал, нюжмардий кIийлва батIлай ттуплий буккайсса майданнай. «Гъази-Гъумучи» фондрал ва турнир дуллан бикIайхту, пикри бувну бур ванивух гьуртту хьун, дартIун дур команда. Командалуву ур 7-8 инсан.
Шахьуйннал командалул капитанну ур спортгу, спортрал журардаву яла-яла футболгу ххирасса жагьил Руслан Жяъппаров. Спорт, футбол чIивинияцIава ххиранугу, ттуплий уклай цикссагу шинну хьунугу, пишакарсса футболист къавхьуну ур Русланнуя. Хьуну ур цалва пиша хъинну ххуйну кIулсса, гьарцагу чулуха итххявхсса юрист. Студентсса шиннардий спортрал секциялийн занайгу ивкIун, Русланнул му кьабивтун бур, цалла чIун щаллуну дуккаврин дуллуну. Болельщик ва «любитель» хIисаврай, ванал лях гьан къаритай футболданул царагу матч, ци лагрулийсса дунугу му, республикалул дикIу, билаятрал, дунияллул дикIу. Руслан хъанахъи­ссар вай махъсса шиннардий жулла республикалул хъуншагьрулий дуллалисса пляжрайсса футболданул тIуркIурдал сакиншинначитурава­сса ца, ДР-лул Пляжрал футболданул федерациялул генеральный директор, МахIачкъала шагьрулул «Прессинг» цIанилусса любительский командалул каялувчи.
– Шахьуйннал команда команда хIисаврай дартIссар ва шинал интту. Турнирдануву гьуртту хьун­сса ца чара бакъасса тIалавшинну дия гьарца командалул цалла шяраваллил герб даву. Мугу дурну, хасъсса янналул щаллушиннарал­ссагу буварду.
Махъсса тIуркIулия тIурча, жул муттаэ гужсса унугу, жуща бювхъунни ххув хьун. Цалчинма цалчинсса гол бавкьунни жул вратарь Аьлил МахIаммадовлул, жула вороталия цахъи хьхьичIунай хьуну, муттаэтурал вороталувун мунал тIайла бувсса ттуп хьунни гихунмайсса голлал дайдихьуну. Гихунмайсса кIивагу гол бавкьунни Руслан Къандаевлул, – буслай ур Руслан.
Ва ялун нанисса кьини Шахьуйннал жагьилтурал команда бястлий дуккантIиссар Буршиял командалущал.
Ялугьлай буру Шахьуйннал жагьилтурал цIу-цIусса ххувшавурттах.