Сентябрьданул 28-нний Дагъусттаннал БакIчи Рамазан АьбдуллатIипов хьунаавкьунни республикалул 6-мур созыврал Халкьуннал Мажлисравун бувхсса фракциярттал каялувчитуращал. Хьунабакьаврий мукунма гьуртту хьунни ДР-лул ХIукуматрал Председатель Аьбдуссамад ХIамидов ва ДР-лул БакIчинал ва ХIукуматрал администрациялул каялувчи Исмяил Эфендиев.
Рамазан АьбдуллатIиповлул бувсунни щала билаятращал архIал Дагъусттаннал дурну душиву политикийсса система дузал даврил жаваблувсса даву.
«БувчIавурттал компаниялувух гьуртту хьунни 16 партия, жулва хьхьичI бия задачартту: республикалийсса циняв политикийсса гужру ялун личин баву, цIусса пикри-зикрирду, идеяртту, луртанну аьям даву республика хьхьичIуннай хъит учин даву мурадрай.
Жувагу бюхъаймур барду ми гужирдал дянив рязишиву щаллу даврин хасну, цанчирча аьркинну дия ядан политикийсса цалий бацIаву», — увкунни Региондалул хъунаманал.
Ганал бувсъсса куццуй, исполнительный ва законодательный властьран аьркинссар лядуккан дуван экономика, культура, дуккаву, социал бутIа.
Депутатътурал хьхьичIсса задачарттал хIакъираву ДР-лул БакIчинал увкунни парламентрал депутатътал цIусса журалий зун аьркиншиву: «Халкьуннал Мажлисрал комитетирттал щаллу дуллан аьркинссар цалла контрольданул давуртту, дуллан экспертизартту, мукунна коррупциялул законнал хIакъиравуссагу».
Рамазан АьбдуллатIиповлул уттигу цал барча увкунни депутатътурахь цIуну бувчIаву ва бувсунни хIадурну ушиву хIала-гьурттуну зун циняв парламентрал фракциярттащал.
«Единая Россия» фракциялул калувчи Хизри Шихсаидовлул бувсунни, бувчIавурттацIун бавхIусса масъалартту ххал бигьлагьисса чIумал, партиялул члентурал Дагъусттаннал БакIчинал увкумунийн чул бишлай бивкIшиву – цIусса депутатътал бувчIаврил хIакъираву, жагьилтал, хъами кIункIу баврил хIакъираву. «Жуща бювхъунни ми гьарзат щаллу буван. Сайки бачIиксса цIу буккан барду «Единая Россиялул» депутатътал, кIилий ххишала гьарза хьунни хъами, шамлий гьарза хьунни жагьилсса инсантал», — увкуни Хизри Шихсаидовлул.
БувчIавурттал компаниялул хIакъиравусса цалвами пикрирду бувсунни ливчIми фракциярттал каялувчитуралгу: «Справедливая Россия», фракциялул каялувчи Камил Давдиевлул, КПРФ-лул каялувчи МахIмуд МахIмудовлул ва цайминнал.
