Сентябрь зурул 22-нний Аьрасатнал президент хьунаавкьунни къучагъшиврий жан дуллусса полициялул лейтенант МахIаммад НурбахIандовлул нитти-буттащал. Хьунабакьаврий гьуртту хьунни Дагъусттаннал БакIчи Рамазан АьбдуллатIиповгу.
Владимир Путиннул Кремлилуву хъунмасса хIурматрай, лахъа-хъунну буллунни Виричунал цIуку НурбахIандовлул нитти-буттахьхьун.
Президентнал барчаллагь увкунни къучагъсса арс тарбия увсса нитти-буттахь.
— Зул арс хIакьсса виричури, цанчирча бивкIулул хьхьичI цала къуллугърайнгу, халкьуннайнгу хаин къавхьуну кьянкьану ацIан гьарнаща къабюхъайссар. Гьутру бакъултралли ярагъ бакъасса инсаннайн битайсса, цила бикIайкунсса виртталли бивкIулия нигьа къабусайсса.
МахIаммад жуна цинявннан эбратну хьун аьркинссар, мунал махъва-махъсса махъру коллегахъансса аманатну хьунтIиссар. Ттун дакIнийн багьлай бур Дагъусттаннал ополчентал террористуращал талай бивкIсса куц.
БувчIлай бур зул къюву цукунчIавсса мукъурттийну куклу дан къахьунтIишиву. КIулну бикIияра, Москавливгу, щала Аьрасатнавугу дакI-къюкI дусса, аькьлу-кIулши дусса гьарицагу инсаннан бувчIлачIиссар хьумур, — увкунни Владимир Путиннул.
Виричунал аьпалунсса акция
Сентябрь зурул 17-нний МахIачкъалалив хьунни къучагъну жан дуллусса полициялул лейтенант МахIаммад НурбахIандовлул аьпалунсса «Работайте, братья!» тIисса акция.
Жагьилтурал активистурал сипталийсса ва акция ларгунни Расул ХIамзатовлул цIанийсса кучалий. Волонтертал буслай бия шагьрулул агьалинахь МахIаммад НурбахIандовлул къучагъшиврия.
«Зузияра, уссурвал!» тIисса НурбахIандовлул махъру чивчусса стикерду лачIун дуллай бия рязисса инсантурал машинарттай. Активистурал бусласимунийн бувну, МахIачкъалаллал агьали гъирарай цIухху-бусу буллай бия къучагъну жан дуллусса полицейскийнал оьрмулия. Жагьилтурал акциялувух хIала бувххунни ихтиярду дуруччай органнал зузалтгу. Ва акция бан дакIнийн багьну бур машгьурсса Дагъусттаннал интернет-ккурандалувусса жагьилтуран. Миннал пикри хъинчулий ккавккун бур ДР-лул Печатьрал ва информациялул министерствалул Информационно-культурный центрданул ва «Открытые сердца» тIисса хушрайсса цачIушиннарал.
ХIадур бувссар А. Аьбдуллаевал
