Дагъусттаннал миллатирттаву цикссагу хъами бухьунссар чIавасса оьрмулий дяъвилул шиннардий, 1941 шиная шихунмай, колхозрал давурттугу, школалийсса дуккавугу дуллай, хъунмасса захIмат бивхьуну, касмурду лархьхьусса. Мукунминнаясса хъанай бур ЧукIуннал Оьмардул ва ПатIиматлул душ Муртазааьлиева Жамисатгу – дяъвилул ва захIматрал ветеран.

Амин Аьбдуллаев
Ванил щала оьрму лавгун бур оьрчIру тарбия буллай, миннан цалчинсса оьрмулул шаттирду тIайлану ласун лахьхьин буллай. Жамисат чIивинияцIакула оьрчIру ххирасса, миннах аякьа дуллан, миннал лагма-ялтту бук­лан гъирарайсса душ бивкIшиву исватну чIалай бур ванил 60 шинай бивхьусса захIматрава. ­Оьмар цува хъудугьу ухьурчангу, ванал ххювагу оьрчI дуккин бувну, чивун буккан бувну бур. Хъунама арснал Да­гъусттаннал шяраваллил хозяйствалул институт бувккуну бур, хъиривманал Душанбе шагьрулий мединститут бувккуну бур, мюрщими кIивагу душнил МахIачкъалалив медучилище къуртал бувну, поликлиникарттай зий бур.
Жамисатгу, цинна чIивиния­цIара гъира бусса, оьрчIал тарбиячинал касму ласун Щурагьсса хъаннил педучилищалувун бувххун бур. 1949 шинал мугу къуртал бувну, гихуннайсса ду­ккаву МахIачкъалалив пединститутраву дурну дур. Хъунма­сса гъираращал зун байбивхьуну бур Жамисат МахIачкъалаллал дахху-ласулул портрал «Якорь» тIисса оьрчIал садикрай. Мяйжаннугу, ва чIавасса душнин бигьану къабивкIун бур бакIрайва, амма захIматшивурттая нигьакъабувсун, цилла даву лажин кIялану щаллу дувайссия тIий буслай бур Жамисат. Ва садикрай зий ванил 36 шин хьуну дур. Ва чIирисса чIун дакъар. Цикссагу оьрчIру хIадур бувну бур Жамисатлул школданийн бачин. Ва пахрулий буслай бур цичIава бивкIсса оьрчIру, хъунисса къуллугъчитал хьуну, личIи-личIисса давурттай, ца Дагъусттаннай бакъа, щалагу Аьрасатнавугу буссар тIий. Ванил тарбия дуллусса оьрчIру цивппа буттахъул хьуну бунугу, вайннан цала тарбиячи хъамабивтун ба­къар. Минная ЖамисатлучIан барча буллали­сса чагъарду бучIайссар гьарцагу байрандалийн.
Ххуйрихха укун, цила тарбия бувсса оьрчIая рязийну, барчаллагьрайсса ихтилат буллалаву, Ккуллал къурух ахьтта нанисса учительгу ххиттул уцIин увну, «Мерседесрай» ссур хьуну чIарах левххун лагай тIийнияр. 1991-2015 шиннардий Жамисат зий бивкIунни МахIачкъалаллал №7-мур гимназиялуву лакку мазрал дарсру дихьлай. Жамисатлун цилла касму хъинну ххирар, чув зий бухьурчагу, цилла даву лавай­сса даражалий, дирчIан дурну дувай. Ва бур «Отличник народного образования», «Заслуженный учитель Дагестана».
Цила оьрмулул 80 шинаву даврия лавгунни Жамисат. Ванил 60 шин дарс дихьлай, оьрчIан тарбия дуллай ларгунни. Цила був­сса захIматрах лайкь хьуну бур цикссагу Барчаллагьрал чагъардан, ХIурматрал грамотарттан, премиярттан. Лайкь хьуну бур цаппара­сса медаллангу.
БувкIун бур хIукуматрал хъу­ни­миннаясса барчаллагьрал ча­гъарду.
Вана гьашинугу В. В. Путиннул Буттал кIанттул цIанийсса дяъвилуву ххувшаву ларсун 76 шин шаврил байрандалийн барча буллалисса чагъар бувкIун бур ЖамисатлучIан.
Жамисат, вихьхьун цIуллу­шиву дулуннав, оьрчIая неъмат ккакканнав, оьрмулул буччиннин битаннав. Вил захIмат эбратну хьун аьркинссар цIанасса оьрчIал тарбиячитуран.