«Гъази-Гъумучи» жяматийсса фондрал сипталийну, ЦIусса­лакрал райондалул кабакьаврийну, зурдардил хьхьичI хьу­ссия футболданул турнир «Кубок Лакии». Турнирданул агьаммур мурадну мунил сакиншинначитал ккаклай бия лакрал шаннагу райондалул ва цайми миллатирттал дянив лирчIсса лакрал щархъал жагьилтал цачIунмай баву. Муний гьуртту хьуссия 40-нния лирчу­сса командартту. Ххув хьуссия Читтурдал команда.

Зулайхат Тахакьаева
Муния махъ «Кубок Лакии» хьуссия Москавлив, билаятрал хъуншагьрулий ялапар хъанахъи­сса лакрал жагьилтал цачIунмай баву мурадрай, 10 команда гьуртту хьу­сса турнирданий ххув хьуссар Хъусращиял команда.
Лавгсса бигьалагай гьантрай ЦIуссачIурттащиял школалул футболданул майданний цIунилгу хьунабавкьунни лакрал жагьилтал. Дайдирхьунни турнир «Лига Лакии». Муний гьуртту хъанай дур 30 команда: Буршиял, Шахьуйннал, ЦIуссалакрал, Вихьуллал, ЦIуссаккуллал, Кьукуннал, Къяннал, Ххутрал, Хъусращиял, Дю­къуллал, Ялув ЧIатIлухъиял, Ххюлуссуннал, КIулушацIрал, ДучIиннал, ЧIяйннал, Гьуйннал, КIундиннал, Бархъаллал, ЦIувкIуллал, Ккуллал, ТIулизуннал, Читтурдал, ЧIарттал, Уручуллал, ЧукIуннал, ЦIусссачIурттащиял, ЧIурттащиял, Чапаевкаллал, Гьамиящиял ва Гъумучиял «Фортуна» команда, цувгу сакин хьусса райондалул азарханалул хIакинтурая.
Бяст-ччал бикIаван тIий бур гьарца ххуллун кьинирдай. Цалчинсса кьини командарттал дянив хьунни 15 тIуркIу. На лавгсса чIумал дусшиврийсса бяст-ччал бия Хъусращиял ва Ххутрал командарттал дянив, ва командалущал дуккан кIуну бувксса Гъумучиял команда къадуркIун. Ххув хьунни Хъусращиял команда.
На ихтилат бувссия ттула шяраваллил командалул бакIчи Эмиль Ттаттаевлущал. Гьамин, ванал 10 шинал хьхьичI сакин дурну дур МахIачкъалалив ялапар хъана_хъисса шяравучутурал команда. «Хосрех» футбольный клубрал дур цанна хасъсса форма.
«ЦIана чIун оьлуркъусса, жагьилсса ник бигьану хъяврин хьун­сса сававртту чIярусса дур. Спортрал жагьилтал ми иширттая байгьлагьиссар. Му бакъассагу, спортрал инсантал цачIунмай буллали­ссар. Шяраваллава бивзун мукьах, ца шагьрулий, хIатта кунначIан ку гъанну ялапар хъанай бухьурчагума, нажагьвагу цаннан ца ккаклай бакъару жува. Футболданул клуб сакин бувния махъ жу нюжмардий кIийла хьунабакьайссару «Спартак» школалул футболданул майданнив. Командалуву уклай уссар 20 инсан. Бур тамашалийн бучIайссагу. Жу жущала жула оьрчIругу буцару, мюрщинува куннан кугу кIулну бикIаншиврул, дусшиву цIакь хьуншиврул, цIуллусса оьрмулийнгу вардиш баншиврул», — тIий ур Эмиль.
«ЦачIунмай хьияра лакрал жагьилтал» тIисса балай ччя-ччяни учайссия жула машгьурсса балайчи, аьпа биву Жамал Абакаровлул. Лакрал жагьилтал бунияла цачIунмай бан кабакьу буллалисса ишну хъанахъиссар футболданул турнирдугу.
ТIайлабацIу чIа тIий буру гьарцагу командалун. Турнирданул даврия бусланну гихунмайгу.