Августрал байбихьулий ГьунчIукьатIув бувкIунни бусравсса хъамал: «Дараччи» клубрал президент Мариян Илиясова, Гулшан Хасаева ва «Дараччи» клубрал цаппара цаймигу члентал. Ва аьрххилул мурад бия МахIачкъалаливсса «Дараччи» клубрал ГьунчIукьатIрал школалучIасса «Дараччи» клубращал опыт кIибачIаву, кумаг баву дуллалисса давриву, маслихIат баву даву гихуннайгу цукун дуллантIиссарив.

Укун жула даврихсса аякьалия жу хъинну ххари хьуру. Марияннул сакин бувсса нахIу-нацIусса чяйлул столданух гьарцаннал цала дакIниймур буслай бия. Ва дия ссурвал хьунабавкьусса куннасса аьчухсса хьунабакьаву. Хьуна ихтилатру ла­кку маз ябавриясса, оьрчIан ла­кку маз ххира хьунсса ххуллурду ляхълахъавриясса.
Марияннул бувсуна цуппа хъинну ххари хьушиву жул школалул дуклаки душ ХIажиева Бадружинаннул республикалийсса «Щаращи» конкурсрай 3-мур кIану бугьаврия, хъинну ххуй бивзшиву занил бувккусса балай (А. Мудунов, «Бургъихь»), му ккалаккисса куц, буккаврил такьва, барчаллагь увкуна га хIадур був­сса учительница Асият Дандамаевахь. На вихну бура укун­сса душругу, оьрчIругу жучIава чIявусса бушиврий, так аьркин­ссар вай ляхълан, бачин буллан гихунмайгу, миннавун конкурсирттавух хIала буххансса, ххув хъанансса гъира бутлан.
Хъамал бачIва бувкIун ба­къая, «Дараччи» клубрал гьарца членнан пишкаш бувуна Илиясовал спонсоршиву дурну итабавкьусса луттирду.
Пишкаш бувна луттирду шяраваллил ва школалул библиотекарттангу.
Хьунабакьаву хьунни хъинну мюнпатсса. Мукьахунмайгу жун ччай бур уттигу чIявуну хьунабакьаван жула президентнащалгу, клубрал члентуращалгу.
Сарижат Къушиева,
ГьунчIукьатIрал школалучIасса «Дараччи» клуб