Каспийск шагьрулий август зурул 1-нний шадлугърал даражалий дайдирхьунни «Кубок моря – 2016» тIисса цIанилусса Дунияллул халкьуннал хьхьирил аьралуннал конкурс. АьФ-лул Обороналул министерство сиптачи хьусса, Дунияллул халкьуннал аьрали тIуркIурдал лагрулий хъанахъисса, хьхьирийсса аьрали тивталшиву магьир даву мурадрайсса конкурсраву гьурттушинна дан бувкIун бия АьФ-лул МРК «Углич» ва КФл «Великий Устюг» экипажру, Къазахъисттаннал «Орал» ва «Сарыарка» тIисса аьрали артиллериялул жамирду, «G-122» ва «G-124» тIисса Азирбижаннал жамирду.
И. Саидова
Ва хъинну хъуннасса агьамшиву дусса конкурсрал даву дайдишиннин ссавур дакъа ялугьлай бия Каспийскаллал моряктал ва Дагъусттаннал агьали. Шикку гьуртту хъанахъисса командартту дия цаннияр ца гьунар бусса, тивталсса ва сивсусса моряктурая сакин дурсса. Конкурсрал даву дайдихьлахьисса кьини архIал дарцIунни Аьрасатнал хьхьирил аьралуннал флотран 320 шин шаврил юбилейрал кьинилущал. Мунийн бувну аьралий моряктал ва кьини кIицI лаглай бия кIилийнусса байран.
Хьхьирил кубокрал конкурсрал шадлугърайн бувкIсса хъунисса хъамаллуравух бия ДР-лул ХIукуматрал Председательнал хъиривчу Рамазан Жяъппаров, Каспийскаллал флотилиялул командующийнал хъиривчу, 1-мур ранграл капитан Сергей Екимов, Аьрасатнал, Азирбижаннал, Къазахъисттаннал командарттал чулухасса вакилтал, Хьхьирил жамирдал командир, 1-мур ранграл капитан Сергей Бабсков ва чIявусса цаймигу.
Конкурсрал даву дайдирхьунни АьФ-лул ФСБ-лул погрануправлениялул аьрали оркестрданул моряктурахасса, хьхьирихасса балай учаврийну.
Хъирив цинявппа гьуртту хъанахъими ва бувкIсса хъамал барча буллалисса ва гьуртту хъанахъисса командарттан тIайлабацIу чIа тIутIисса ихтилат бунни Рамазан Жяъппаровлул.
— Ларгсса шиналгу Дагъусттаннал аьрщарай укунсса конкурсру хьуссар, мунияту гьашинумур конкурсгу хъиннува ххаллилну тIайла дуккан хIарачат банну. «Кубок моря» конкурс хаснува жула аьрщарай дуллалаврия жу хъинну ххарину буру ва ккалли буллай буру Аьрасатнал Обороналул министерствалул жуйнна дуллалисса хъуннасса вихшалдаран, — увкунни ванал.
Сергей Екимовлул бувсунни конкурсраву гьуртту хъанай бушиву Аьрасатнавасса, Азирбижаннавасса, Къазахъисттаннаясса 130-нния ливчусса аьралитал.
Аьрали бяст-ччаллу най бикIантIиссар 3 этапрай, август зурул 13-ннийн бияннин.
