Уттигъанну МахIачкъалалив Дусшиврул къатлул конференц-залдануву хьунни Ставрополлая Дагъусттаннайн туристический кластерданул хIалкьазиялущал кIул хьун бувкIсса журналистуращалсса хьунабакьаву.

Бадрижамал Аьлиева
Муний гьуртту хьунни Ставрополлал Журналистурал союзрал председатель Василий Балдицын, ДР-лул печатьрал ва информациялул министр Бурлият Токболатова, Ставрополлал крайрайсса Дагъусттаннал вакил Аьбдулла Оьмаров ва мукунма цаймигу.
— На хъинну ххарира хIакьину хьунаакьин ччяния шинмайва кIулсса ва дусшиву дачин дурсса инсантуращал. Жувасса чIявуми хьхьичIвагу бивкIссар Дагъусттаннай. Хъуннасса агьамшиву дур республика хьхьичIуннай шаврил динамикалул, социал агьамшиву дусса объектру бувну бушаврил. Ваниннин хьхьичI жу хьунабавкьуру Дагъусттаннал туризмалул министр МахIаммад Исяевлущалгу, мунал махъ буллуна жун ва аьрххилий кабакьу буван. Августрал 2-нний жу бувантIиссар конференция, муний буллалисса докладирттава­сса ца хас бувну бикIантIиссар Дагъусттаннайнсса аьрххилун, — увкунни Василий Балдицыннул.
КIулсса куццуй, Ставрополлай ва Ставрополлал крайрай ялапар хъанай чIявусса да­гъусттанлувтал бур. Гихунмай мунал бувсунни мукун­сса дагъусттанлувтурая, цалгу Ставрополлал социал оьрму хьхьичIунмай бавриву хъунма­сса захIмат бихьлахьисса.
— КIия учитель Умар ва Ума Муртазааьлиевхъул бувкIун бур Дагъусттанная Ставропольелийн Дербетовка шяраву­сса оьрчIахь дарсру дихьлан. Махъ ми бивзун бур Москавлийн, микку Умар ишбажаранчи хIисаврай хъинну лавай хьуну ур. Ва шяраву миннал дур­сса даву – му ляличIисса ишри. Миннал бунни детдомрал къатри магьлувусса чIалъаь кунмасса. Му чIалъаьгу пишкаш бунни нитти-буттал ттюнгъашиврия ва буттал къатлуя махIрум хьусса оьрчIан. Шинай цал миннал микку дувай ххаллилсса байранну, жулва билаятрал ва дазул кьатIатусса балайчитурал гьурттушиврийнусса, — бувсунни Ставрополлал Журналистурал союзрал хъунаманал.
Бурлият Токболатовал цилва ихтилатраву чIурчIав дунни хIакьинусса кьини Дагъусттаннал журналистикалуву хъана­хъисса оптимизациялий.
— Хъамаллурахь ва жула даврил уртакьтурахь ча бувкру тIий, чIа тIий бура миннан жула республикалийсса чIун тIааьнну ва мюнпат буну тIайла дуккаву. Ттул пикрилий, жува ванияр чIявуну хьунабакьлан аьркин­ссару, даврил опыт кIибачIлай, личIи-личIисса суаллайн багьайсса пикрирду куннащал куннал кIибачIлай. Ставропольелул журналистурал позиция бур хъинну хьхьичIунсса, принципиалнайсса ва ттун хъинну дакI дакьай зул СМИ-рду зузи­сса куццуй.
Бусан ччай бура зухь цIанасса ппурттуву жучIа журналистикалуву ци хъанай буссаривгу. Хъанай бур оптимизациялул захIматсса процесс. Журналист хIисаврай, «оптимизация» тIисса мукъун на хъуннасса агьамшиву дуллай бура. Му махъ хъанай бур «оптимизм» тIисса мукъуя. Мунил тIиссар ахирданий «позитивсса» хIасиллайн биянсса умуд бушиву, цахгу жул бу­ккулт ялугьлагьисса. Жу велосипед дуккан дуван хIарачат буллай ба­къару, жул хIарачат Да­гъусттаннал журналистикалуву­сса яла хIазмур ва хьхьичIунмур щаллу бавур, — увкунни Бурлият Мовсаровнал.
Гихунмай министрнал бувсунни Дагъусттаннал миллатирттал кказитрайсса изданиярттан хьунадакьлакьисса захIматшивурттая, миннул буккулт ялу-ялун чан хъанай бушиврия, мугу – миллатирттал мазурдих багьавайсса къулагъас дакъа тIий.
Гихунмай махъ лавхъсса Аьбдулла Оьмаровлул бувсунни ­СМИ-р­дахь хъунмасса бияла бушиву Да­гъусттаннал ва дагъусттанлувтурал имидж, сипат щаллу шавриву. Бувсунни, Ставропольелий­сса журналистурал хIарачатрайн бувну, Дагъусттанная тIайламур чичавриву итталун дагьан­сса хьхьичIуннайшивуртту хьушиву.