Агьали кьамул бунни

31_foto_6ДР-лул миллатирттал политикалул министр Татьяна Гамалейл июльданул 30-нний ЦIуссалакрал райондалий агьали кьамул бунни.

И. Саидова
Ва хьунабакьаврий гьуртту хьунни ДР-лул миллатирттал политикалул министрнал цалчинма хъиривчу Гьарун Давыдов, ДР-лул Халкьуннал Мажлисрал депутат Зайнуллагь Мирзоев, ЦIуссалакрал райондалул бакIчинал хъиривчу Земфира Джиржисова, райондалул Жяматийсса палаталул председатель Магьди Оьмаров, райондалул Счетный палаталул председатель Аьбдурашид Буттаев, ЦIуссалакрал райондалул КIулшиву дулаврил управлениялул хъунама Расул Арслангереев, Райондалул азарханалул хъунмур хIакин Людмила Султанова, «Заманалул чIу» кказитрал редактор Уммугьали ЯхIияева.
Ва хьунабакьаврий, бизан баврицIун бавхIусса масъалартту бакъассагу, агьалинал сукку бунни цIуминалийн бивзун махъ хьунадакьлакьисса захIматшивурттал ва ккаккан бувсса компенсацияртту булаврил хIакъиравусса масъалартту. Ва кьини министрначIан кьамул баву тавакъю буллалисса агьалинал чулухасса 15 аьрза бувкIунни.
Зайнуллагь Мирзоевлул бувсунни бизан баврицIун бавхIусса масъалартту хIакьинусса кьини райондалий яла цIурювкьуми бушиву. Гьарца кьини райондалул администрациялий кьамул буллай буссар Росреестрданий аьрщарал участокру хIукуматрал сияхIрайн лахъан дан, бизан буллалиминнал статус ласун, багьайсса компенсацияртту ласун, цIуминалийн бивзсса кулпатирттансса коммунал хIаллихшиннардахсса компенсацияртту ласун ччисса агьали.
Земфира Джиржисовал кIицI лавгунни вай масъалартту щаллу къабувссаксса, райондалул агьалинал ахIвал-хIал лавай гьаз баврийн, райондалул экономикалул тагьар ларай даврийн тамансса щавщи биллалишиву.
— Бизан буллалиминнал масъалартталшиврий, аьрщарал хIакъи­равусса бяст-ччаллу сававну, хъинну захIмат хъанай бур инфраструктурардал строительствардал аьщуйн щусса дазурду дакъашиврийн бувну, миннуя налогру ратIин, — увкунни З. Джиржисовал.
ЦIуссачIурттащиял шяраваллил бакIчинал хъиривчу НурмахIаммад НурмахIаммадовлул гьаз бунни райондалул шяраваллал социал-экономикалул тагьар гьаз даву мурадрай хIукуматрал чаранну ля­къин аьркиншиву кIицI лаглагисса агьамсса масъала.
Хьунабакьаврий гьаз буллали­сса цаппара масъалартту бия Новостройрай къатри даву анавар дуккан даву, цIуну хьусса кулпатирттансса аьрщи тIалав дуллалисса.
Аьрщарал хIакъиравусса бяст-ччаллу сававну хъанахъисса миллатирттал дянивсса къалмакъаллая бувсунни ЦIуссаккуллал ва ЦIуссалакрал шяраваллал жяматирттал чулухасса тавакъюрал ча­гъардая.
Зайнуллагь Мирзоевлул ва Аьбдурашид Буттаевлул бувсунни бизан бан аьркинсса агьалинал хIакъиравусса документру ххал бигьинтIишиву 2016 шинал октябрь зуруй хьунтIисса хIукуматрал комиссиялул заседаниялий.
Бизан баврицIун бавхIусса масъаларттал хIакъираву агьалинал чулуха бувкIсса аьрзри ххал бигьлай, Аьбдурашид Буттаевлул кIицI лавгунни, бизан баврил программалуцIун дархIусса тагьар ялу-ялун хьхьара хъанай най душиву.
— Бизан баврицIун бавхIусса масъала щаллу къахъанахъаврийн бувну, гьарца зуруй жу датIлатIисса материаллаву дахханашивуртту хъанай дур. ЦIана комиссиялуву ххал бигьлагьисса документру салкьи бувну бивкIссар ванияр 5 шинал хьхьичI. Тания шихунмай жучIа сакин хьунни бизан буллалиминнал документру бусса 1600 папка, — увкунни Аьбдурашид Буттаевлул.
Татьяна Гамалейл кIицI лавгунни ЦIуссалакрал райондалия агьали бизан буллалисса масъала республикалий ца яла агьаммур бушиву.
— Бизан баврицIун бавхIусса агьалинал масъаларттая хъинну кIулссар Федерал паччахIлугърал властьрал органнан, Миллатирттал иширттаха зузисса федерал агентствалун. Вай масъалартту дузрайн буккан баву хъунмурчIин хъар хъанахъиссар федерал центрданул харжлугърая.
Агьалинан цIусса миналий­сса шартIру дузал дуллан, инфраструктура, коммуникациярду хьхьичIуннай даву мурадрай­сса давуртту дуллан аьркинссар республикалул министерствардал ва ведомствардалгу.
2016 шинал апрель зурул 12-нний ДР-лул БакIчинал бувсса хIукмулийн бувну, ЦIуссалакрал райондалия бизан буллалисса агьалинал ва Аухуллал район цIу дуккан дуллалисса масъаларттаха зий ду­ссар Дагъусттан Республикалул ХIукуматрал управление. Ва управление хIадур дуллай буссар бизан баврил масъалартту щаллу баврил хIакъиравусса заседание. ХIасил, масъалартту хъинну чIявусса бур, властьрал органнангу бувчIлай бур миннул агьамшиву, — увкунни министрнал.
Татьяна Гамалейл бувсунни агьалинал сукку бувсса цинявппа масъаларттаха хасъсса идарартту зунтIишиву.