Уттигъанну №3-мур изолятордануву щябивкIми хьунабавкьунни Хасавюртуллал агьали давурттал дузал баврил центрданул вакилтуращал.
Шикку гьаз бунни дуснакь бувми давурттал дузал баврил ва миннан пиша лахьхьин баврил масъалартту. Центрданул пишакар Мадина Каримуллаевал бувсунни изолятордануву щябивкIминнахь захIматрал рынокрайсса тагьардания, Центрданий сияхIрай бацIаврил низамрая ва пишалул кIулшивуртту ласунсса чаранная. Ванил мукунма бувсунни даврих луглай Центрданий сияхIрай бавцIуминнансса хIукуматрал хIаллихшиннардая.
Центрданул пишакарнал жавабру дуллунни дуснакь бувминнал суаллахьхьун. Суаллу бия дуснакьрава бувккун махъ давурттай бацIаврил хIакъиравусса. Шиккува кIицI бан, агьали давурттал дузал байсса республикалул службалул вакилтал ччя-ччяни бияй Дагъусттаннал изолятордавун ва колониярттайн. Миннал чялишсса гьурттушинна дай республикалул цинярда пенитенциар идарарттаву зузисса Тархъаншиврийн хIадур байсса школардал (Школы подготовки к освобождению) давриву. Вай школардайн заназиссар дачIи шинава дуснакьрава итабакьин тIими.
Ихтилатру къуртал хьуну махъ дуснакь бувминнахьхьун буллунни давурттай бацIаврил хIалкьазия бувчIин буллалисса инструкцияртту.
