Ухссавнил Ккавкказуллал жагьилтурал «Машук – 2016» форумрал паччахIлугърал грантру ласаврил проектирдал конкурсрал хIасиллу дуллай байбивхьунни.
Форумрай проектру дуручлачисса, миннун кьимат бишлашисса кьини най дия гьарица жагьилнан оьрмулуву мюнпатрансса кIулшивуртту дуллалисса программардал тренингру.
Ва кьини циняв жагьилтал бия цалла-цалла проектирдал презентациярду дуллай. Проектрал презентация дуван, му лавайсса кьиматран ва паччахIлугърал грантран лайкьсса душиву тасттикь буван ккаккан дурну дия дурагу 3 минутI. Экспертътурал хъинну хъирив бивзун ххалдигьлай бия ва лайкьсса кьиматру бишлай бия форумрайсса цинярда проектирдан. Проектру ххал дуван хьхьичI кьини цинявппа жагьилтурахьхьун, экспертътуращал маслихIатгу ккавккун, дахханашивуртту ва къулайшиннарду дувансса сант дуллай бия. Проектирдан кьимат бищавриву ларгсса шинах бурувгун дахханашивуртту хьуну дакъая. ТIайлассар, гьашину ххи бувну бия «Проектирдал ва ми ишла даврил пишакаршиву» тIисса ца бутIа. Му бакъассагу, баххана хьуну бия проектирдал паспортгу.
— Ва форумрайн лавгра на «Живые страницы войны» тIисса проектращал. Му проектрайн бувну итабакьин ччай ура Хъунмасса Буттал КIанттул цIанийсса дяъвилий гьуртту хьуминнал дакIний ливчIмур бусласисса лу ва сакин дуван ччай ура мива иширттан хас дурсса документирдал кино, — тIий буслай ур форумрай гьуртту хьусса Шамил НурмахIаммадов.
Эксперт Сабина Кьурбановал кIицI лавгунни «Машук» форумрай гьуртту хъанахъисса жагьилтурал проектру цалнияр цал ххаллилну хIадур дуллай бушиву. Ванил бусаврийн бувну, шиккусса хьхьарами проектругу мяъна-мурад куртIсса, гихуннай аьч дувансса дур.
— Хъинну асар хьунни мюрщи оьрчIал даллакну (парикмахер) зузисса Ингушнавасса душнил хIадур дурсса проект. Мукунна асар хьунни Чачаннавасса жагьилнал итххяххаврил чулуха махъун багьлагьисса оьрчIахь дарсру дихьаврин хас дурсса школалул проект, — увкунни Сабина Кьурбановал.
Форумрай цинявннан ххуй бивзунни Аьрасатнал Почталул бувсса «Отправь открытку с «Машука» тIисса акция. Ва акциялийн бувну форумрайсса гьурттучитураща бюхълай бия цала гъанминнайн открыткарду тIайла дуккан.
Ахирданий форумрай шадлугърай кIицI ларгунни Ухссавнил Ккавкказуллал Федерал Округрал кьини ва мунин хасну ккаккан дунни тяхъасса концертрал программа.
ДакIнийн бутанну, гьашинусса форумрай юридический идарарттан 20 грантран 2,5 млн. арцунсса, юридический идарарттан 75 грантран 300 азарда къурушрансса, 20 грант 400 азаруннинсса ва 10 грант 500 азарда къурушрансса душиву.
