Къатрал дузал баврил масъаларттаха зузисса МахIачкъала шагьрулул администрациялул управлениялул сияхIрайн бувну, хIакьинусса кьини республикалий къатри дулуннин ялугьлагьисса сияхIрай бур ятинсса 572 оьрчI.

И. Саидова
ХIукуматрал чулухасса аякьалух ва чIарав бацIаврих яла мюхтажми хъанай бур ятинсса ва урганма акъа ливчIсса оьрчIру. Вай масъаларттацIун бавхIуну, гьашинусса шинал ахирданийннин ятинсса 50 оьрчI къатрал дузал бувантIишиву бувсунни ва управлениялул хъунамур пишакар Мансури Исмяиловал.
— «О дополнительных гарантиях по социальной поддержке детей и сирот и детей, оставшихся без попечения родителей» тIисса 159-мур Федерал закондалий бур ккаккан бувну укунсса оьрчIан бувансса социал кумагирттал чаранну. Ва закондалийн бувну, гьашину МахIачкъалалив къатрал дузал буван най бур 47-49 ятинсса оьрчI. Вай масъалартту щаллу баву мурадрай федерал бюджетрава итадаркьуну дур 33 млн. арцул ва региондалул бюджетравагу 35 млн. арцул.
ОьрчIан дуллалисса къат­рал яла чIивимур площадь би­кIантIиссар 35 квадратный метра дусса.
Къатрал дузал баврил управлениялийн аьрзри кьамул буллалиссар 23 шинавун бияннинсса ятинсса оьрчIая. 23 шин хьусса ятинсса оьрчIаща къатри ласун­сса ирглий бацIан бю­хъайссар так судрал хIукму бувну махъ.
Му бакъассагу, къатри ба­чIин­тIиссар, мушакъатшиву ду­сса ва цаймигу ишру хIисавравун лавсун, гьарцаннан къулайну бикIансса куццуй.
Шиккува кIицI лаган, 2015 шинал 49 ятинсса оьрчIан къатри дуллуссар М. ХIажиевлул цIанийсса кучалий дурсса чIяру зивурду дусса къатраву. Вай къатри дузал бувну буссар оьр­мулун аьркинсса ва къулайсса шартIирдал. Укунсса оьрчIансса къатри дурну дуссар инфраструктура ва транспорт дусса кIанттурдай.