Августрал 19-нний Дагъусттаннал БакIчи Рамазан АьбдуллатIиповлул каялувшиврулу хьунни ДР-лул Мюхчаншиврул Советрал, ДР-лул Терроризмалийн къаршисса комиссиялул ва оператив штабрал цачIусса батIаву.
Рамазан АьбдуллатIиповлул бувсунни Дагъусттаннай мюхчаншиврул даража тамансса лавай хьуну бушиву.
«Аьмну лавсун жущава бювхъунни терроризмалуяр ххув хьун. ПаччахIлугъраву терроризмалийн къаршисса опытгу хIисавравун лавсун, хIакьину Аьрасат хьхьичIунсса кIанай бур дунияллул халкьуннал террорданийн къаршисса талатавриву. ХIакьину жулва хьхьичIсса масъала – паччахIлугърал властьрал циняв органну ва жямат цачIун бувну, терроризмалийн ва экстремизмалийн къарши буккавур», — увкунни Р. АьбдуллатIиповлул.
Яла ххал бивгьунни кьинилул масъала: «Об эффективности взаимодействия правоохранительных органов республики с органами государственной власти и органами местного самоуправления по вопросам обеспечения общественной безопасности и правопорядка». ДР-лул ХIукуматрал Председательнал хъиривчу Рамазан Жяъпаровлул увкусса куццуй, му масъала щаллу буллай буссар «Обеспечение общественного порядка и противодействие преступности в РД на 2015-2020 годы» тIисса паччахIлугърал программалийн чул бивщуну. Му программалуву дуссар 5 подпрограмма, миннувух, «Обеспечение безопасности дорожного движения» тIиссагу.
Вице-премьернал бувсмунийн бувну, ми подпрограммарттайн чул бивщуну дуллай бур информациялул ва профилактикалул ва практикалул давуртту, криминалданул тагьар ххуй даншиврул, инсантал жяматийсса низам дуруччин кIункIу баншиврул, оьрчIал чулухасса мардимазаншивуртту чан даншиврул, инсантурал ихтиярду дуруччаврил органнайнсса вихшала хъун даншиврул.
ДР-лул виваллил иширттал министрнал хъиривчу АхIмад Баталиевлул бувсунни республикалий аьдлу-низам дуруччаврил масъала цукун щаллу буллай буссарив.
Республикалул прокурор Рамазан Шагьнавазовлул бувсунни республикалул ихтиярду дуруччаврил органнал паччахIлугърал властьрал органнащал ва кIанттул цилакаялувшиврул органнащал хIала-гьурттуну дуллалисса давурттая цуксса мюнпат хъанай буссарив.
«2016 шинал 6 зурул мутталий ихтиярду дуруччай органнал сияхIрайн ларсун дур 9331 преступление, ягу дукIу вара чIумалнияр 16,5 процентрал ххишаласса. ЧIяру хьуну дур балугъравун къабивсса оьрчIал бувччу хьуну дурсса, чувчIав къазузиминнал дурсса преступленияртту.
БатIаврий ихтилатру хьунни мукунма терроризмалия буруччаврил ва цIу дагьавриясса мюхчаншиврул хIакъиравугу.
Яла АхIмад Баталиевлул бувсунни бувчIавурттал чIумал аьдлу-низам лиян даврия бурувччуну бикIансса давуртту.
БатIаврий ихтилатру бунни мукунма ДР-лул КIулшиву дулаврил ва ЦIуллушиву дуру_ччаврил министерстварттал вакилтуралгу.
ХIадур бувссар
ХI. Аьдиловлул
